laophatthananewspaper: ການເຊື່ອມຈອດດ້ານພື້ນຖານໂຄງລ່າງຂອງອາຊຽນ

ໃນປີ 2015 ໂຄງການເຊື່ອມຕໍ່ດ້ານພະລັງງານໄດ້ເຊື່ອມຕໍ່ລະຫວ່າງແຂວງກາລີມັນຕັນຕາເວັນຕົກຂອງອິນໂດເນເຊຍກັບລັດຊາຣາວັກຂອງມາເລເຊຍພາຍໃນປີ 2020, ໂຄງການທາງລົດໄຟສິງກະໂປ-ຄຸນໝິງຈະເຊື່ອມຜ່ານປະເທດສິງກະໂປ, ມາເລເຊຍ, ໄທ, ກຳປູເຈຍ, ຫວຽດນາມ ແລະມຽນມາ.

ການເຊື່ອມຕໍ່ດັ່ງກ່າວຂ້າງເທິງນັ້ນ ແມ່ນເສັ້ນທາງເຊື່ອມຕໍ່ທີ່ສຳຄັນໃນການສ້າງປະຊາຄົມອາຊຽນທັງດ້ານພື້ນຖານໂຄງລ່າງ ແລະ ການໄປມາຫາສູ່ກັນລະຫວ່າງປະຊາຊົນກັບປະຊາຊົນ ແລະ ການພົວພັນດ້ານວັດທະນະທຳຫລືການຄ້າ. ສິ່ງດັ່ງກ່າວນັ້ນແມ່ນມີຄວາມສຳຄັນໃນການເພີ່ມທະວີ ແລະສົ່ງເສີມໃຫ້ອາຊຽນເປັນພາກພື້ນທີ່ພົ້ນເດັ່ນດ້ານການດຳເນີນທຸລະກິດ ແລະ ການເຊື່ອມໂຍງກັນຂອງ 10 ປະເທດສະມາຊິກ ແລະ ປະຊາຊົນຂອງອາຊຽນ.

ການເຊື່ອມຕໍ່ພາຍໃນອາຊຽນທັງຫລາຍເຫລົ່ານີ້ແມ່ນໄດ້ປະຕິບັດຕາມແຜນແມ່ບົດວ່າດ້ວຍການເຊື່ອມຈອດອາຊຽນ ເຊິ່ງຜູ້ນຳຂອງບັນດາປະເທດສະມາຊິກອາຊຽນໄດ້ຮັບຮອງເອົາເປັນແຜນປະຕິບັດງານແຕ່ປີ 2011 ຫາ 2015 ເພື່ອການເຊື່ອມໂຍງອາຊຽນທີ່ມີຄວາມໃກ້ຊິດຫລາຍຂຶ້ນກວ່າເກົ່າ. ແຜນແມ່ບົດດັ່ງກ່າວໄດ້ກຳນົດເອົາ 3 ປະເພດການເຊື່ອມຈອດ ໄດ້ແກ່ການສົ່ງເສີມການພັດທະ ນາດ້ານພື້ນຖານໂຄງລ່າງ (ການເຊື່ອມຈອດດ້ານພື້ນຖານໂຄງລ່າງ), ປະສິດທິພາບຂອງລະບຽບຫລັກການ, ກົນໄກ ແລະ ຂັ້ນຕອນຕ່າງໆ (ການເຊື່ອມຈອດດ້ານລະບຽບຫລັກການ) ແລະ ເພີ່ມທະວີບົດບາດຂອງປະຊາຊົນດ້ວຍການເປີດກວ້າງກາລະໂອກາດຕ່າງໆ (ການໄປມາຫາສູ່ຂອງປະຊາ ຊົນ). ບັນດາແຜນການຮ່ວມມືຂອງອະນຸພາກພື້ນເຊັ່ນ: ເຂດພັດທະນາອາຊຽນຕາເວັນອອກທີ່ລວມມີບຣູໄນ-ອິນໂດເນເຊຍ-ມາເລເຊຍ-ຟີລິບປິນ (BIMP-EAGA), ສາມຫລ່ຽມພັດທະນາອິນໂດເນເຊຍ-ມາເລເຊຍ-ໄທ (IMT-GT) ແລະ ການຮ່ວມມືຂອງບັນດາປະເທດລຸ່ມແມ່ນ້ຳຂອງ (GMS) ລ້ວນແຕ່ມີບົດບາດສຳຄັນໃນການເລັ່ງລັດການສ້າງປະຊາຄົມອາຊຽນ.

