ບົດຮຽນຂອງບາງປະເທດໃນການປົກປ້ອງ ແລະ ສົ່ງເສີມສິດທິຂອງເດັກ ( ຄໍລຳ ເບິ່ງກວ້າງເຫັນໄກ )

# ວິເສດ ສະແຫວງສຶກສາ

    ເພື່ອໃຫ້ເຂົ້າກັບບັນຍາກາດວັນເດັກສາກົນປະຈຳປີນີ້, ຜູ້ຂຽນໄດ້ທ້ອນໂຮມເອົາບາງບົດຮຽນກ່ຽວກັບມາດຕະການ ແລະ ນະໂຍບາຍປົກປ້ອງສິດ-ຜົນປະໂຫຍດ ແລະ ຄວາມກ້າວໜ້າຂອງເດັກຢູ່ປະເທດຈຳນວນໜຶ່ງມາສະເໜີໃຫ້ພວກເຮົາຊາບນຳກັນ ເຊັ່ນເລື່ອງທີໜຶ່ງແມ່ນກ່ຽວກັບ ສ.ເກົາຫລີ ວາງແຜນຫລຸດຜ່ອນຄວາມແອອັດໃນຫ້ອງຮຽນຂັ້ນມັດທະຍົມ ເພື່ອຮັບປະກັນຄຸນນະພາບໃນການຮຽນຂອງເດັກນັກຮຽນ. ໃນປັດຈຸບັນ ໂດຍສະເລ່ຍແລ້ວຫ້ອງຮຽນ 1 ຫ້ອງໃນຂັ້ນມັດທະຍົມຢູ່ ສ.ເກົາຫລີ ມີນັກຮຽນປະມານ 30 ຄົນ, ສ່ວນຕົວເລກສະເລ່ຍຂອງຈຳນວນນັກຮຽນຕໍ່ຫ້ອງຮຽນໃນບັນດາປະເທດອື່ນໆທີ່ເປັນສະມາຊິກອົງການຮ່ວມມືທາງເສດຖະກິດ ແລະ ການພັດທະນາ (OECD) ນັ້ນມີພຽງ 24 ຄົນ. ແຜນການຫລຸດສະພາບແອອັດໃນຫ້ອງຮຽນນີ້ ສ.ເກົາຫລີ ຈະປະຕິບັດໃຫ້ໄດ້ພາຍໃນປີ 2022. ພ້ອມດຽວກັນນັ້ນ ກໍຈະຫລຸດຈຳນວນນັກຮຽນຕໍ່ຄູ-ອາຈານຈາກຈຳນວນນັກຮຽນ 16,6 ຄົນ ລົງມາເປັນ 13,3 ຄົນຕໍ່ຄູ 1 ຄົນ. ສະພາບແອອັດໃນຫ້ອງຮຽນ ແລະ ການແບກຫາບນັກຮຽນຈຳນວນຫລວງຫລາຍຕໍ່ຄູ 1 ຄົນນັ້ນ ແມ່ນ

