ເຫດການບັ້ງໄຟຕົກໃສ່ຄົນຈົນເສຍຊີວິດຢູ່ບ້ານບໍ່ເຫລັກ ເກີດຈາກຄວາມປະໝາດ ແລະ ຂາດຄວາມຮັບຜິດຊອບ

      ວັນທີ 12 ພຶດສະພານີ້ ເວລາ 17:23 ໂມງ ໄດ້ເກີດເຫດການບໍ່ຄາດຄິດ ບັ້ງໄຟໜັກ 6 ກິໂລກຣາມ ທີ່ຈູດ ໂດຍ ຄວາມປະໝາດ ເຮັດໃຫ້ບັ້ງໄຟລອຍໄປຕຳຄົນ ຈົນໄດ້ຮັບບາດເຈັບ 3 ຄົນ ແລະ ເສຍຊີວິດ 1 ຄົນ. ເຫດການ ນີ້ ເກີດຂຶ້ນຢູ່ງານປະເພນີບຸນບັ້ງໄຟບ້ານບໍ່ເຫລັກ (ຫລັກ 36) ເມືອງໄຊທານີ ນະຄອນຫລວງວຽງຈັນ. ໃນມື້ເກີດເຫດ, ການຈັດຕັ້ງບ້ານບໍ່ເຫລັກ ໄດ້ຈັດງານບຸນບັ້ງໄຟ ເຊິ່ງມີບັ້ງໄຟທີ່ນຳມາຈູດລວມທັງໝົດ 25 ບັ້ງ, ມີບັ້ງໄຟໜັກ 6 ກິໂລກຣາມ ທີ່ລົງທະບຽນ 19 ບັ້ງ (ລວມບັ້ງເກີດເຫດ), ມີບັ້ງໄຟໝຶ່ນ 5 ບັ້ງ ແລະ ບັ້ງໄຟແສນ 1 ບັ້ງ, ແຕ່ບໍ່ໄດ້ລົງທະ ບຽນກັບຄະນະກຳມະການຈັດງານບຸນ ຈຶ່ງເອົາມາຈູດບູຊາ. ນັບແຕ່ເລີ່ມງານ, ຄະນະກຳມະການຈູດບັ້ງໄຟໄປແລ້ວ 16 ບັ້ງ ຈົນມາຮອດບັ້ງທີ 17 ເປັນບັ້ງທີ່ເກີດເຫດ ເຮັດໃຫ້ຄົນໄດ້ຮັບບາດເຈັບ ແລະ ເສຍຊີວິດ. ບັ້ງໄຟດັ່ງກ່າວ ແມ່ນ ຂອງປະຊາຊົນບ້ານ ອາມອນ ເມືອງໄຊເສດຖາ
ນະຄອນຫລວງວຽງຈັນ ມາຂໍຈູດ. ໃນເບື້ອງຕົ້ນ ແມ່ນເອົາມາເພື່ອ ແຂ່ງຂັນແຕ່ບໍ່ມີຄູ່ແຂ່ງຈຶ່ງຂໍຈູດບູຊາ. ຈາກນັ້ນ ເຈົ້າຂອງບັ້ງໄຟໄດ້ເອົາບັ້ງໄຟຂຶ້ນຮ້ານເອງ ແລະ ຄະນະກຳມະ ການ ຈຶ່ງຈູດດ້ວຍລະບົບໄຟຟ້າ. ພາຍຫລັງຈູດບັ້ງໄຟໄດ້ເງີກຫົວອອກຈາກຮ້ານ ແລ້ວຫາງກໍຫລຸດອອກຈາກບ່ອນມັດ ແລະ ຫົວໄດ້ສັກລົງດິນ ບັ້ງໄຟຈຶ່ງລອຍໄປຕາມດິນສູງປະມານ 1 ແມັດ ແລ້ວມຸງມາຫາປະຊາຊົນທີ່ມາໃນ ງານບຸນ ຫ່າງຈາກຮານ 50 ແມັດ.ຈາກນັ້ນ ຫາງບັ້ງໄຟກໍດາດໃສ່ຂາຂອງທ້າວ ຕອມ ອາຍຸ 10 ປີ ນັກຮຽນບ້ານບໍ່ເຫລັກ, ບັ້ງ ໄຟຍັງບໍ່ຢຸດໄປຕຳໃສ່ຖັງນຳ້ກອນ ແລະ ດາດໃສ່ຂານາງ ລາ ອາຍຸ 45 ປີ ບ້ານ ທ່າເດື່ອ ເມືອງຫາດຊາຍຟອງ ທີ່ໄປ ຂາຍເຄື່ອງໃນງານ ທັງສອງກໍລະນີໄດ້ຮັບບາດເຈັບເລັກໜ້ອຍ. ຕໍ່ມາບັ້ງໄຟໄດ້ລອຍໄປຕຳເອົາຂາທ້າວ ອຳ ພອນ ອາຍຸ 25 ປີ ບ້ານ ນາຂາວ ເມືອງໄຊທານີ ໄດ້ຮັບບາດເຈັບສາຫັດ. ຈາກນັ້ນ ບັ້ງໄຟໄດ້ລອຍໄປຕຳເອົາຫົວທ້າວ ແສງແກ້ວ ອາຍຸ 38 ປີ ບ້ານ ທ່າສະຫວ່າງ ທີ່ພວມນັ່ງກິນດຶ່ມຢູ່ຮ້ານ ເຮັດໃຫ້ໃບໜາຂ້າງໜຶ່ງມຸ່ນ ແລະ ເສຍຊີວິດຄາ ທີ່. ພາຍຫລັງເກີດເຫດການຂຶ້ນ ຄົນທີ່ໄປຮ່ວມງານໄດ້ແຕກຕຶ່ນ ແລະ ນຳຜູ້ໄດ້ຮັບບາດເຈັບສົ່ງໂຮງໝໍ, ສຸດທ້າຍງານ ບຸນກໍຕ້ອງປິດລົງໃນທັນທີ.   

