ພູເບ້ຍມາຍນິງມອບພັນທະພາສີຊັບພະຍາກອນແຮ່ທາດງວດ​ສຸດທ້າຍປີ 2015 ​ໃຫ້​ລັດຖະບານ

         

ເມື່ອບໍ່ດົນມານີ້, ບໍລິສັດພູເບຍມາຍນິງ (PBM), ໄດ້ນໍາເງິນຈໍານວນ 2,1 ລ້ານໂດລາ ສະຫະລັດມອບໃຫ້ລັດຖະບານລາວ, ຊຶ່ງເປັນເງິນງວດສຸດທ້າຍທີ່ນອນໃນວົງເງິນທັງໝົດ 37 ລ້ານໂດລາສະຫະລັດຂອງມູນຄ່າພັນທະພາສີຊັບພະຍາກອນແຮ່ທາດປະຈຳປີ 2015.

            ໂຮງງານຂຸດຄົ້ນ-ປຸງ​ແຕ່ງທອງ ແລະ ຄຳພູຄໍາ, ໄດ້ບັນລຸສະຖິຕິການຜະລິດໃນໄຕມາດທີ 3 ຂອງເດືອນກັນຍາ 2015 ເຊິ່ງມີ​ແຮ່ທອງເຂັ້ມຂຸ້ນຫລາຍກວ່າ 17.445 ໂຕນ ແລະ ​ແຮ່ຄຳເຂັ້ມຂຸ້ນ 27.526 ອອນ. ນອກຈາກນັ້ນໂຮງງານຂຸດຄົ້ນ-ປຸງແຕ່ງຄຳ ແລະ ເງິນຢູ່ບ້ານຫ້ວຍຊາຍກໍບັນລຸເປົ້າໝາຍໃນການຜະລິດຄໍາໄດ້ 27.526 ອອນ ແລະ ເງິນ 299.565 ອອນ.

           ທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍມາຍນິງ ໄດ້ກ່າວວ່າ: ບໍລິສັດພວກເຮົາ​ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ແລະ ລາຍຮັບຈາກການລົງທຶນ ແລະ ການສົ່ງອອກດ້ານບໍ່ແຮ່ແມ່ນມີຄວາມສຳຄັນຫລາຍສໍາລັບເສດຖະກິດຂອງລາວ, ບໍລິສັດພູເບ້ຍມາຍນິງໄດ້ສ້າງຜົນປະໂຫຍດທາງອ້ອມ ແລະ ທາງກົງໃຫ້ແກ່ພາກລັດທາງດ້ານພັນທະອາກອນ, ພາສີຊັບພະຍາກອນແຮ່ທາດ ແລະ ເງິນປັນຜົນ.

           ໃນຕົ້ນປີ 2015 ບໍລິສັດພູເບ້ຍມາຍນິງ, ໄດ້ມີການປ່ຽນໂຄງຮ່າງການຈັດຕັ້ງຄືນໃໝ່ ແລະ ທົບທວນງົບປະມານ ເພື່ອເຮັດໃຫ້ຕົ້ນທຶນຫລຸດລົງ, ເນື່ອງຈາກລາຄາສີນຄ້າປະ​ເພດໂລຫະທາດໃນຕະຫລາດໂລກຕົກຕໍ່າລົງຢ່າງຕໍ່ເນື່ອງ, ອີກ​ເຫດຜົນໜຶ່ງກໍຄືພະນັກງານລາວກໍໄດ້ຮັບການເລື່ອນຕໍາ​ແໜ່​ງຂຶ້ນໄປຫາຕໍາແໜ່ງບໍລິຫານຂັ້ນສູງ ແລະ ຕໍາແໜ່ງທີ່ສູງຂຶ້ນຫລາຍກວ່າເດີມ. ປັດຈຸບັນພະນັກງານລາວແມ່ນກວມຫລາຍກວ່າ 90% ຂອງແຮງງານທັງໝົດ, ເຖິງແມ່ນວ່າລາຄາປະ​ເພດໂລຫະຢູ່ໃນຕະຫລາດໂລກປັດຈຸບັນກໍາລັງຢູ່ໃນວົງຈອນທີ່ຕົກຕ່ຳລົງສໍາລັບຂະແໜງອຸດສາຫະກໍາບໍ່ແຮ່ ບໍລິສັດຄາດວ່າໃນໄລຍະຍາວລາຄາປະ​ເພດໂລຫະຈະຟື້ນຕົວຄືນ. ໃນເວລານັ້ນບໍລິສັດຈະກຽມພ້ອມທີ່ຈະນໍາໃຊ້ປະໂຫຍດໃຫ້ເຕັມສ່ວນຈາກລາຄາທີ່ປັບປຸງດີຂຶ້ນ ແລະ ບໍ່ພຽງແຕ່ຈະເພີ່ມຜົນປະໂຫຍດໃຫ້ແກ່ບໍລິສັດເທົ່ານັ້ນ, ແຕ່ຍັງສົ່ງຜົນດີຕໍ່ສະພາບເສດຖະກິດຂອງ ສປປ ລາວ ອີກດ້ວຍ.