ລາວສືບຕໍ່ຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກຢ່າງເຕັມສ່ວນ

          ໃນວັນທີ 25 ມີນານີ້, ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໄດ້ຈັດກອງປະຊຸມ ເປີດຂະບວນການ ເພື່ອການຂຽນບົດລາຍງານແຫ່ງຊາດ ສະບັບທີ 3-6 ໃນການຈັດຕັ້ງປະຕິບັດ ສົນທິສັນ ຍາວ່າດ້ວຍສິດທິເດັກໃນລາວ, ໂດຍການເຂົ້າຮ່ວມຂອງທ່ານ ລີຕູ້ ບົວປາວ ຮັກສາການປະທານ ຄະນະກຳມາທິການເພື່ອແມ່ ແລະ ເດັກແຫ່ງຊາດ, ທ່ານນາງ ຫົ້ງເວ້ ກ້າວ ຜູ້ຕາງໜ້າອົງການອຸຍນີແຊັບ ປະຈຳລາວ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.

          ຮັກສາການປະທານຄະນະກຳມາທິການເພື່ອແມ່ ແລະ ເດັກແຫ່ງຊາດກ່າວວ່າ: ເນື່ອງໃນໂອກາດຄົບຮອບ 25 ປີ ທີ່ລາວເຂົ້າເປັນພາຄີຂອງສົນທິສັນຍາ ວ່າດ້ວຍສິດທິເດັກຂອງອົງການສະຫະປະຊາຊາດ (ສສດ), ລັດຖະບານລາວ ໄດ້ເປີດຂະບວນການຮ່າງບົດລາຍງານ ໃນການຈັດຕັ້ງປະຕິບັດ ສົນທິສັນຍາ

ວ່າດ້ວຍສິດທິເດັກ ໄລຍະ 3-6 ເພື່ອສົ່ງໃຫ້ຄະນະກຳມະການສິດທິເດັກຂອງອົງການ ສະຫະປະຊາຊາດ ໃນທ້າຍປີນີ້, ດັ່ງນັ້ນການຮ່ວມມື ແລະ ການປະສານງານຂອງຄະນະກຳມາທິການເພື່ອແມ່ ແລະ ເດັກແຫ່ງຊາດ ແລະ ອົງການສະຫະປະຊາຊາດ ສຳລັບເດັກ ຈະຊ່ວຍໃຫ້ລາວ ມີຄວາມຄືບໜ້າໃນການສະໜັບສະໜູນ ແລະ ເຊີດຊູສິດທິຂອງເດັກໃນປະເທດ, ທັງເປັນການຕິດຕາມກວດກາການເຄື່ອນໄຫວຂອງເດັກໃຫ້ຫລາຍຂຶ້ນ, ພ້ອມເປັນການປົກປ້ອງ ແລະ ສົ່ງເສີມເດັກໃຫ້ມີອະນາຄົດທີ່ດີ. ນອກນີ້ ຍັງເຮັດໃຫ້ ສປປ ລາວ ໄດ້ບັນລຸເປົ້າໝາຍສະຫັດສະວັດກ່ຽວກັບການຫລຸດຜ່ອນອັດຕາສ່ວນການຕາຍຂອງແມ່, ການເຂົ້າຮຽນຊັ້ນປະຖົມຢ່າງສະເໝີພາບ ແລະ ການເຂົ້າເຖິງນໍ້າດື່ມທີ່ສະອາດ, ຊຶ່ງ ສປປ ລາວ ເຮົາ ຍັງມີສິ່ງທ້າທາຍຫລາຍປະການເຊັ່ນ: ບັນຫາການລະບາດຂອງພະຍາດໂປລີໂອ, ບັນຫາກ່ຽວກັບເດັກເຕ້ຍ, ບັນຫາກ່ຽວກັບການສຶກສາກ່ອນຊັ້ນປະຖົມ ແລະ ອື່ນໆ.

