ສະພາສະເໜີລັດດໍາເນີນມາດຕະການເດັດຂາດຕໍ່ການໃຊ້ສານເຄມີອັນຕະລາຍຊະຊາຍ

           ຄະນະປະຈໍາສະພາແຫ່ງຊາດສະເໜີໃຫ້ລັດຖະບານດໍາເນີນມາດຕະການຕໍ່ໂຄງການ, ໂຮງຈັກ-ໂຮງງານ ແລະ ຫົວໜ່ວຍການຜະລິດຕ່າງໆ ທີ່ນໍາໃຊ້ສານເຄມີອັນຕະລາຍແບບຊະຊາຍ, ພາຍ ຫລັງເຫັນວ່າບັນຫາດັ່ງກ່າວໄດ້ສົ່ງ ຜົນກະທົບອັນບໍ່ດີຫລາຍດ້ານຕໍ່ເສດຖະກິດ-ສັງຄົມ. 

           ຄະນະດັ່ງກ່າວສະເໜີວ່າ: ໃຫ້ລັດຖະບານກວດກາຄືນບັນດາກົດໝາຍ ແລະ ນິຕິກຳລຸ່ມກົດໝາຍກ່ຽວຂ້ອງກັບການຄຸ້ມຄອງສານເຄມີຕ່າງໆເຂົ້າໃນການຜະລິດ, ການປຸງແຕ່ງ ແລະ ໂຮງງານອຸດສາຫະກຳຕ່າງໆ ຖ້າເຫັນວ່ານິຕິກຳໃດບໍ່ສອດຄ່ອງກັບສະພາບຄວາມເປັນຈິງໃນປັດຈຸບັນແມ່ນສະເໜີໃຫ້ປັບປຸງ

