ລັດຖະມົນຕີ ປກສ ເນັ້ນຕໍ່ໜ້ານີ້ຕ້ອງຮັບປະກັນຄວາມສະຫງົບປອດໄພຂອງສັງຄົມຫລາຍກວ່າເກົ່າ

ພາບ-ຂ່າວ : ຫນັງສືພິມ ປກສ

ໃນໂອກາດໂອ້ລົມຕໍ່ກອງປະຊຸມວຽກງານປ້ອງກັນຄວາມສະຫງົບປະຈໍາປີ 2015 ເມື່ອບໍ່ດົນມານີ້ຂອງທ່ານລັດຖະມົນຕີວ່າການກະຊວງປ້ອງກັນຄວາມສະຫງົບພົນຕີ ສົມແກ້ວ ສີລາວົງ, ຊຶ່ງທ່ານໄດ້ເນັ້ນໃຫ້ຄະນະນໍາ-ຄະນະບັນຊາກໍາລັງ ປກສ ໃນທົ່ວປະເທດເພີ່ມທະວີຄວາມເອົາໃຈໃສ່ວຽກງານຮັກສາຄວາມເປັນລະບຽບຮຽບຮ້ອຍ ແລະ ປອດໄພໃນສັງຄົມໃຫ້ດີກວ່າເກົ່າ, ໂດຍສຸມໃສ່ສະກັດກັ້ນ ແລະ ແກ້ໄຂທຸກປາກົດການຫຍໍ້ທີ່ຈະເກີດຂຶ້ນໃນສັງຄົມໃຫ້ວ່ອງໄວທັນການ, ໂດຍສະເພາະປາກົດ ການທີ່ມີລັກສະນະຮ້າຍແຮງ ແລະ ສ້າງຄວາມຢ້ານກົວໃຫ້ແກ່ປະຊາຊົນເຊັ່ນ: ຢາເສບຕິດ, ປຸ້ນຈີ້-ຊິງຊັບ, ຂີ້ລັກງັດແງະ, ຄາດຕະກໍາ, ກຸ່ມແກ້ງກວນເມືອງ, ນັກເລງອັນຕະພານ, ການພະນັນເຖື່ອນ, ການຄ້າມະນຸດ, ຍັກຍອກຊັບ, ສໍ້ໂກງຊັບ,

ການສໍ້ລາດບັງຫລວງແລະ ອຸປະຕິເຫດຕ່າງໆ, ສະນັ້ນ ເພື່ອຮັບປະ ກັນໃຫ້ວຽກງານມິຜົນສໍາເລັດສູງ, ກ່ອນອື່ນຄະນະນໍາ-ຄະນະບັນຊາຕ້ອງເອົາໃຈໃສ່ສ້າງ ແລະ ປັບປຸງວຽກງານແຫລງຂ່າວໃຫ້ມີຄຸນນະພາບ, ເກັບກໍາຂໍ້ມູນເປົ້າໝາຍຢ່າງຖືກຕ້ອງ ແລະ ລາຍງານໃຫ້ໜ່ວຍງານກ່ຽວຂ້ອງຮັບຮູ້ຢ່າງວ່ອງໄວ, ສ່ວນວຽກງານການດໍາເນີນຄະດີກໍຕ້ອງໃຫ້ຖືກຕາມຂັ້ນຕອນຂອງລະບຽບກົດໝາຍເພື່ອຫລີກເວັ້ນຫາງສຽງຕ່າງໆທີ່ມີຜົນກະທົບອັນບໍ່ດີຕໍ່ກໍາລັງ ປກສ ພ້ອມກັນນັ້ນກໍສືບຕໍ່ຫັນເອົາກໍາລັງລົງກໍ່ສ້າງຮາກຖານໃຫ້ຫລາຍເພື່ອປັບປຸງວຽກງານປກສຢູ່ບັນດາທ້ອງ ຖິ່ນມີຄວາມເຂັ້ມແຂງ ແລະ ສາມາດສະກັດກັ້ນ ແລະ ແກ້ໄຂບັນດາປາກົດການຫຍໍ້ທໍ້ທີ່ເກີດຂຶ້ນໄດ້ຢ່າງທັນການ.