ເຈົ້າໜ້າທີ່ຫວຽດນາມຈັບພໍ່ຄ້າເຮໂຣອິນຄົນລາວ ແລະ ໄທພ້ອມຂອງກາງ 30​ ກິໂລ

ຂ່າວຈາກ​ເວັບ​ໄຊໜັງສືພິມ​ແທງ​ນຽນ​ນິວຂອງຫວຽດນາມ(Thanhniennews.com) ໃຫ້ຮູ້ວ່າ: ໃນວັນທີ 3 ມັງກອນ 2016 ນີ້, ເຈົ້າໜ້າທີ່ຫວຽດນາມທີ່ຊາຍແດນຮາຕິນ ປະເທດຫວຽດນາມສາມາດຈັບກຸມຂະບວນຄ້າຢາເສບຕິດ, ເຊິ່ງປະກອບມີຄົນລາວ4 ຄົນ ແລະ ຄົນໄທ1 ຄົນ, ເຊິ່ງພວກກ່ຽວແມ່ນກຳລັງລັກລອບເອົາເຮໂຣອິນຈຳນວນ 30 ກິໂລຂ້າມຊາຍແດນເຂົ້າມາປະເທດຫວຽດນາມ.
ການຈັບກຸມຄັ້ງນີ້, ແມ່ນໄດ້ຮັບການຮ່ວມມືລະຫວ່າງເຈົ້າໜ້າທີ່ຂອງຫວຽດນາມ ແລະ ເຈົ້າໜ້າທີ່ຂອງລາວ, ໂດຍສາມາດສະກັດຈັບພວກກ່ຽວໄດ້ຕອນເວລາ 7 ໂມງເຊົ້າຂອງວັນທີ 3 ມັງກອນ 2016 ໂດຍກຸ່ມດັ່ງກ່າວໃຊ້ພາຫະນະຈຳນວນ 4 ຄັນຂົນຢາເສບຕິດດັ່ງກ່າວມຸ້ງໜ້າເຂົ້າມາຫວຽດນາມ.

ເຈົ້າໜ້າທີ່ໃຫ້ຮູ້ວ່າ: ໄດ້ມີການຕິດຕາມກຸ່ມຄົນດັ່ງກ່າວມາດົນແລ້ວ ແລະ ສາມາດຢືນຢັນໄດ້ວ່າເປັນຂະບວນການຄ້າຢາເສບຕິດຂ້າມຊາດລາຍໃຫຍ່ ​ແລະ ເຈົ້າໜ້າທີ່ຍັງຈະຂະຫຍາຍຜົນເພື່ອນໍາຈັບເຄືອຂ່າຍດັ່ງກ່າວມາດໍາເນີນຄະດີໂດຍໄວ.

ຫວຽດນາມຖືເປັນປະເທດທີ່ມີກົດໝາຍເຄັ່ງຄັດສຳລັບຄະດີຢາເສບຕິດ, ຜູ້ກະທຳຜິດທີ່ຄ້າເຮໂຣອິນຫຼາຍກວ່າ 600 ກຣາມ ຫຼືຢາບ້າຫຼາຍກວ່າ 2.5 ກິໂລກຣາມແມ່ນຈະຖືກປະຫານຊີວິດ, ນອກຈາກນີ້ຜູ້ໃດມີການຂາຍຫຼືມີໄວ້ຄອບຄອງເຮໂຣອິນ100 ກຣາມ ຂຶ້ນໄປກໍຈະຖືກຕັດສິນປະຫານຊີວິດເຊັ່ນກັນ.