ໂຄງການເຊື່ອມຈອດດ້ານພື້ນຖານໂຄງລ່າງໄດ້ກວມເອົາຂໍ້ລິເລີ່ມຕ່າງໆ ເພື່ອອຳນວຍຄວາມສະດວກການໄຫລວຽນຂອງສິນຄ້າ, ການບໍລິການ ແລະການໄປມາຫາສູ່ຂອງປະຊາຊົນຢູ່ໃນພາກພື້ນ. ໂຄງການເຫລົ່ານີ້ລວມມີເຄື່ືອຂ່າຍທາງດ່ວນອາຊຽນ, ການກຳນົດ 47 ທ່າເຮືອງທາງທະເລ, ສາຍສົ່ງອິນເຕເນັດຄວາໄມສູງອາຊຽນ ແລະ ຕາໜ່າງເຄືອຂ່າຍພະລັງງານໄຟຟ້າອາຊຽນ, ໂຄງການກໍ່ສ້າງພື້ນຖານໂຄງລ່າງທີ່ສົ່ງເສີມການເຊື່ອມຈອດຜ່ານຊາຍແດນ ແລະ ນຳມາເຊິ່ງຜົນປະໂຫຍດ ເຊັ່ນການພັດທະນາຄວາມສາມາດແຂ່ງຂັນຂອງເຄືອຂ່າຍການຜະລິດໃນພາກພື້ນ, ການໄຫລວຽນຂອງສິນຄ້າ, ການບໍລິການ ແລະ ການລົງທຶນດີກວ່າເກົ່າ ແລະ ການຫລຸດຜ່ອນຄວາມແຕກໂຕນດ້ານການພັດທະນາ.

ສັນຍາວ່າດ້ວຍການອຳນວຍຄວາມສະດວກການຂົນສົ່ງສາມສະບັບ ໂດຍສະເພາະສັນຍາອາຊຽນໃນຂອບວຽກຂອງການອຳນວຍຄວາມສະດວກການສົ່ງຜ່ານສິນຄ້າ, ອຳນວຍຄວາມສະດວກການຂົນສົ່ງຂ້າມປະເທດ ແລະ ການຂົນສົ່ງຫລາຍຮູບແບບລ້ວນແຕ່ປະກອບສ່ວນເຂົ້າໃນການເຊື່ອມຈອດດ້ານພື້ນຖານໂຄງລ່າງແນໃສ່ຫລຸດຜ່ອນຕົ້ນທຶນ ແລະ ສົ່ງເສີມການເຄື່ອນຍ້າຍຂອງຍານພາ ຫະນະ, ຜະລິດຕະພັນ, ການບໍລິການຜ່ານຊາຍແດນ. ຕົວຢ່າງໃນປີ 2015 ສປປ ລາວ ແລະ ຫວຽດນາມ ໄດ້ເປີດນຳໃຊ້ການກວດສິນຄ້າຈຸດດຽວຢ່າງເປັນທາງການທີ່ຈຸດກວດຊາຍແດນລາວບາວ-ແດນສະ ຫວັນ ເພື່ອເປັນການອຳນວຍຄວາມສະດວກດ້ານການຄ້າຂອງສອງປະເທດ ແລະ ຂອງແລວເສດຖະກິດຕາເວັນອອກ-ຕາເວັນຕົກ.

ປະເທດສະມາຊິກອາຊຽນກຳລັງເຮັດໃຫ້ການເຄື່ອນຍ້າຍຂອງສິນຄ້າສະດວກຂຶ້ນກວ່າເກົ່າຢູ່ພາຍໃນປະເທດ ແລະ ອອກສູ່ປະເທດສະມາຊິກອື່ນ ໂດຍຜ່ານລະບົບເຂົ້າ-ອອກປະຕູດຽວ. ໃນຕົ້ນປີ 2016 ນີ້, ການບໍລິການເຂົ້າ-ອອກຜ່ານປະຕູດຽວຈະຖືກຈັດຕັ້ງປະຕິບັດລະຫວ່າງປະເທດສະມາຊິກທີ່ມີຄວາມພ້ອມໃນວຽກງານດັ່ງກ່າວ. ອາຊຽນກຳລັງຊຸກຍູ້ໃຫ້ມີການບໍລິການເຂົ້າ-ອອກຜ່ານປະຕູດຽວໃນການຂົນສົ່ງສິນຄ້າທາງອາກາດ ແລະ ການບໍລິການເຂົ້າ-ອອກຜ່ານປະຕູດຽວໃນການຂົນສົ່ງສິນຄ້າທາງນ້ຳເພື່ອບັນລຸເປົ້າໝາຍການເປັນຕະຫລາດ ແລະ ຖານການຜະລິດໜຶ່ງດຽວ, ສືບຕໍ່ເປີດກວ້າງດ້ານການລົງທຶນຢ່າງແຂງແຮງພາຍໃນ ແລະ ພາຍນອກພາກພື້ນ.

ມາດຕະການເຊື່ອຈອດດ້ານລະບຽບຫລັກການ ເຊິ່ງລວມທັງການອຳນວຍຄວາມສະດວກດ້ານການຄ້າເຊັ່ນ: ສາງເກັບສິນຄ້າອາຊຽນ ແລະ ສາງເກັບສິນຄ້າແຫ່ງຊາດ. ອາຊຽນຍັງສືບຕໍ່ຫລຸດຜ່ອນບັນດາສິ່ງກີດຂວາງທີ່ບໍ່ແມ່ນອັດຕາພາສີ ເພື່ອສົ່ງເສີມການຄ້າ ແລະ ການລົງທຶນຂອງອາຊຽນໃຫ້ມີມາດຕະຖານເປັນອັນໜຶ່ງອັນດຽວກັນ ແລະ ມີຄວາມສອດຄ່ອງກັນຂອງຂັ້ນຕອນການກວດກາລະຫວ່າງປະເທດສະມາຊິກອາຊຽນ.

