ຄົມມະນາຄົມຮຽກຮ້ອງໃຫ້ສັງຄົມເຂັ້ມງວດ ນັບຖືລະບຽບຈະລາຈອນ

ເມື່ອມໍ່ໆມານີ້, ໜ່ວຍງານຮັບຜິດຊອບຈັດສັນຄວາມເປັນລະບຽບການ ສັນຈອນບົນທ້ອງ ຖະໜົນຂໍຮຽກຮ້ອງ ມາຍັງຜູ້ໃຊ້ລົດໃຊ້ຖະໜົນຢ່າຍ້າຍ ຫລື ທຳລາຍຖັງຢາງສີສົ້ມທີ່ຕັ້ງແບ່ງຊ່ອງການສັນຈອນຕາມສາຍທາງຕ່າງໆໃນນະ ຄອນຫລວງວຽງຈັນ,ພາຍຫລັງເຫັນວ່າຜ່ານມາບາງຈຸດຖັງດັ່ງກ່າວແມ່ນມີສະພາບ ເປ່ເພຍ້ອນຖືກລົດຕຳ ຫລື ຖືກຍ້າຍ ອອກດ້ວຍນ້ຳມືຂອງຜູ້ມັກງ່າຍຈຳນວນໜຶ່ງ ແລະ ເມື່ອອາທິດຜ່ານມາ, ປາກົດວ່າເສັ້ນທາງດ້ານຫລັງຫ້ອງວ່າການລັດ ຖະບານ, ເຂດບ້ານສີສະຫວາດ ເມືອງຈັນທະບູລີ ເຊິ່ງມີຖັງແບ່ງຊ່ອງຈະລາຈອນເປັນຈຳນວນຫລາຍກໍຖືກຍ້າຍອອກ

ໄປໂດຍບໍ່ຮູ້ສາເຫດ.

    ນັກຂ່າວພວກເຮົາໄດ້ຖາມທ່ານ ສົມນຶກ ເມກຕະກຸນ ຫົວໜ້າພະແນກຄຸ້ມຄອງການຈະລາຈອນ ແລະ ການຂັບຂີ່ ຂອງກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ປັດຈຸບັນ, ການລະເມີດລະບຽບການສັນຈອນບົນທ້ອງຖະໜົນ ຂອງຜູ້ຂັບຂີ່ແມ່ນມີແຜ່ຫລາຍ, ບັນຫາດັ່ງກ່າວມັນໄດ້ສະທ້ອນອອກມາໃຫ້ເຫັນຜ່ານການຖືເບົາຕໍ່ສະຕິເຄົາລົບລະ ບຽບຫລັກການຂັບຂີ່ຢ່າງຖືກຕ້ອງ ແລະ ປອດໄພ, ເວົ້າສະເພາະນັບແຕ່ກະຊວງໂຍທາທິການ ແລະ ຂົນສົ່ງ, ໄດ້ເລີ່ມ

ຈັດຕັ້ງປະຕິບັດໂຄງການຈັດສັນຄວາມເປັນລະບຽບການສັນຈອນທີ່ໄດ້ຮັບການສະໜັບສະໜູນທຶນຈາກທະນາຄານ ໂລກເພື່ອນຳໃຊ້ຖັງແບ່ງຊ່ອງຈະລາຈອນໃນເສັ້ນທາງ 9 ຈຸດຕາມຕົວເມືອງທີ່ເຫັນວ່າມີສະພາບການສັນຈອນແອອັດ ໃນຊົ່ວໂມງເລັ່ງດ່ວນມາແຕ່ປີ 2013 ແລ້ວ, ຍິ່ງເຫັນຕົວຈິງວ່າຜູ້ຂັບຂີ່ສ່ວນຫລາຍຍັງມີຄວາມມັກງ່າຍ ແລະ ບໍ່ຫົວ ຊາຕໍ່ການປະຕິບັດລະບຽບຈະລາຈອນວາງອອກເຊັ່ນ: ມີການຍົກຍ້າຍຖັງແບ່ງຊ່ອງການສັນຈອນອອກຕາມໃຈ, ການ ສວຍໂອກາດຕ່າວລົດໃນບ່ອນສຸດຖັງຢາງເຫລົ່ານີ້ເປັນຕົ້ນ, ອັນໄດ້ສ້າງຄວາມບໍ່ເປັນລະບຽບຈົບງາມ, ກີດຂວາງການສັນ ຈອນ ແລະ ສົ່ງຜົນສະທ້ອນອັນບໍ່ດີອື່ນໆຕາມມາ. ນອກຈາກນີ້, ກໍມີຫລາຍກໍລະນີທີ່ຜູ້ຂັບຂີ່ລົດໃຫຍ່ຕຳເອົາຖັງດັ່ງກ່າວ ຈົນເປ່ເພເສຍຫາຍບໍ່ໜ້ອຍຄືດັ່ງເຫັນເປັນຂ່າວໃນໄລຍະຜ່ານມາ.

ທ່ານ ສົມນຶກ ກ່າວວ່າ:ຈຸດທີ່ ຜູ້ຂັບຂີ່ມັກມີການລັກຍ້າຍຖັງຢາງເລື້ອຍໆແມ່ນຢູ່ເສັ້ນທາງເຂດບ້ານທົ່ງຕູມ,

ແຕ່ສີ່ແຍກໄຟແດງທົ່ງຂັນຄຳໄປທາງໄຟແດງໜອງດ້ວງ, ເສັ້ນທາງໜ້າສະຖານີລົດເມໄປຮອດສີ່ແຍກໄຟແດງ ທາດຝຸ່ນ, ສ່ວນໃຫຍ່ແມ່ນຜູ້ຂັບຂີ່ລົດຈັກ, ຍ້ອນຖັງດັ່ງກ່າວມີນ້ຳໜັກເບົາຈຶ່ງເຮັດໃຫ້ຍົກຍ້າຍອອກງ່າຍ, ແຕ່ຖ້າພວກເຮົາຈະເອົາຖັງ ຊີມັງແທນໃສ່ກໍຢ້ານມີຜູ້ຂັບຂີ່ມາຕຳອາດໄດ້ຮັບບາດເຈັບ ຫລື ເຖິງຂັ້ນເສຍຊີວິດ, ແນວໃດກໍຕາມການສັນຈອນຈະເປັນ ລະບຽບ ຫລື ບໍ່ນັ້ນ ຄວາມຈິງແລ້ວມັນບໍ່ໄດ້ຈຳເປັນວ່າພວກເຮົາຕ້ອງມີເຄື່ອງມື ຫລື ອຸປະກອນກີດກັ້ນເພື່ອບັງຄັບ ກັນຄື ແນວນີ້, ແຕ່ສິ່ງສຳຄັນມັນແມ່ນກະໂຕຜູ້ຂັບຂີ່ເອງຈະຕ້ອງພ້ອມກັນຍົກສູງສະຕິເປັນເຈົ້າເຄົາລົບລະບຽບການສັນຈອນ ຢ່າງເຂັ້ມງວດໝາຍວ່າຂັບຂີ່ໄປໃຫ້ຖືກຕາມຊ່ອງຕາມເລນກຳນົດໄວ້,ເຊິ່ງຖ້າເຮັດໄດ້ແນວນັ້ນກໍແນ່ນອນວ່າສະພາບການສັນຈອນຕາມເສັ້ນທາງຕ່າງໆກໍ ຈະມີຄວາມເປັນລະບຽບ,ສະພາບການແອອັດສັບສົນ ແລະ ອຸປະຕິເຫດບົນທ້ອງຖະໜົນ ກໍຈະຫລຸດຜ່ອນລົງໄດ້.