ກຳມະບານກະຊວງການເງິນເລືອກຕັ້ງຄະນະບໍລິຫານງານຊຸດໃໝ່

          ກອງປະຊຸມໃຫຍ່ຄັ້ງທີ IV ຂອງສະຫະພັນກຳມະບານກະຊວງການເງິນ, ໄດ້ໄຂຂຶ້ນໃນຕອນເຊົ້າວັນທີ 3 ມີຖຸນານີ້, ທີ່ນະຄອນຫລວງວຽງຈັນ, ເພື່ອສະຫລຸບຕີລາຄາວຽກງານ ແລະ ເລືອກຕັ້ງຄະນະບໍລິຫານງານຊຸດໃໝ່, ພ້ອມວາງແຜນດຳເນີນງານໃນສົກປີໃໝ່ຂອງຕົນ, ໂດຍການໃຫ້ກຽດເຂົ້າຮ່ວມຂອງທ່ານ ສົມດີ ດວງດີ ກຳມະການສູນກາງພັກ, ເລຂາຄະນະພັກກະຊວງການເງິນ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ.

ທ່ານ ສີລາ ວຽງແກ້ວ ປະທານສະຫະພັນກຳມະບານກະຊວງ ໄດ້ຂຶ້ນຜ່ານບົດລາຍງານການເມືອງຂອງຄະນະບໍລິຫານງານສະຫະພັນກຳມະບານຂອງຕົນ ໃນໄລຍະ 5 ປີຜ່ານມາ, ຄະນະສະຫະພັນກຳມະ ບານກະຊວງ ໄດ້ເປັນເຈົ້າການໃນການຈັດຕັ້ງປະຕິບັດວຽກງານຕົວຈິງຂອງຕົນ ໂດຍສະເພາະການຈັດຕັ້ງປະຕິບັດຂໍ້ແຂ່ງຂັນ 2 ດີ 5 ເປັນເຈົ້າ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ ເຮັດໃຫ້ສະມາຊິກສະຫະພັນກຳມະບານກະຊວງການເງິນ ມີຄວາມຕັ້ງໜ້າຈັດຕັ້ງປະຕິບັດຢ່າງເປັນຂະບວນ, ຊຶ່ງສະແດງອອກໃນສາມປີຊ້ອນຂອງສົກງົບປະມານ 2009-2012 ສາມາດປະຕິບັດລາຍຮັບໄດ້ລື່ນແຜນການງົບປະມານ ແລະ ສົກປີ 2012-2014, ເຖິງແມ່ນວ່າສະພາບແວດລ້ອມຂອງທຳມະຊາດ ແລະ ເສດຖະກິດຂອງພາກພື້ນ ແລະ ສາກົນມີຫລາຍສິ່ງຫລາຍຢ່າງທີ່ບໍ່ອຳນວຍ ແຕ່ສະມາຊິກກຳມະບານ ກະຊວງກໍໄດ້ພ້ອມກັນສູ້ຊົນປະຕິບັດໜ້າທີ່ການເມືອງຂອງຕົນ ສາມາດເກັບລາຍຮັບໄດ້ 96% ຂອງແຜນການປີ, ສຳລັບສົກປີ 2014-2015 ສູ້ຊົນໃຫ້ບັນລຸ 95% ຂຶ້ນໄປ.

          ໃນໂອກາດນີ້, ຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມແນະນຳບາງບັນຫາຄື: ຕ້ອງເອົາໃຈໃສ່ສົ່ງເສີມຜູ້ມີຄວາມຮູ້ ຄວາສາມາດ, ມີຜົນງານດີເດັ່ນ, ພ້ອມນັ້ນ ກໍມີມາດຕະການເດັດຂາດ ຕໍ່ພະນັກງານ-ສະມາຊິກທີ່ເສຍທາດຂາດຄຸນ, ລະເມີດລະບຽບກົດໝາຍ, ມີພຶດຕິກຳ, ສໍ້ລາດບັງຫລວງ, ກິນສິນບົດນ, ຕ້ອງແກ້ໄຂໃຫ້ທັນເວລາ, ເພີ່ມທະວີການຊີ້ນຳ-ນຳພາ, ເສີມຂະຫຍາຍສິດເປັນເຈົ້າຂອງມະຫາຊົນ, ປະ ຕິບັດຫລັກການລວມສູນປະຊາທິປະໄຕ ມີຄວາມເປັນເອກກະພາບໃນໜູ່ຄະນະ, ນຳພາປະຕິບັດວຽກງານແຕ່ລະໄລຍະຕ້ອງມີການຕິດຕາມ, ກວດກາ, ຕີລາຄາປະເມີນຜົນ, ສະຫລຸບທອດຖອນບົດຮຽນ ແລະ ລາຍງານໃຫ້ຄະນະພັກຂັ້ນເທິງເປັນປົກກະຕິ, ເອົາໃຈໃສ່ຍົກສູງຄຸນນະພາບການສຳຫລວດກວດກາ, ເອົາໃຈໃສ່ການຕິຊົມຕົນເອງ ແລະ ຕິຊົມກັນໃຫ້ໜັກແໜ້ນ ເພື່ອເລັ່ງປັບປຸງສະມາຊິກຳມະບານໃຫ້ມີຄວາມເຂັ້ມແຂງ, ພ້ອມທັງເອົາໃຈໃສ່ປັບປຸງກໍ່ສ້າງໜ່ວຍກຳມະບານ ແລະ ສະມາຊິກໃຫ້ມີຄວາມເຂັ້ມແຂງໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາໃຫ້ຖືກ, ບຳລຸງຍົກລະດັບດ້ານທິດສະດີການເມືອງ ແລະ ວິຊາສະເພາະ ໃຫ້ເປັນປະຈຳ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານໃນໄລຍະໄໝ່.