ລາວ-ຫວຽດນາມ ເພີ່ມທະວີການຮ່ວມມືວຽກງານໂທລະຄົມມະນາຄົມ

        ວັນທີ 19 ກັນຍານີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານຂອງລາວ ແລະ ກະຊວງຂໍ້ມູນຂ່າວສານ ແລະ ການສື່ສານ ສສ ຫວຽດນາມ ໄດ້ລົງນາມຮ່ວມກັນໃນ ບົດບັນທຶກຄວາມເຂົ້າໃຈວ່າດ້ວຍການຮ່ວມມືໃນຂົງເຂດໂທລະຄົມມະນາຄົມ ແລະ ເຕັກໂນ ໂລຊີການສື່ສານຂໍ້ມູນຂ່າວສານ (ICT), ລະຫວ່າງທ່ານ ທັນສະໄໝ ກົມມະສິດ ລັດຖະ ມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ທ່ານ ເຈືອງ ມິງ ຕວນ ລັດຖະມົນຕີກະຊວງຂໍ້ມູນຂ່າວສານ ແລະ ການສື່ສານ ສສ ຫວຽດນາມ.

          ລົງນາມຄັ້ງນີ້ ເພື່ອເພີ່ມທະວີການຮ່ວມມື ແລະ ແລກປ່ຽນບົດຮຽນຂອງສອງປະເທດ ທາງດ້ານວຽກງານໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານເປັນ ຕົ້ນ: ການຮ່ວມມືສ້າງ

ລະບົບຕິດຕາມເຝົ້າລະວັງເຫດສຸກເສີນທາງຄອມພິວເຕີ ລະຫວ່າງສູນ LAOCERT ແລະ ສູນ VNCERT, ພ້ອມທັງຝຶກອົບຮົມໄລຍະສັ້ນ ແລະ ໄລຍະຍາວ ດ້ານໂທລະຄົມມະນາຄົມ, ແລກປ່ຽນບົດຮຽນທາງດ້ານວິຊາການ, ດ້ານການຄຸ້ມຄອງ ແລະ ພັດທະນາວຽກງານໂທລະຄົມມະ ນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ, ຊຶ່ງທັງໝົດນີ້ ຈະກາຍເປັນບາດກ້າວໜຶ່ງທີ່ເປັນພື້ນຖານໃຫ້ແກ່ການຮ່ວມມືທາງດ້ານການຄຸ້ມ ຄອງວຽກງານໂທລະຄົມມະນາຄົມ ລະຫວ່າງສອງປະເທດລາວ-ຫວຽດນາມ ເພື່ອຮັບຮອງ ໃຫ້ແກ່ການເຊື່ອມໂຍງກັບບັນດາປະເທດອາຊຽນ ແລະ ຕອບສະໜອງໃຫ້ການຈັດຕັ້ງປະຕິ ບັດ ແລະ ບັນລຸເປົ້າໝາຍຍຸດທະສາດການພັດທະນາທາງດ້ານໂທລະຄົມມະນາຄົມໃນຂົງ ເຂດອາຊຽນຕື່ມອີກ.

          ສຳລັບ ສປປ ລາວ ການພັດທະນາວຽກງານໂທລະຄົມຍັງປະເຊີນກັບສິ່ງທ້າທາຍຫລາຍປະ ການ ແລະ ມີຄວາມຈຳເປັນຕ້ອງມີການແລກປ່ຽນບົດຮຽນກັບບັນດາປະເທດພາກ ພື້ນ ແລະ ສາກົນ ເພື່ອມາດັດປັບ, ໝູນໃຊ້ເຂົ້າໃນການພັດທະນາວຽກງານໂທລະຄົມໃຫ້ ມີປະສິດທິຜົນຫລາຍຂຶ້ນ ແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດ ແລະ ສ້າງເງື່ອນໄຂໃຫ້ລາວສາມາດເຊື່ອມໂຍງກັບພາກພື້ນ ແລະ ສາກົນໄດ້ເປັນຢ່າງດີ.