ໂດຍໄວ, ພ້ອມທັງປັບປຸງເນື້ອໃນບາງມາດຕາຂອງກົດໝາຍທີ່ບໍ່ທັນກຳນົດຈະແຈ້ງໃຫ້ມີຄວາມຈະແຈ້ງຮັດກຸມຕື່ມ ເຊັ່ນ: ຄຳວ່າໂຄງການທີ່ມີຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດຫລາຍຕ້ອງຜ່ານຄະນະປະຈຳສະພາແຫ່ງຊາດ, ກວດກາຄືນການອະນຸຍາດການລົງທຶນຂອງບັນດາຜູ້ປະກອບການ ຫລື ຫົວໜ່ວຍທຸລະກິດພາຍໃນ ແລະ ຕ່າງປະເທດທີ່ນຳເຂົ້າສານເຄມີທຸກປະເພດຢ່າງເຂັ້ມງວດ ເປັນຕົ້ນບັນຊີປະເພດເຄມີທີ່ເປັນອັນຕະລາຍຮ້າຍແຮງ ແລະ ບັນດາໂຮງຈັກໂຮງງານ, ການຜະລິດກະສິກຳ, ການບໍລິການ, ການນຳເຂົ້າ ແລະ ຈຳໜ່າຍສິນຄ້າບໍລິໂພກ-ອຸປະ ໂພກທີ່ບໍ່ປະຕິບັດຕາມລະບຽບກົດໝາຍ, ກວດກາຄືນບັນດາສັນຍາຂອງໂຄງການຕ່າງໆທີ່ໄດ້ລົງນາມແລ້ວວ່າອັນໃດຄວນໃຫ້ສືບຕໍ່, ອັນໃດຄວນໂຈະ, ລຶບລ້າງ ຫລື ຍຸບເລີກ, ຮີບຮ້ອນຄົ້ນຄວ້າແກ້ໄຂຜົນກະທົບຕໍ່ສິ່ງແວດລ້ອມທີ່ເກີດຈາກກິ່ນເໝັນ, ນ້ຳເປື້ອນ, ອາກາດເປັນພິດ ແລະ ສານເຄມີທີ່ປະຊາຊົນໄດ້ຮັບຜົນກະທົບໃນປັດຈຸບັນໃຫ້ເປັນຮູບປະທຳ, ເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດກົດໝາຍ ແລະ ລະບຽບການກ່ຽວກັບຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດທີ່ໄດ້ປະກາດໃຊ້ແລ້ວ,  ເອົາໃຈໃສ່ຜັນຂະຫຍາຍມາດຕາຂອງກົດໝາຍທີ່ມີແລ້ວນັ້ນອອກເປັນນິຕິກຳລຸ່ມກົດໝາຍ ເພື່ອເປັນບ່ອນອີງໃນການຈັດຕັ້ງປະຕິບັດ. ພ້ອມດຽວກັນນັ້ນ ກໍຄົ້ນຄວ້າ, ສ້າງ ແລະ ປັບປຸງກົດໝາຍ, ນິຕິກຳລຸ່ມກົດໝາຍກ່ຽວກັບການຄຸ້ມຄອງ ແລະ ນໍາໃຊ້ສານເຄມີໃຫ້ມີຄວາມສອດຄ່ອງ ແລະ ຮັດກຸມ, ເອົາໃຈໃສ່ໂຄສະນາເຜີຍແຜ່ກົດໝາຍ ແລະ ນິຕິກຳລຸ່ມກົດໝາຍໄປຄຽງຄູ່ກັບການສະໜອງຂໍ້ມູນຂ່າວສານກ່ຽວກັບການນຳໃຊ້, ການບໍລິໂພກສະບຽງອາຫານທີ່ມີສານເຄມີຕົກຄ້າງ, ເຈືອປົນ, ການປ້ອງກັນ ແລະ ຄວາມເປັນອັນຕະລາຍຂອງສານເຄມີປະເພດຕ່າງໆໃຫ້ປະຊາຊົນ ແລະ ສັງຄົມໄດ້ຮັບຮູ້ຢ່າງກວ້າງຂວາງ, ກວດກາຄືນພາລະບົດບາດ, ການແບ່ງຄວາມຮັບຜິດຊອບ ແລະ ກົນໄກການປະສານງານນັບແຕ່ສູນກາງຮອດທ້ອງຖິ່ນໃຫ້ມີຄວາມຊັດເຈນ ເປັນຕົ້ນ: ການປະເມີນຜົນກະທົບຕໍ່ສິ່ງແວດລ້ອມ, ສັງຄົມ ແລະ ທຳມະຊາດ ກ່ອນການອະນຸມັດໂຄງການຕ່າງໆອັນໃດຕ້ອງຜ່ານສະພາແຫ່ງຊາດ, ສະພາປະຊາຊົນຂັ້ນແຂວງ, ອັນໃດລັດຖະບານ ແລະ ທ້ອງຖິ່ນຕ້ອງອະນຸມັດຕາມກົດໝາຍ, ເພີ່ມທະວີການບຳລຸງສ້າງ, ຍົກລະດັບຄວາມຮູ້ຄວາມສາມາດໃຫ້ພະນັກງານສະເພາະດ້ານກ່ຽວກັບວຽກງານເຄມີໃຫ້ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການທີ່ຈຳເປັນ, ເພີ່ມການລົງທຶນເຂົ້າໃສ່ການຕິດຕາມກວດກາ, ສ້າງຫ້ອງທົດລອງ, ຈັດຊື້ເຄື່ອງມື ແລະ ອຸປະກອນຮັບໃຊ້ສະເພາະໃຫ້ແກ່ການກວດກາ, ວິເຄາະ, ວິໄຈສານເຄມີປົນເປື້ອນໃນອາຫານ, ນ້ຳ, ອາກາດ ແລະ ໃຫ້ມີການຄຸ້ມຄອງນຳໃຊ້ຢ່າງມີປະສິດທິຜົນສູງ, ເອົາໃຈໃສ່ຄຸ້ມຄອງ, ຕິດຕາມ, ກວດກາ ແລະ ປະເມີນຜົນຢ່າງເປັນປົກກະຕິ, ຕໍ່ເນື່ອງ ແລະ ມີມາດຕະການຢ່າງເດັດຂາດຕໍ່ຜູ້ລະເມີດກົດໝາຍກ່ຽວກັບການນຳໃຊ້ສານເຄມີ.