ອຸປະສັກທ່ວງດຶງຄຸນນະພາບ ແລະ ບັນຍາກາດໃນການສຶກສາຮໍ່າຮຽນຂອງເດັກນັກຮຽນ. ສ່ວນຢູ່ ສປ ຈີນ ນັ້ນມີສອງເລື່ອງທີ່ໜ້າສົນໃຈກ່ຽວກັບການເບິ່ງແຍງເດັກ ແລະ ການສົ່ງເສີມການສຶກສາຂອງເດັກ. ຫວ່າງບໍ່ດົນມານີ້, ລັດຖະບານ ສປ ຈີນ ໄດ້ອອກຄຳສັ່ງແນະນຳບໍ່ໃຫ້ຜູ້ເປັນພໍ່ເປັນແມ່ປ່ອຍປະລະເລີຍພວກລູກໆໄວ້ຢູ່ເບື້ອງຫລັງຕາມລຳພັງເວລາພວກຕົນອອກໄປຊອກວຽກເຮັດງານທຳຢູ່ທ້ອງຖິ່ນອື່ນ. ຜ່ານມາມີກໍລະນີພໍ່-ແມ່ ເຊິ່ງເປັນແຮງງານເຄື່ອນທີ່ປະຖິ້ມລູກໆໄວ້ເບື້ອງຫລັງ ໂດຍບໍ່ຫົວຊາເບິ່ງແຍງ ແລະ ໃຫ້ການສຶກສາ. ຄຳສັ່ງແນະນຳລະບຸແຈ້ງວ່າ: ພໍ່-ແມ່ຄົນໃດບໍ່ເບິ່ງແຍງລູກເຕົ້າເປັນປົກກະຕິຈະໄດ້ຮັບໂທດຕາມກົດໝາຍ ແລະ ວ່າ: ຜູ້ເປັນພໍ່-ແມ່ມີຄວາມຮັບຜິດຊອບຕົ້ນຕໍໃນການເບິ່ງແຍງລ້ຽງດູລູກເຕົ້າ, ສ່ວນລັດ ແລະ ສັງຄົມນັ້ນມີຄວາມຮັບຜິດຊອບເປັນສຳຮອງ. ອີກຂ່າວໜຶ່ງກ່ຽວກັບ ສປ ຈີນ ກໍຄືນັບແຕ່ປີ 2017 ເປັນຕົ້ນໄປ ນັກຮຽນຢູ່ໂຮງຮຽນເອກະຊົນທຸກແຫ່ງໃນຊັ້ນສາມັນສຶກສາພາກບັງຄັບ (9 ປີ) ຈະໄດ້ຮັບການຍົກເວັ້ນຄ່າຮຽນ ແລະ ຄ່າປຶ້ມຮຽນທັງໝົດ. ຜ່ານມາມີແຕ່ນັກຮຽນຢູ່ໂຮງຮຽນຂອງລັດເທົ່ານັ້ນທີ່ໄດ້ຮັບການຍົກເວັ້ນການໃຊ້ຈ່າຍດັ່ງກ່າວ. ນະໂຍບາຍນີ້ແນໃສ່ສົ່ງເສີມຄວາມສະເໝີພາບ ແລະ ຄວາມຍຸຕິທຳທີ່ເດັກນັກຮຽນທຸກຄົນມີສິດໄດ້ຮັບ ບໍ່ວ່າຈະເປັນຮຽນຢູ່ໂຮງຮຽນລັດ ຫລື ເອກະຊົນກໍຕາມ. ໄປພ້ອມໆກັນນັ້ນ ນັບແຕ່ປີນີ້ເປັນຕົ້ນໄປ, ລັດຖະບານ ສປ ຈີນ ໄດ້ສະໜອງງົບປະມານຂັ້ນພື້ນຖານຈຳນວນໜຶ່ງໃຫ້ທາງໂຮງຮຽນເພື່ອເປັນຄ່າແຮງງານຄູສອນ ແລະ ຄ່າສິ່ງເອື້ອອຳນວຍຕ່າງໆ ເພື່ອການຮໍ່າຮຽນຂອງເດັກນັກຮຽນ. ຢູ່ປະເທດບຣູໄນດາຣູຊາລາມ ໃນປີຜ່ານມາ (2015) ທາງກະຊວງສຶກສາທິການ ກໍໄດ້ອອກຄຳແນະນຳເຕືອນໃຫ້ຜູ້ເປັນພໍ່ແມ່ຂອງເດັກນັກຮຽນໃຫ້ເປັນເຈົ້າການຊ່ວຍເຫລືອພວກລູກໆໃນການກະກຽມການສອບເສັງປະຈຳປີ ເຊັ່ນຊ່ວຍໃນການບໍລິຫານເວລາ, ສຳລັບການກະກຽມ ແລະ ການພັກຜ່ອນຂອງເດັກໃຫ້ພຽງພໍ ແລະ ເລື່ອງອາຫານການກິນສຳລັບ ລູກໆ ແລະ ສຳຄັນກວ່ານັ້ນ ກໍຄືພໍ່-ແມ່ຕ້ອງໃຫ້ກຳລັງໃຈ, ບິແບ່ງບົດຮຽນສ່ວນຕົວຂອງພໍ່-ແມ່ໃນຄາວເປັນນັກຮຽນວ່າມີບົດຮຽນໃນການກະກຽມການສອບເສັງແນວໃດ, ມີຄວາມຜິດພາດແນວໃດທີ່ພວກລູກໆບໍ່ຄວນເຮັດຊ້ຳຮອຍອີກ. ນີ້ກໍເປັນມິຕິໃໝ່ ເຊິ່ງທາງກະຊວງສຶກສາປະເທດບຣູໄນດາຣູຊາລາມແນະນຳໃຫ້ຜູ້ເປັນພໍ່ແມ່ປະຕິບັດ.