ລາວ-ຫວຽດນາມເພີ່ມທະວີການຮ່ວມມືໃນຂົງເຂດທະນາຄານກາງ

             ກອງປະຊຸມທະວິພາຄີ ລະຫວ່າງ ທະນາຄານແຫ່ງ ສປປລາວ ແລະທະນາຄານແຫ່ງລັດ ຫວຽດນາມ ໄດ້ຈັດຂຶ້ນ ໃນວັນທີ 15 ກຸມພາ 2017 ທີ່ໂຮງແຮມຫຼວງພຣະບາງວິວ, ແຂວງຫຼວງພຣະບາງ ໂດຍການໃຫ້ກຽດເປັນປະທານຮ່ວມ ຂອງທ່ານ ສົມພາວ ໄຟສິດ ກໍາມະການສູນກາງພັກ, ຜູ້ວ່າການທະນາຄານແຫ່ງ ສປປລາວ ແລະທ່ານ ເລ ມິງ ຮຶງ ກໍາມະ ການສູນກາງພັກ, ຜູ້ວ່າການທະນາຄານແຫ່ງລັດ ຫວຽດນາມ, ແລະ ມີ ບັນດາຫົວໜ້າກົມກ່ຽວຂ້ອງ ຂອງທະນາຄານກາງ ລາວ ແລະຫວຽດນາມເຂົ້າຮ່ວມເປັນຈຳນວນຫລາຍ.

           ກອງປະຊຸມໄດ້ຮັບຟັງການລາຍງານສະພາບເສດຖະກິດມະຫາພາກ, ການດຳເນີນນະໂຍບາຍເງິນຕາ ແລະ ການຄຸ້ມຄອງທະນາຄານທຸລະກິດຈາກການນຳຂັ້ນສູງຂອງທະນາຄານກາງ 2 ຝ່າຍ, ຈາກນັ້ນ ໄດ້ປຶກສາຫາລືແລກປ່ຽນ ຄຳ ຄິດຄຳເຫັນກ່ຽວກັບການຄຸ້ມຄອງເສດຖະກິດມະຫາພາກ, ນະໂຍບາຍເງິນຕາ, ການຄຸ້ມຄອງທະນາຄານທຸລະກິດ ແລະການ ປັບປຸງລະບົບທະນາຄານ; ທົບທວນຄືນແຜນການຮ່ວມມືສອງຝ່າຍ   ໃນໄລຍະຜ່ານມາ ແລະກຳນົດທິດທາງແຜນການຮ່ວມມືໃນຕໍ່ໜ້າ. ເຊິ່ງການນໍາຂັ້ນສູງຂອງ 2 ທະນາຄານກາງລາວ ແລະຫວຽດນາມ ຈະສືບຕໍ່ຈັດ ຕັ້ງປະຕິບັດແຜນຮ່ວມມືທາງດ້ານວິຊາການລະຫວ່າງກັນຢ່າງເປັນປົກກະຕິຕາມຂອບຮ່ວມມືສອງຝ່າຍສໍາລັບປີ 2017, ໃນນັ້ນຈະມີການແລກປ່ຽນບົດຮຽນທາງດ້ານນະໂຍບາຍເງິນຕາແລະການຄຸ້ມຄອງທະນາຄານທຸລະກິດແລະວຽກງານທີ່ສໍາ ຄັນອື່ນໆປິ່ນອ້ອມວຽກງານຂອງທະນາຄານກາງຕື່ມອີກ.

            ກອງປະຊຸມດັ່ງກ່າວ ຍັງໄດ້ຮັບຟັງການລາຍງານກ່ຽວກັບສະພາບການດໍາເນີນງານຂອງບັນ ດາທະນາຄານທຸລະກິດ ຫວຽດນາມໃນ ສປປ ລາວ ລວມເຖິງຂໍ້ສະເໜີຕໍ່ການນຳຂັ້ນສູງຂອງທະນາ ຄານກາງຂອງ 2 ຝ່າຍ, ພິເສດໃນກອງປະຊຸມ ຄັ້ງ ນີ້ ສອງຝ່າຍຍັງໄດ້ຮ່ວມລົງນາມໃນບົດບັນທຶກຄວາມເຂົ້າໃຈສະບັບປັບປຸງ ລະຫວ່າງຜູ້ວ່າການທະນາຄານ ແຫ່ງສປປລາວ ແລະທະນາຄານແຫ່ງລັດຫວຽດນາມ ເພື່ອເສີມຂະຫຍາຍການຮ່ວມມືວຽກງານທະນາຄານກາງໃຫ້ເຂົ້າສູ່ລວງເລິກ ແລະມີປະສິດທິຜົນ.

                                         # ຂ່າວ-ພາບ: ຣັດສະໝີ ດວງສັດຈະ