ຍ້ອນມີສະຕິໃນການຂັບຂີ່ເຮັດໃຫ້ອຸປະຕິເຫດຫລຸດລົງ

     ເຈົ້າໜ້າທີ່ກອງຄະດີ ພະແນກຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ນັບແຕ່ວັນທີ 9 -15 ມີນານີ້, ທົ່ວນະຄອ ນຫລວງວຽງຈັນ, ມີອຸປະຕິເຫດຕາມທ້ອງຖະໜົນເກີດຂຶ້ນພຽງ 25 ກໍລະນີ, ມີຜູ້ເສຍຊີວິດ 4 ຄົນ ທຽບໃສ່ອາທິດກ່ອນ ເຫັນວ່າຈຳນວນອຸປະຕິເຫດຫລຸດລົງ 10 ກໍລະນີ ສ່ວນຜູ້ເສຍຊີວິດຫລຸດລົງ 1 ຄົນ, ທັງນີ້ກໍຍ້ອນນັກຂັບຂີ່ມີສະຕິໃນ ການປະຕິບັດລະບຽບຈະລາຈອນດີຂຶ້ນ.

     ທ່ານ ພັນຕີ ສັງຄົມ ພົມມະລາດ ຮອງຫົວໜ້າກອງໂຄສະນາ ພະແນກຈະລາຈອນນະຄອນຫລວງວຽງຈັນ ເວົ້າວ່າ: ໃນໄລຍະຜ່ານມາເຈົ້າໜ້າທີ່ຈະລາຈອນຂອງພວກເຮົາ ກໍບໍ່ໄດ້ຢຸດຢັ້ງໃນການປະຕິບັດໜ້າທີ່ວຽກງານຂອງຕົນ ບໍ່ວ່າຈະເປັນ ວັນບຸນ, ວັນງານຕ່າງໆກໍໄດ້ເອົາໃຈໃສ່ຈັດສັນກຳລັງເຈົ້າໜ້າທີ່ລົງຄວບຄຸມການສັນຈອນຢູ່ຕາມສາຍທາງຕ່າງໆ ເພື່ອ ກວດກາຄວາມຖືກຕ້ອງຂອງເອກະສານລົດ,  ກວດກາໃບຂັບຂີ່, ໃບກວດກາເຕັກນິກ ແລະ ໃບເສຍຄ່າທາງຕ່າງໆ ເພື່ອຄວາມເປັນລະບຽບຮຽບຮ້ອຍຂອງຜູ້ໃຊ້ລົດໃຊ້ຖະໜົນປາສະຈາກການເກີດອຸປະຕິເຫດ. ນອກຈາກນີ້ ຍັງ ກວດກາການໃຊ້ຄວາມໄວໃນການຂັບຂີ່ເກີນກຳນົດ ລວມໄປເຖິງການກວດກາຫາທາດເຫລົ້າຂອງຜູ້ຂັບຂີ່ນຳ​ອີກ. ຖ້າພົບເຫັນເຈົ້າໜ້າທີ່ຈະບັງຄັບໃຊ້ມາດຕະການສະກັດກັ້ນຕາມລະບຽບການທີ່ກຳນົດໄວ້. ທັງນີ້ ກໍເພື່ອແນໃສ່ ຫລຸດຜ່ອນການເກີດອຸປະຕິ ເຫດຕາມທ້ອງຖະໜົນ.