ເຜີຍແຜ່ກົດຫມາຍການບັນຊີສະບັບປຸງ

        ທະນາຄານແຫ່ງ ສປປ ລາວ ຮ່ວມກັບ ກະຊວງການເງິນ, ໄດ້ຈັດສຳມະນາ ເຜີຍແຜ່ກົດໝາຍວ່າດ້ວຍການບັນຊີສະບັບ ປັບປຸງຂຶ້ນໃນວັນທີ 8 ພຶດສະພາ 2013 ທີ່ນະຄອນຫລວງວຽງຈັນ, ເພື່ອເຮັດໃຫ້ພະນັກງານທະນາຄານທຸລະກິດ ແລະ ສະຖາ ບັນການເງິນ ຕ່າງໆ ກໍຄືພະນັກງານຂອງກົມບັນຊີ-ການເງິນທະນາ ຄານແຫ່ງ ສປປ ລາວ ແລະ ຄະນະຮັບຜິດຊອບຄົ້ນຄວ້າ ປັບປຸງດຳລັດວ່າດ້ວຍບັນຊີທະນາຄານ ແລະ ສະ ຖາບັນການເງິນ ໄດ້ເຊື່ອມຊຶມ ແລະ ເຂົ້າໃຈເລິກເຊິ່ງກວ່າເກົ່າກ່ຽວກັບເນື້ອ ໃນຂອງກົດໝາຍດັ່ງກ່າວ ແລະ ສາມາດນຳເອົາບົດຮຽນທີ່ໄດ້ໄປປັບປຸງ, ພັດທະນາ ລະບຽບການຕ່າງໆ ແລະ ໜູນໃຊ້ເຂົ້າໃນ ວຽກງານຕົວຈິງໃຫ້ປະສົບຜົນສຳເລັດແຕ່ລະບາດກ້າວ.

          ທ່ານ ສອນໄຊ ສິດພະໄຊ ຮອງຜູ້ວ່າການທະນາຄານແຫ່ງ ສປປລາວ ກ່າວວ່າ:ວຽກງານ ບັນຊີ ເປັນວຽກໜຶ່ງທີ່ມີບົດ ບາດ ແລະ ຄວາມສຳຄັນທີ່ສຸດຕໍ່ທຸກ ຂະແໜງການ ໂດຍສະເພາະ ວຽກງານໃນຂົງເຂດທະນາຄານ ໃນນັ້ນ ການສ້າງ ແລະ ພັດ ທະນາລະບົບບັນຊີທະນາຄານ ແລະ ສະຖາ ບັນການເງິນໃຫ້ມີຄວາມ ເຂັ້ມແຂງ,ທັນສະໄໝ ແລະ ສອດ ຄ່ອງກັບມາດຕະຖານ ສາກົນກໍເປັນສິ່ງທີ່ຈຳເປັນ ແລະ ເພື່ອຮັບໃຊ້ໃນການຄຸ້ມຄອງລະບົບທະນາ ຄານ,ສະຖາບັນການເງິນໃຫ້ມີ ຄວາມໝັ້ນຄົງ ແລະ ໂປ່ງໃສ.     

       ການສຳມະນານອກຈາກ ເຜີຍແຜ່ກົດໝາຍວ່າດ້ວຍການບັນຊີ ສະບັບປັບປຸງແລ້ວບັນດາ ຜູ້ເຂົ້າຮ່ວມໄດ້ຮັບຟັງການ ລາຍງານສະພາບລວມໃນການຈັດຕັ້ງຜັນຂະຫຍາຍລະບຽບການບັນຊີ ຢູ່ຂະແໜງທະນາຄານ ແລະ ສະເໜີຮ່າງດຳລັດວ່າ ດ້ວຍການບັນຊີທະນາຄານ ແລະ ສະ ຖາບັນການເງິນ ເພື່ອປຶກສາຫາລື ແລະ ປະກອບຄຳ ຄິດຄຳເຫັນຮ່ວມກັນ.

     ສຳລັບກົດໝາຍວ່າດ້ວຍການ ບນຊີສະບັບປັບປຸງປະກອບມີ 8 ພາກ 89 ມາດຕາ ຊຶ່ງໃນກົດໝາຍສະບັບດັ່ງກ່າວ ໄດ້ ກຳນົດຫລັກການ, ລະບຽບການ ແລະ ມາດຕະການກ່ຽວກັບການຖືບັນຊີຂອງຫົວໜ່ວຍງົບປະມານ, ອົງການບໍລິຫານ ວິຊາ ການ, ກອງທຶນຂອງລັດ ,ຫົວໜ່ວຍທຸລະກິດ ແລະ ຫົວໜ່ວຍທີ່ບໍ່ສະແຫວງຫາຜົນກຳໄລເພື່ອເຮັດໃຫ້ວຽກງານການບັນຊີມີ ຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວ, ເປັນເຄື່ອງມືຮັບໃຊ້ການຄຸ້ມຄອງການເງິນ ແລະ ການກວດສອບບັນຊີພ້ອມ ທັງເປັນພື້ນຖານໃນການເກັບກຳພັນທະເຂົ້າງົບປະມານແຫ່ງລັດ, ສົ່ງເສີມການຜະລິດທຸລະກິດ, ການລົງທຶນພາຍໃນ ແລະ ຕ່າງປະເທດປະກອບສ່ວນເຂົ້າໃນການສ້າງສາພັດທະນາປະເທດຊາດ.