           ທານ ຮ້ອຍເອກ ບຸນມີ ແກ້ວພົມມາ ຫົວໜ້າກອງສືບສວນ-ສອບສວນຄະດີອາຍາ ປກສ ເມືອງໄຊທານີ ນະ ຄອນຫລວງວຽງຈັນ ໃຫ້ຮູ້ວ່າ: ເຫດການບັ້ງໄຟຫລຸດອອກຈາກຮ້ານ ແລ້ວຕຳມາໃສ່ມວນຊົນ ສົ່ງຜົນໃຫ້ມີ ຜູ້ໄດ້ຮັບ ບາດເຈັບ ແລະ ເສຍຊີວິດແມ່ນເກີດຈາກຂໍ້ບົກຜ່ອງ ແລະ ປະໝາດ ຂອງຄະນະກຳມະການຈັດງານບຸນທີ່ອະ ນຸຍາດ ໃຫ້ບຸກຄົນທີ່ບໍ່ກ່ຽວຂ້ອງເອົາບັ້ງໄຟຂຶ້ນຮ້ານ ແລະ ຍັງບໍ່ເຮັດຕາມກະຕິກາທີ່ວາງໄວ້ ຄືບໍ່ເອົາບັ້ງໄຟເຂົ້າບ້ວງ ແລະ ມັດຫາງບັ້ງໄຟແໜ້ນເກີນໄປ, ໃນການຈູດບັ້ງໄຟແຕ່ລະເທື່ອຜ່ານມາ ຄະນະກຳມະການຈະນຳບງັ້ໄຟຂຶ້ນຮ້ານ, ບໍ່ ພຽງແຕ່ເທົ່ານັ້ນ ໃນການຈັດງານບຸນ ບ້ານຍັງຂາດຂອດປະສານງານ ບໍ່ໄດ້ຜ່ານ ປກສ ກຸ່ມ ແລະ ເມືອງ, ໃນເມື່ອ ມີເຫດການເກີດຂຶ້ນຍັງລາຍງານຊັກຊ້າ. ປັດຈຸບັນຄະດີດັ່ງ ກາ່ວພວມດຳເນີນໄປຕາມຂັ້ນ ຕອນຂອງກົດ ໝາຍ ແລະ ເຈົ້າໜ້າທີ່ພວມຕິດຕາມເຈົ້າຂອງບັ້ງໄຟເກີດເຫດທີ່ພວມເອົາຕົວຫລົບໜີ ມາດຳເນີນຄະດີ.            

        ບຸນບັ້ງໄຟເປັນງານບຸນປະເພນີຂອງປະຊາຊົນລາວທີ່ເຄີຍປະຕິບັດກັນມາແຕ່ດົນນານ, ໃນຄວາມເຊື່ອແມ່ນຈູດ ບູຊາເທບພະຍາຟ້າແຖນ ເພື່ອຂໍຝົນໃຫ້ຕົກຖືກຕ້ອງຕາມລະດູການໃນການປູກຝັງໃນໄລຍະລະດູການຜະລິດ  ໃໝ່ທີ່ ຈະມາເຖິງ. ປັດຈຸບັນ ບຸນບັ້ງໄຟໃກ້ຈະຫາຊົມໄດ້ຍາກຂຶ້ນ ຍັງມີບາງເຂດ, ບາງທ້ອງຖິ່ນເທົ່ານັ້ນ ທີ່ຍັງສືບຕໍ່ປົກປັກ ຮັກສາຮີດຄອງປະເພນີນີ້ໄວ້ບໍ່ໃຫ້ສູນຫາຍໄປຈາກສັງຄົມລາວ, ແຕ່ເພື່ອຮັບປະກັນຄວາມປອດໄພ ການຈັດງານບຸນ ບັ້ງໄຟ ຄະນະກຳມະການຈະຕ້ອງພິຈາລະນາເຖິງຄວາມເປັນໄປໄດ້ ເພື່ອບໍ່ໃຫ້ຄວາມຜິດພາດດັ່ງກ່າວເກີດຂຶ້ນດັ່ງ ກໍລະນີທີ່ກ່າວມາ.