ລາວ-ເກົາຫລີຮ່ວມກັນປຶກສາດ້ານການຄ້າ ແລະ ການລົງທຶນ

        ໃນວັນທີ 18 ພະຈິກ 2016 ທີ່ນະຄອນຫລວງວຽງຈັນ, ກະຊວງອຸດສາຫະກຳ ແລະ ການຄ້າ, ກະຊວງພະລັງງານ ແລະ ບໍ່ແຮ່ ຮ່ວມກັບ ສຳນັກງານສົ່ງເສີມການຄ້າ ແລະ ການລົງທຶນ ຂອງ ສ ເກົາຫລີ (KOTRA) ໄດ້ຈັດສຳມະນາ ການຈັບຄູ່-ພົບປະນັກທຸລະກິດ ເອເຊຍ-ສ ເກົາຫລີ ຄັ້ງທີ 2 ໂດຍການເປັນປະທານຂອງທ່ານ ວິລະພົນ ວິລະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ມີທ່ານ Youn Kang Hyun ເອກອັກຄະລັດຖະທູດ ສ ເກົາຫລີ ປະຈຳ ສປປ ລາວ ແລະ ບັນດານັກ ທຸລະ ກິດ 5 ປະເທດ (ລາວ, ຫວຽດນາມ, ສ ເກົາຫລີ, ໄທ ແລະ ກຳປູເຈຍ), ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍ.

          ການສຳມະນາດັ່ງກ່າວ, ຈັດຂຶ້ນເພື່ອເປີດກວ້າງການຮ່ວມມື, ການແບ່ງປັນປະສົບການນຳບັນ ດາບໍລິສັດຈາກປະເທດໃກ້ຄຽງ. ພ້ອມທັງເປັນການສ້າງເຄື່ອຄ່າຍຄວາມສຳພັນ. ໃນການຮ່ວມມືທາງດ້ານທຸລະກິດ ກັບບັນດາບໍລິສັດ ທີ່ມີຄວາມສົນໃຈ ແລະ ກຳລັງຊອກຫາຄູ່ຮ່ວມໃນການຂະຫຍາຍທຸລະກິດ ແລະ ພັດທະນາທຸລະກິດຂອງຕົນເອງ.