ປີຜ່ານມາປະເທດເຮົາມີຜົນສໍາເລັດຫລາຍດ້ານ

            ​ໃນໂອກາດເຂົ້າຮ່ວມພິທີສະເຫລີມສະຫລອງສົ່ງທ້າຍປີເກົ່າ 2015 ແລະ ຕ້ອນຮັບປີໃໝ່ 2016 ໃນຄໍ່າຄືນວັນທີ 31 ທັນວາ 2015 ຜ່ານມາທີ່ສູນການຄ້າລາວ-ໄອເຕັກ, ນະຄອນຫລວງວຽງຈັນຂອງທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ຊຶ່ງທ່ານໄດ້ຂຶ້ນກ່າວຄໍາເຫັນບາງຕອນວ່າ: ພວກເຮົາລ້ວນແຕ່ຮັບຮູ້ນຳກັນວ່າ ປີ 2015 ຜ່ານມານັ້ນ,ທົ່ວປະເທດໄດ້ພ້ອມກັສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວຄົບຮອບ 60 ປີ, ພ້ອມກັນນັ້ນ, ກໍຍັງເປັນປີທີ່ປວງຊົນລາວທັງຊາດ ພ້ອມກັນສະເຫຼີມສະຫຼອງວັນສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ, ລະນຶກເຖິງວັນຄ້າຍວັນເກີດຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຄົບຮອບ 95 ປີ ແລະ ມີອີກຫຼາຍໆເຫດການປະຫວັດສາດທີ່ຢັ້ງຢືນວ່າ: ໃນ 40 ປີຜ່ານມາປະເທດຊາດຂອງພວກເຮົາໄດ້ມີ

ຜົນສຳເລັດອັນໃຫຍ່ຫຼວງໃນຫຼາຍດ້ານ, ກ່ອນອື່ນໝົດປະເທດເຮົາໄດ້ມີສະເຖຍລະພາບທາງດ້ານການເມືອງອັນໜັກແໜ້ນ,ເສດຖະກິດແຫ່ງຊາດໄດ້ມີຈັງຫວະເຕີບໂຕຢ່າງຕໍ່ເນື່ອງ ຄິດສະເລ່ຍ 7,5% ຕໍ່ປີ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປົວແປງໃຫ້ນັບມື້ດີຂຶ້ນ, ຄວາມທຸກຍາກຂອງປະຊາຊົນໄດ້ຖືກລົບລ້າງໄປຍັງເຫຼືອພຽງ 6,59% ຂອງຄອບຄົວໃນທົ່ວປະເທດ. ອັນສຳຄັນທີ່ສຸດ, ພວກເຮົາໄດ້ສ້າງພື້ນຖານ ທາງດ້ານວັດຖຸເຕັກນິກເພື່ອນຳເອົາປະເທດຊາດໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020, ອີກດ້ານໜຶ່ງອິດທິພົນຊື່ສຽງຂອງປະເທດລາວໃນພາກພື້ນ ແລະ ສາກົນ ແມ່ນໄດ້ຮັບການເຊີດຊູຂຶ້ນສູງຢ່າງບໍ່ເຄີຍມີມາກ່ອນ, ເຊິ່ງ ຜົນສຳເລັດທີ່ຍາດມາໄດ້ນັ້ນແມ່ນຍ້ອນພວກເຮົາໄດ້ມີການນຳພາອັນຖືກຕ້ອງ ແລະ ປີຊາສາມາດຂອງພັກ, ຊຶ່ງພັກປະຊາຊົນປະຕິວັດລາວໃນ 60 ປີ ທີ່ຜ່ານມາໄດ້ມີການນຳພາໃນຫຼາຍຮຸ້ນ ແລະ ເນື່ອງໃນໂອກາດປີໃໝ່ 2016 ນີ້, ພວກເຮົາຈົ່ງພ້ອມກັນປົກປັກຮັກສາ ແລະ ເສີມຂະຫຍາຍໝາກຜົນທີ່ພວກເຮົາຍາດມາໄດ້, ພ້ອມກັນນຳເອົາປະເທດເຮົາກ້າວຂຶ້ນຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ແລະ ພ້ອມກັນບຸກບືນສ້າງສາພັດທະນາປະເທດຊາດພວກເຮົາໃຫ້ຈະເລີນກ້າວໜ້າຍິ່ງໆຂຶ້ນ.