laophatthananewspaper: ນາຍົກລັດຖະມົນຕີ ທອງລຸນ ສີສຸລິດ ເນັ້ນຄະນະລັດຖະບານຕ້ອງເພີ່ມທະວີຄວາມຮັບຜິດຊອບໃຫ້ຫລາຍຂຶ້ນ

ໃນໂອກາດໂອ້ລົມຊີ້ນຳຕໍ່ກອງປະຊຸມຄະນະລັດຖະບານປະຈຳເດືອນພຶດສະພາ 2016 ຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ແຕ່ລະກະຊວງເພີ່ມທະວີຄວາມຮັບຜິດຊອບຂອງຕົນໃຫ້ສູງຂຶ້ນກວ່າເກົ່າ, ພາຍຫລັງເຫັນວ່າໃນປີນີ້ປະເທດເຮົາຈະມີເຫດການສຳຄັນເກີດຂຶ້ນ ຄືໄດ້ມອບໝາຍໃຫ້ກະຊວງປ້ອງກັນປະເທດເອົາໃຈໃສ່ເພີ່ມທະວີວຽກງານປ້ອງກັນຊາດ ເພື່ອຮັບປະກັນສະຖຽນລະພາບທາງດ້ານການເມືອງໃຫ້ໜັກແໜ້ນ, ຮັບປະກັນຄວາມປອດໄພທົ່ວປວງຊົນ ແລະ ຮອບດ້ານໃຫ້ແກ່ການທ່ອງທ່ຽວ, ການທຳມາຫາກິນຂອງປະຊາຊົນບັນດາເຜົ່າ ກໍຄືກອງປະຊຸມສຸດຍອດອາຊຽນປີ 2016, ໃຫ້ກະຊວງປ້ອງກັນຄວາມສະຫງົບເພີ່ມທະວີຄວາມເອົາໃຈໃສ່ສົມທົບກັບທຸກພາກ ສ່ວນ ແລະ ທ້ອງຖິ່ນເລັ່ງແກ້ໄຂບັນດາປາກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນບັນຫາຢາເສບຕິດ, ການປຸ້ນຈີ້-ຊິງຊັບ, ແກ໊ງກວນເມືອງ, ອຸປະຕິເຫດບົນທ້ອງຖະໜົນ ແລະ ອື່ນໆ, ໃຫ້ກະຊວງໂຍທາທິການ ແລະ

ຂົນສົ່ງ ສົມທົບກັບພາກສ່ວນກ່ຽວຂ້ອງເອົາໃຈໃສ່ແກ້ໄຂບັນຫາຈາລະຈອນແອອັດໃນຕົວເມືອງ, ການຈອດລົດຊະຊາຍ ເພື່ອຮັບປະກັນໃຫ້ແກ່ຜູ້ໃຊ້ລົດໃຊ້ຖະໜົນມີຄວາມປອດໄພ, ຫຼຸດຜ່ອນການເກີດອຸປະຕິເຫດ ແລະ ຫຼຸດຜ່ອນມົນລະພິດຂອງຕົວເມືອງ; ໃຫ້ກະຊວງກະສິກໍາ ແລະ ປ່າໄມ້ ສົມທົບກັບພາກສ່ວນກ່ຽວຂ້ອງ ກະກຽມຄວາມພ້ອມໃນການກ້າວເຂົ້າສູ່ການຜະລິດລະດູຝົນ, ລວມທັງການຕ້ານແລ້ງ-ຕ້ານຖ້ວມ, ການຕ້ານ ແລະ ກໍາຈັດສັດຕູພືດ ແລະ ບັນຫາອື່ນໆໄວ້ແຕ່ຫົວທີ ແລະ ໃນເດືອນມິຖຸນາຈະມີວັນສໍາຄັນຕ່າງໆ ເປັນຕົ້ນວັນເດັກນ້ອຍສາກົນ, ວັນປູກຕົ້ນໄມ້ແຫ່ງຊາດ, ວັນສິ່ງແວດລ້ອມໂລກ ຈຶ່ງມອບໃຫ້ກະຊວງກະສິກໍາ ສົມທົບກັບພາກສ່ວນກ່ຽວຂ້ອງ ເພື່ອກະກຽມໃຫ້ທຸກພາກສ່ວນຈັດຕັ້ງການປູກຕົ້ນໄມ້ຢ່າງເປັນຂະບວນ ແລະ ໃຫ້ມີບັນຍາກາດຟົດຟື້ນທົ່ວປວງຊົນ ໂດຍເນັ້ນໃສ່ປູກຈິດສໍານຶກໃຫ້ເດັກນ້ອຍຮູ້ຈັກອະນຸລັກຮັກສາປ່າໄມ້, ແຫຼ່ງນໍ້າ ແລະ ຊີວະນາໆພັນ ແລ້ວລາຍງານໃຫ້ລັດຖະບານຮັບຊາບ; ໃຫ້ກະຊວງສຶກສາທິການ ແລະ ກິລາ ເອົາໃຈໃສ່ຕໍ່ການສອບເສັງຈົບຊັ້ນຂັ້ນຕ່າງໆໃຫ້ໄດ້ດີ ແລະ ມີປະສິດທິຜົນ ແລະ ສ້າງກິດຈະກໍາຕ່າງໆໃຫ້ແກ່ນັກຮຽນ-ນັກສຶກສາ ໃນຍາມພັກແລ້ງນີ້ໃຫ້ມີການເຄື່ອນໄຫວຢ່າງຕໍ່ເນື່ອງ ເພື່ອເຮັດໃຫ້ພວກລູກຫຼານຂອງພວກເຮົາຫ່າງໄກຈາກສິ່ງເສບຕິດ ແລະ ສິ່ງຫຍໍ້ທໍ້ຕ່າງໆ; ໃຫ້ກະຊວງການຕ່າງປະເທດ ສ້າງແຜນການເຄື່ອນໄຫວໃຫ້ແກ່ຜູ້ນໍາພັກ-ລັດໃນການເດີນທາງໄປເຄື່ອນໄຫວວຽກງານການຕ່າງປະເທດ, ການເຂົ້າຮ່ວມກອງປະຊຸມສາກົນຕ່າງໆ, ເອົາໃຈໃສ່ກະກຽມການເປັນປະທານກອງປະຊຸມອາຊຽນ ແລະ ການກະກຽມຕ້ອນຮັບບັນດາປະມຸກລັດ, ຫົວໜ້າຄະນະຜູ້ແທນຂັ້ນສູງຂອງບັນດາປະເທດເພື່ອນມິດທີ່ຈະເດີນທາງມາເຂົ້າຮ່ວມກອງປະຊຸມສຸດຍອດອາຊຽນ; ໃຫ້ກະຊວງອຸດສາຫະກໍາ-ການຄ້າ ເອົາໃຈໃສ່ຄວບຄຸມລາຄາສິນຄ້າຕາມທ້ອງຕະຫຼາດ ເພື່ອບໍ່ໃຫ້ມີການສວຍໂອກາດຂຶ້ນລາຄາສິນຄ້າອຸປະໂພກ-ບໍລິໂພກທີ່ນໍາເຂົ້າຈາກຕ່າງປະເທດຄວນມີກາໝາຍສະຕິກເກີ ເພື່ອຫັນເຂົ້າສູ່ລະບຽບ ເຮັດໃຫ້ສາມາດຄຸ້ມຄອງ ແລະ ສ້າງລາຍຮັບເພີ່ມ; ໃຫ້ກະຊວງພະລັງ ແລະ ບໍ່ແຮ່, ກະຊວງແຜນການ ແລະ ການລົງທຶນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເອົາໃຈໃສ່ຕິດຕາມບັນດາໂຄງການກໍ່ສ້າງເຂື່ອນໄຟຟ້າ ແລະ ໂຄງການຂຸດຄົ້ນບໍ່ແຮ່ທີ່ໄດ້ຮັບການອະນຸມັດແລ້ວ ແລະ ໂຄງການທີ່ສະເໜີໃໝ່ ວ່າມີຄວາມຄືບໜ້າແນວໃດ ແລະ ລັດຖະບານຈະມີຜົນໄດ້ຜົນເສຍແນວໃດຕໍ່ໂຄງການສະເໜີມາໃໝ່ ແລ້ວໃຫ້ລາຍງານຄວາມຄືບໜ້າຕໍ່ລັດຖະບານຢ່າງເປັນປະຈໍາ; ໃຫ້ກະຊວງສາທາລະນາສຸກ ເອົາໃຈໃສ່ເຝົ້າລະວັງ ແລະ ສະກັດກັ້ນພະຍາດລະບາດ ເປັນຕົ້ນຖອກທ້ອງ, ໄຂ້ເລືອດອອກ, ໄຂ້ທໍລະພິດ ແລະ ເອົາໃຈໃສ່ກວດກາສານປົນເປື້ອນໃນອາຫານ ແລະ ໃຫ້ກະຊວງຍຸຕິທໍາ ເອົາໃຈໃສ່ສົມທົບກະຊວງຕ່າງໆ ກະກຽມໃຫ້ດີການສ້າງ ແລະ ປັບປຸງຮ່າງກົດໝາຍຈໍານວນໜຶ່ງ ເພື່ອນໍາສະເໜີຜ່ານລັດຖະບານໃນເດືອນກໍລະກົດ ເພື່ອຈະໄດ້ນໍາສະເໜີຜ່ານກອງປະຊຸມສະໄໝສາມັນຂອງສະພາແຫ່ງຊາດ ໃນເດືອນຕຸລາປີນີ້.