ຝືກອົບຮົມຜູ້ຮັບສະໝັກເລືອກຕັ້ງ ສສຊ ຊຸດທີ VIII

ວັນທີ 17 ກຸມພານີ້, ສະພາແຫ່ງຊາດໄດ້ຈັດຝືກອົບຮົມໃຫ້ຜູ້ຮັບສະໝັກເລືອກຕັ້ງສະມາຊິກສະພາແຫ່ງຊາດຊຸດທີ VIII ແລະ ສະພາປະຊາຊົນຂັ້ນແຂວງ, ນະຄອນຫຼວງຫຼາຍກ່າວ 600 ທ່ານເຂົ້າຮ່ວມ, ຂຶ້ນທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ດຣ ໄຊສົມພອນ ພົມວິຫານ ກຳມະ ການກົມການເມືອງສູນກາງພັກ, ຮອງປະທານສະພາແຫ່ງຊາດ, ທັງນີ້ກໍເພື່ອກຽມຄວາມພ້ອມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ VIII ແລະ ສະພາປະຊາຊົນຂັ້ນແຂວງ, ນະຄອນຫຼວງໃນທົ່ວປະເທດທີ່ຈະມີຂຶ້ນໃນວັນທີ 20 ມີນານີ້ ບັນລຸຜົນສຳເລັດສູງ ແລະ ເປັນການແລກປ່ຽນບົດຮຽນ ແລະ

ປະສົບການຕ່າງໆນຳກັນເພື່ອຈະຊ່ວຍໃຫ້ຜູ້ຮັບສະໝັກເລືອກຕັ້ງຜູ້ແທນຊຸດນີ້ລົງໄປໂຄສະນາຫາສຽງຖືກຕ້ອງຕາມລະບຽບຫຼັກການ ແລະ ເຂົ້າໃຈເລີກເຊິ່ງຕື່ມກ່ຽວກັບກົດໝາຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນແຂວງ, ນະຄອນຫຼວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ນະຄອນຫຼວງ, ການເຊື່ອມໂຍງບົດບາດຍິງ-ຊາຍໃນສະພາແຫ່ງຊາດ, ຄວາມສຳຄັນໃນການເພີ່ມທະວີຕົວແທນເພດຍິງໃນເວທີການເມືອງ, ຊຶ່ງມາຮອດປັດຈຸບັນພັກ ແລະ ລັດຖະບານເຮົາໄດ້ມີນະໂຍບາຍຊັດເຈນໃນການຊຸກຍູ້ສົ່ງເສີມຄວາມສະເໝີພາບລະຫວ່າງຍິງ-ຊາຍ, ໂດຍໄດ້ກຳນົດໄວ້ຢ່າງຈະແຈ້ງວ່າ: ການບັນຈຸຊັບຊ້ອນເພດຍິງເຂົ້າໃນຕຳແໜ່ງງານຂັ້ນຕ່າງໆຂອງຂະແໜງການໃຫ້ໄດ້ 15 %, ຄຽງຄູ່ກັນນັ້ນກໍຈະໄດ້ພ້ອມກັນແລກປ່ຽນບົດຮຽນກ່ຽວກັບເຕັກນິກ ແລະ ວິທີໂຄສະນາຫາສຽງ, ການດຳເນີນການປ່ອນບັດ, ການນັບຄະແນນສຽງ ແລະ ແຜນການເຄື່ອນໄຫວຂອງສະພາແຫ່ງຊາດຊຸດທີ VIII ຢ່າງມີຜົນສຳເລັດ.

ທ່ານປະທານກອງປະຊຸມເນັ້ນວ່າ: ເນື່ອໃນຕ່າງໆຂອງການຝຶກອົບຮົມຄັ້ງນີ້, ລ້ວນແຕ່ມີຄວາມໝາຍສຳຄັນສຳລັບການເລືອກຕັ້ງ ເຊິ່ງຮຽກຮ້ອງໃຫ້ທຸກທ່ານຈົ່ງສຸມຈິດສຸມໃຈດ້ວຍຄວາມຮັບຜິດຊອບສູງ ເພື່ອເປັນຂໍ້ມູນສຳລັບການລົງໄປເຮັດວຽກຕົວຈິງໃນເວລາອັນໃກ້ໆນີ້ ແລະ ຫວັງວ່າທຸກທ່ານຈະເຊີນຊູຄວາມຮັບຜິດຊອບເຮັດໃຫ້ການຝຶກອົບຮົມຄັ້ງນີ້ສຳເລັດຕາມລະດັບຄາດໝາຍ.