ທ່ານ ພັນໂທ ຫົງຄຳ ຫອມສົມບັດ ຫົວໜ້າພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ນະຄອນຫລວງວຽງຈັນ ໃຫ້ຮູ້ວ່າ: ເມື່ອບໍ່ດົນມານີ້, ເຈົ້າໜ້າທີ່ຂອງຕົນສາມາດມ້າງເຄືອຂ່າຍຂະບວນການຄ້າຂາຍຢາເສບຕິດຕົວອັນຕະລາຍ ຢູ່ເຮືອນເຊົ່າຫລັງໜຶ່ງເຂດບ້ານຕານມີໄຊ
ເມືອງໄຊທານີ ນະຄອນ ຫລວງວຽງຈັນ ແລະ ສາມາດຈັບຜູ້ຕ້ອງຫາໄດ້ຫລາຍຄົນ ຄືທ້າວ ເມັງວາງ ອາຍຸ
28 ປີ ຢູ່ບ້ານໂຮງເລື່ອຍ ເມືອງໂພນໂຮງ ແຂວງວຽງຈັນ, ນາງ ປາຢາ ອາຍຸ
19 ປີ ຢູ່ເມືອງໜອງແຮດ ແຂວງຊຽງຂວາງ, ທ້າວ ຄຳມີ ອາຍຸ
24 ປີ ຢູ່ບ້ານໂພໄຊ
ເມືອງຊຳເໜືອ ແຂວງຫົວພັນ, ນາງ ເຊຍຊົງ ອາຍຸ 20 ປີ ຢູ່ບ້ານ
ໜອງສອງຫ້ອງ ເມືອງໄຊທານີ ນະຄອນຫລວງວຽງຈັນ ແລະ ນາງ
ເນັ່ງທໍ່ ອາຍຸ 21 ປີ ຢູ່ບ້ານຫ້ວຍຊຳອໍ້ ເມືອງ ແລະ ແຂວງໄຊຍະບູລີ ພ້ອມຂອງກາງຢາບ້າຈຳນວນ 156.000 ເມັດ, ເຮໂຣອິນ 58 ແທ່ງ, ປືນສັ້ນ 1 ກະບອກ ພ້ອມກະສູນຈຳນວນໜຶ່ງ, ລົດເກງໝາຍເລກທະບຽນ ກສ
9841 ກຳແພງນະຄອນ, ລົດຈັກ 2 ຄັນ ຈຶ່ງໄດ້ຍຶດໄວ້ເປັນຫລັກຖານເພື່ອດຳເນີນຄະດີ.
ຜ່ານການສືບສວນ-ສອບສວນຂອງເຈົ້າໜ້າທີ່, ທ້າວ ເມັງວາງ ຮັບສາລະພາບວ່າ: ຢາເສບຕິດທັງໝົດເປັນຂອງຕົນແທ້ ເພື່ອຈະເອົາໄປສົ່ງໃຫ້ເຄືອຂ່າຍຢາເສບຕິດໃນປະເທດໃກ້ຄຽງ ເຊິ່ງຄະດີຢາເສບຕິດລາຍນີ້ຍັງຢູ່ໃນຂັ້ນຕອນການຂະຫຍາຍຜົນຫາຜູ້ຮ່ວມຂະບວນການ ເພື່ອຈັບຕົວມາດຳເນີນຄະດີຕາມລະບຽບກົດໝາຍໂດຍໄວ.
No comments:
Post a Comment