ການປັບປຸງການເຊື່ອມຕໍ່ເພື່ອສ້າງໃຫ້ອາຊຽນເປັນປະຊາຄົມຕາມທິດຂອງປະຊາຊົນ ແລະ ປະຊາຊົນເປັນແກນກາງລວມມີບັນດາຂໍ້ລິເລີ່ມ ແລະ ກາລະໂອກາດທີ່ໃຫ້ປະຊາຊົນອາຊຽນໄດ້ຮຽນຮູ້ວັດທະນະທຳ ແລະ ຄວາມເປັນກັນເອງ ເພື່ອສ້າງເປັນໂອກາດໃຫ້ເຂົາເຈົ້າຮູ້ຈັກກັນດີຂຶ້ນ. ບັນດາຂໍ້ລິເລີ່ມໃນການສົ່ງເສີມໄປມາຫາສູ່ກັນສະດວກສະບາຍກວ່າເກົ່າໂດຍຜ່ານການຫລຸດຜ່ອນຂັ້ນຕອນການອອກວີຊາ, ສັນຍາຫລາຍຝ່າຍວ່າດ້ວຍການເປີດເສລີດ້ານການບໍລິການທາງອາກາດກໍຄືສັນຍາຮັບຮູ້ເຊິ່ງກັນ ແລະ ກັນ, ຂໍ້ລິເລີ່ມດ້ານການສຶກສາເຊັ່ນ: ການແລກປ່ຽນນັກສຶກສາ, ໂຄງການແລກປ່ຽນນັກສຶກສາອາຊຽນ ແລະ ຫລັກສູດການສຶກສາກ່ຽວກັບອາຊຽນ ແນໃສ່ສົ່ງເສີມເອກະລັກຂອງພາກພື້ນອາຊຽນ. ຕົວຢ່າງບັນດາປະເທດສະມາຊິກອາຊຽນກຳລັງສົ່ງເສີມການນຳໃຊ້ຫລັກສູດການຮຽນ-ການສອນອາຊຽນສຳລັບໂຮງຮຽນຊັ້ນປະຖົມ ແລະ ມັດທະຍົມຕອນຕົ້ນ ເພື່ອເພີ່ມເສີມໃຫ້ແກ່ປຶ້ມຮຽນທີ່ມີໃນປັດຈຸບັນກ່ຽວກັບອາຊຽນ.

ປັດຈຸບັນອາຊຽນກຳລັງຮ່າງວາລະການເຊື່ອມຈອດອາຊຽນຫລັງປີ 2015 ອາຊຽນຈະມີການທົບທວນ ແລະ ກຳນົດມາດຕະການຕ່າງໆ ເພື່ອລະດົມຊັບພະຍາກອນ ລວມທັງການຊອກຫາແຫລ່ງທຶນໃໝ່ ແລະ ການເສີມສ້າງຄວາມເຂັ້ມແຂງຂອງກົນໄກລະບຽບຫລັກການ, ການບໍລິຫານ ແລະ ການປະສານງານກັບພາກສ່ວນກ່ຽວຂ້ອງລວມທັງພາກທຸລະກິດ, ອົງການຈັດຕັ້ງທີ່ບໍ່ສັງກັດລັດຖະ ບານ ແລະອົງການຈັດຕັ້ງທາງສັງຄົມ.

ເວົ້າລວມແລ້ວ, ການເຊື່ອມຈອດດ້ານພື້ນຖານໂຄງລ່າງ, ດ້ານລະບຽບຫລັກການ ແລະ ການໄປມາຫາສູ່ຂອງປະຊາຊົນຈະສົ່ງເສີມການເຕີບໃຫຍ່ທາງເສດຖະກິດ, ຮັດແຄບຄວາມແຕກໂຕນດ້ານການພັດທະນາ, ພັດທະນາຄວາມສາມາດໃນການແຂ່ງຂັນຂອງພາກພື້ນ ແລະ ຮັດແໜ້ນການພົວພັນຂອງປະຊາຊົນທັງພາຍໃນ ແລະ ນອກອາຊຽນ. ການເຊື່ອມຈອດຢ່າງມີສີສັນ ແລະ ເຂັ້ມແຂງຂອງອາຊຽນເປັນສິ່ງຈຳເປັນ ເພື່ອໃຫ້ອາຊຽນກ້າວໄປສູ່ການເປັນພາກພື້ນທີ່ມີຄວາມສາມາດແຂ່ງຂັນ ແລະ ເຂັ້ມແຂງ, ມີການເຊື່ອມໂຍງກັບເສດຖະກິດສາກົນຢ່າງໝັ້ນຄົງ.