ສະຫາຍເລຂາທິການໃຫຍ່ເຄື່ອນໄຫວຊຸກຍູ້ການພັດທະນາເສດຖະກິດຢູ່ ແຂວງວຽງຈັນ

          ໃນວັນທີ 17 ກຸມພານີ້, ສະຫາຍ ບຸນຍັງ ວໍລະຈິດ ເລຂາ ທິການໃຫຍ່ພັກປະຊາຊົນປະຕິ ວັດລາວໄດ້ລົງເຄື່ອນໄຫວຢ້ຽມຢາມ ແລະ ພົບປະຄະນະພັກ ແລະ ອຳນາດການປົກຄອງແຂວງວຽງຈັນ, ເພື່ອຊຸກຍູ້ການພັດທະນາເສດຖະກິດ-ສັງຄົມຢູ່ແຂວງດັ່ງກ່າວ, ໂດຍໄດ້ຮັບການຕ້ອນຮັບ ຈາກສະ ຫາຍ ວິດົງ ໄຊຍະສອນ ເລຂາພັກແຂວງ, ເຈົ້າແຂວງໆວຽງຈັນພ້ອມດ້ວຍຄະນະ.

ສະຫາຍ ວິດົງ ໄຊຍະສອນ, ໄດ້ລາຍງານສະພາບການພັດທະ ນາເສດຖະກິດ-ສັງຄົມໃນໄລຍະ 1 ຜ່ານມາໂດຍຫຍໍ້ວ່າ: ເສດຖະກິດພາຍໃນແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ໃນນັ້ນລວມຍອດຜະລິດຕະພັນພາຍໃນ GDP ບັນລຸເຖິງ 5.318 ຕື້ກວ່າກີບ ຫລື ປະມານ 8,02% ຕໍ່ປີ; ລາຍຮັບສະ ເລ່ຍຕໍ່ຫົວຄົນໄດ້ 12 ລ້ານກີບຕໍ່ຄົນຕໍ່ປີ, ໂຄງປະກອບເສດຖະກິດ ມີການ

ປ່ຽນແປງໄປຕາມທິດການຜະລິດກະສິກຳຕິດພັນກັບອຸດສາຫະກຳ ແລະ ການບໍລິການເທື່ອລະກ້າວ. ດ້ານງົບປະມານການເກັບລາຍຮັບໄດ້ 207 ຕື້ກວ່າກີບ, ລາຍຈ່າຍປະຕິບັດໄດ້ 571 ຕື້ກວ່າກີບ, ການສົ່ງເສີມການຜະລິດເປັນສິນຄ້າ 1 ເມືອງ 1 ຜະລິດຕະພັນ (ODOP) ມີເຖິງ 10 ຜະລິດຕະພັນ ເປັນອັນດັບທີ 3 ຂອງບັນດາແຂວງໃນທົ່ວປະເທດ, ການກໍ່ສ້າງພື້ນຖານໂຄ່ງລ່າງພົ້ນເດັ່ນ ແມ່ນການກໍ່ສ້າງເທສະບານແຂວງ, ຂົວຂ້າມນ້ຳງື່ມ ແລະ ເສັ້ນທາງສາຍຍຸດທະສາດຈຳນວນໜຶ່ງ; ປັດຈຸບັນ ທົ່ວແຂວງສ້າງບ້ານພັດທະນາໄດ້ 190 ບ້ານເທົ່າກັບ 43,77% ຂອງບ້ານທົ່ວແຂວງ, ອັດຕາເຂົ້າຮຽນສຸດທິບັນລຸ 99,34% , ອັດຕານຳໃຊ້ນໍ້າສະອາດ 83.5% ແລະ ມີລາຍຮັບຈາກນັກທ່ອງທ່ຽວຫລາຍ 190 ຕື້ກີບ.

ໃນໂອກາດດັ່ງກ່າວ,  ສະຫາຍ ບຸນຍັງ ວໍລະຈິດ, ໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ຄະນະພັກ  ອຳນາດການປົກຄອງ ແລະ ພະນັກງານຫລັກແຫລ່ງຂອງແຂວງ ໃຫ້ເອົາໃຈໃສ່ໃນຫລາຍບັນຫາເປັນຕົ້ນການແກ້ໄຂໜີ້ສີນການລົງທຶນ, ການຄຸ້ມຄອງການລົງທຶນ, ການເກັບລາຍຮັບໃຫ້ສົມຄູ່ກັບທ່າແຮງຂອງແຂວງ, ຍູ້ແຮງການຜະລິດເປັນສິນຄ້າໃຫ້ຫລາຍໂດຍຕິດພັນກັບຕະຫລາດຈຳໜ່າຍ, ຍົກສູງຄຸນນະພາບ ຂອງການສຶກສາ, ສາທາລະນະສຸກ ແລະ ຂະຫຍາຍຕາໜ່າງດັ່ງກ່າວລົງສູ່ເຂດຊົນນະ ບົດ, ຂະຫຍາຍສູນຝຶກວິຊາຊີບ, ຄູຝຶກວິຊາຊີບເພື່ອສະໜອງສີມືແຮງງານໃຫ້ມີຄຸນນະພາບໃນຍຸກເຊື່ອມໂຍງ AEC, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ, ສ້າງພື້ນຖານປະຖົມປັດໄຈທີ່ດີ ເພື່ອກຽມຄວາມພ້ອມເຂົ້າສູ່ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ VIII ແລະ ສະມາຊິກສະພາຂັ້ນແຂວງໃຫ້ຮັບປະກັນ, ສ້າງສະຕິຊາດ, ສະຕິເປັນເຈົ້າໃຫ້ແກ່ປະຊາຊົນ ໂດຍເຊີດຊູນ້ຳໃຈຮັກຊາດຮັກບ້ານເກີດເມືອງນອນແກ່ປະຊາຊົນບັນດາເຜົ່າ ເພື່ອນຳພາແຂວງວຽງຈັນ ກ້າວຂຶ້ນສູ່ຄວາມຮຸ່ງເຮືອງສີວິໄລຂຶ້ນເປັນກ້າວໆ.