          ຜູ້ຕາງໜ້າອົງການ ສປຊ ສຳລັບເດັກ ໃຫ້ຮູ້ວ່າ: ຂະບວນການຂຽນບົດລາຍງານກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ມີຄວາມສຳຄັນຫລາຍ ຍ້ອນວ່າເປັນການເປີດໂອກາດໃນການທົບທວນຄືນກ່ຽວ ກັບຄຳໝັ້ນສັນຍາຕ່າງໆ ແລະ ເປັນການໂຄສະນາ ເຜີຍແຜ່ຄວາມຮູ້ກ່ຽວກັບສິດທິເດັກໃນ ສປປ ລາວ ແລະ ຍັງເປັນໂອກາດ ໃຫ້ເຫັນເຖິງບັນຫາ, ແຜນງານ ແລະ ການວາງແຜນໃນການປະຕິບັດໃນຕໍ່ໜ້າ. ການຮ່ວມມື ແລະ ປະສານງານດັ່ງກ່າວ, ໄດ້ເຮັດໃຫ້ສປປ ລາວ ມີຄວາມຄືບໜ້າໃນການເຊີດຊູສິດທິຂອງເດັກໃນປະເທດ, ຜົນສຳເລັດອັນສຳຄັນ ລວມມີແຜນພັດທະ ນາເສດຖະກິດສັງຄົມ ສະບັບທີ 7 (2011-2015) ໄດ້ກຳນົດໃຫ້ມີການສົ່ງເສີມ ປົກປ້ອງແມ່ຍິງ ແລະ ເດັກນ້ອຍ. ຄຽງຄູ່ກັນນັ້ນ, ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ທີ່ໄດ້ປະກາດໃຊ້ ໃນປີ 2007 ໄດ້ກຳນົດພາລະບົດບາດ  ແລະ ຄວາມຮັບຜິດຊອບຂອງລັດ ໃນການສົ່ງເສີມ ແລະ ປົກປ້ອງ ເຊິ່ງລັດຖະບານລາວ ໄດ້ເຂົ້າຮ່ວມເປັນພາຄີ ອະນຸສັນຍາຫລາຍອັນ ເປັນຕົ້ນແມ່ນ ສົນທິສັນຍາວ່າດ້ວຍສິດທິເດັກ ກ່ຽວກັບການຄ້າເດັກ, ການຄ້າປະເວນີເດັກ, ສິ່ງລາມົກ, ອານາຈານກ່ຽວກັບເດັກ ແລະ ອື່ນໆ.

          ນັບແຕ່ປີ 1990 ເປັນຕົ້ນມາ ການໃຊ້ຄວາມຮຸນແຮງຕໍ່ເດັກ ແລະ ແມ່ຍິງໄດ້ຫລຸດລົງເກືອບເຄິ່ງໜຶ່ງ ຊີວິດການເປັນຢູ່ຂອງເດັກ ປະມານ 3 ລ້ານຄົນ ໄດ້ຮັບການປັບປຸງດີຂຶ້ນ. ນອກນັ້ນ, ອັດຕາການຕາຍຂອງເດັກຕ່ຳກວ່າ 5 ປີ ໄດ້ຫລຸດລົງຈາກ 170 ຄົນ ຕໍ່ເດັກທີ່ເກີດ 1.000 ຄົນໃນປີ 1992 ເປັນ 79 ຄົນຕໍ່ເດັກທີເກີດ 1.000 ຄົນໃນປີ 2011 ໝາຍຄວາມວ່າ ໄດ້ຫລຸດລົງເຖິງ 54%, ເຖິງຢ່າງໃດກໍຕາມ ສປປ ລາວ ຍັງມີສິ່ງທ້າທ້າຍຫລາຍຢ່າງ ເຊັ່ນ: ບັນຫາໂລກລະບາດຂອງພະຍາດ, ບັນຫາເດັກເຕັ້ຍ ແລະ ການສຶກສາ ທີ່ພາກສ່ວນກ່ຽວຂ້ອງ ຕ້ອງໄດ້ເອົາໃຈໃສ່ປະຕິບັດໜ້າທີ່ ໃຫ້ມີປະສິດທິຜົນກວ່າເກົ່າ.