ອາຊຽນຫາລືການຫັນເສດຖະກິດນອກລະບົບໄປສູ່ໃນລະບົບ

ກອງປະຊຸມສຳມະນາອາຊຽນເພື່ອປຶກສາຫາລື ແລະ ຮ່າງຖະແຫລງການວຽງຈັນ ວ່າດ້ວຍການສົ່ງເສີມວຽກທີມີຄຸນຄ່າໂດຍລົງເລິກຫົວຂໍ້ເສດຖະກິດນອກລະບົບຫັນປຽ່ນໄປສູ່ໃນລະບົບທາງດ້ານແຮງງານຢູ່ອາຊຽນ, ຊຶ່ງ​ໄຂ​ຂຶ້ນ​ໃນ​ວັນ​ທີ 6 ​ເມສາ​ນີ້, ທີ່ແຂວງຫຼວງພະບາງ, ໂດຍການ​ເປັນ​ປະທານ​ຂອງທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງ​ແຮງ​ງານ ​ແລະ ສະຫວັດ​ດີກາ​ນສັງຄົມ ແລະ ທັງເປັນຫົວໜ້າເຈົ້າໜ້າທີ່ອາວຸໂສແຮງງານອາຊຽນຂອງລາວ ແລະ ມີ​ຜູ້​ແທນຈາກ​ບັນດາ​ປະ​ເທດ​ອາ​ຊຽນ​ເຂົ້າ​ຮ່ວມ​ເປັນ​ຈຳນວນ​ຫລາຍ ເພື່ອແລກປຽ່ນບົດຮຽນການຈັດຕັ້ງປະຕິບັດ ແຜນຍຸດທະສາດ ແລະ ນິຕິກຳຕ່າງໆ ກ່ຽວກັບການ

ເຮັດວຽກແຮງງານຢູ່ເສດຖະກິດນອກລະບົບ ແລະ ພ້ອມກັນຮ່າງຖະແຫຼງ ການວຽງຈັນວ່າດ້ວຍການສົ່ງເສີມວຽກທີມີຄຸນຄ່າໃນຫົວຂໍ້ທີ່ວ່າ: ການຫັນປຽ່ນໄປສູ່ເສດຖະ ກິດໃນລະບົບຢູ່ອາຊຽນ. ພ້ອມ​ນີ້​ຍັງ​ເປັນ​ການກະກຽມ ເພື່ອຈະນຳ​ໄປສະເໜີ​ໃນກອງປະຊຸມເຈົ້າໜ້າທີ່ອາວຸໂສແຮງງານອາຊຽນ ຄັ້ງທີ 12 ແລະ ກອງປະຊຸມລັດຖະມົນ ຕີແຮງງານອາຊຽນຄັ້ງທີ່ 24 ທີ່ຈະ​ໄດ້​ຈັດ​ຂຶ້ນ​ໃນນະຄອນຫຼວງວຽງຈັນ ໃນລະຫວ່າງວັນທີ 16-19 ພຶດສະພາ 2016ນີ້.

ທ່ານປະທານກອງຊຸມ ກ່າວວ່າ: ປັດຈຸບັນກຳລັງແຮງງານສ່ວນຫລາຍ ແມ່ນເຮັດ ວຽກຢູ່ຫົວໜ່ວຍແຮງງານ ແລະ ປະກອບອາຊີບໃນລັກສະນະຕ່າງໆ, ຊຶ່ງບໍ່ນອນຢູ່ໃນ ລະບົບເສດຖະກິດຂອງແຕ່ລະປະເທດ ເຮັດໃຫ້ນຳເອົາລະບຽບກົດໝາຍໄປບັງຄັບໃຊ້ ຫຼື ການເບິ່ງແຍງດູແລບໍ່ທັນທົ່ວ​ເຖິງ. ສະນັ້ນ, ​ເຖິງເວລາແລ້ວທີ່ຫລາຍປະເທດ​ ກໍ​ຄື​ອາ​ຊຽນຕ້ອງໄດ້ນຳເອົາບັນຫາດັ່ງກ່າວ​ໄປພິຈາລະນາເພື່ອຫັນໄປສູ່ການຮ່ວມມືກັບການ ຊ່ວຍເຫຼືອ ເຮັດໃຫ້ແຮງງານຢູ່ໃນລະບົບໄດ້ຮັບການເອົາໃຈໃສ່ປົກປ້ອງ ແລະ ຄຸ້ມຄອງຢ່າງ ສະເໝີພາບກັນ.