ສານປະຊາຊົນຂັ້ນຕົ້ນນະຄອນຫລວງວຽງຈັນຕັດສີນປະຫານຊີວິດຜູ້ຕ້ອງຫາຂົນສົ່ງຢາເສບຕິດລາຍໃຫຍ່

    

      ທ້າວ ໄມກອງ ແກ້ວມະນີ ອາຍຸ 44 ປີ,ທ້າວ ບຸນມີ ວິໄລຈິດ ອາຍຸ 33 ປີ ທັງສອງຢູ່ບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ ແລະ ທ້າວ ວິລະຄອນ ຈິດຈຳນົງ ອາຍຸ 33 ປີ ຢູ່ບ້ານຫົວຂົວ ເມືອງ ແລະ ແຂວງ ຫລວງນຳ້ ທາ,ຖືກ ສານປະຊາຊົນຂັ້ນຕົ້ນນະຄອນຫລວງວຽງຈັນ ຕັດສີນປະຫານຊີວິດ ເມື່ອວັນທີ 16 ພຶດສະພາ 2013 ຫລັງຈາກ ພວກກ່ຽວຖືກຂໍ້ຫາຂົນສົ່ງຢາເສບຕິດຢາບ້າ ຈຳນວນ 2,140,000 ເມັດ ແລະ ເຮໂຣອິນ ຈຳນວນ 40 ແທ່ງ.ໂດຍຖືກ ເຈົ້າໜ້າທີ່ສະກັດກັ້ນ ແລະ ຕ້ານຢາເສບຕິດ ແຂວງຫລວງພະບາງກັກຕົວໄດ້ເມື່ອວັນທີ 7 ພຶດສະ ພາ 2012.                      

        ສຳລັບຄະດີຂົນສົ່ງຢາເສບຕິດລາຍໃຫຍ່ນີ້ມີຢູ່ວ່າ:ໃນວັນທີ 2 ພຶດສະພາ 2012 ທ້າວໄມກອງ ໄດ້ຮັບຈ້າງ ຂົນ ສົ່ງຢາບ້າປະມານ 1 ພັນກວາມັດ ໃຫ້ ທ້າວ ຢົ້ງ(ສັນຊາດມຽນມາ) ຈາກບ້ານ ມອມ ເມືອງຕົ້ນເຜິ້ງ ແຂວງບໍ່ແກ້ວ ລົງມາສົ່ງຢູ່ນະຄອນຫລວງວຽງຈັນ,ຈາກນັ້ນ ທາວໄມກອງ ໄດ້ຊັກຊວນທ້າວ ວິລະຄອນ ແລະ ທ້າວ ບຸນມີ ມາຮ່ວມ ຂົນສົ່ງຢາບ້າ ເຊິ່ງໄດ້ຮັບຄ້າຈ້າງເປັນເງິນ 2 ພັນບາດຕໍ່ມັດ (ສະກຸນເງິນໄທ) ຮອດວັນທີ 3 ພຶດສະພາ 2012 ທ້າວ ຢົ້ງ ໄດ້ໂທລະສັບບອກທ້າວ ໄມກອງ ໃຫ້ໄປຮັບຢາບ້າຢູ່ທ່າວັດເກົ່າ ເຂດບ້ານມອມ ຈາກນັ້ນ ທ້າວ ໄມກອງ ກໍໄປ ຮັບເອົາຢາບ້າຈຳນວນ 4 ເປົາ ແລະ ທາວ ບຸນມີ ໄປຮັບເອົາຢາບ້າຢູ່ຈຸດເກົ່າຕື່ມອີກຈຳນວນ 2 ເປົາ ກັບເຮໂຣອິນ 40 ແທ່ງ ມາຮອດວັນທີ 5 ພຶດສະພາ 2012 ທ້າວໄມກອງ ຈຶ່ງແບ່ງຢາບ້າຈຳນວນ 2 ເປົາ ທີ່ຂົນມາໃນເບື້ອງຕົ້ນ ນັ້ນ ໃຫ້ທ້າວ ວິລະຄອນ ພ້ອມທັງບອກວ່າ: ເຖົ້າແກ່ໃຫ້ ຂົນໄປສົ່ງຢູ່ນະຄອນຫລວງວຽງຈັນ ຈາກນັ້ນຮອດວັນທີ 6 ພຶດສະ ພາ 2012 ພວກກ່ຽວໄດ້ຂົນສົ່ງ ຢາບ້າລົງມາ ນະຄອນຫລວງວຽງຈັນ ແລະ ເວລາປະມານ 1:00 ໂມງຂອງ ວັນທີ 7 ພຶດສະພາ 2012 ເຈົ້າໜ້າທີ່ຕຳຫລວດສະກັດກັ້ນ ແລະ ຕາ້ນຢາເສບຕິດ ກອງບັນຊາການ ປກສ ແຂວງ ຫລວງພະ ບາງ ໄດ້ກັກລົດປຣາໂດ ສີປອນເງິນ ໝາຍເລກທະບຽນ ຂລ 1188 ກຳແພງນະຄອນ ຂອງ ທ້າວ ໄມກອງ ໄດ້ຢູ່ກິ່ວ ກະຈຳ ພ້ອມຂອງກາງຢາບ້າ 400 ມັດ ແລະ ຮອດເວລາ ປະມານ 5:00 ໄດ້ກັກລົດແລນກຸຍເຊີ ສີຂາວ ໝາຍເລກ ທະບຽນ ຄຣ 2499 ກຳແພງນະຄອນ ຂອງ ທ້າວ ວິລະຄອນ ພ້ອມຂອງກາງຢາບ້າ 400 ມັດ ໄດ້ຢູເຂດ ປາກມອງ ແຂວງ ຫລວງພະບາງ ຫລັງຈາກນັ້ນ ເຈົ້າໜ້າທີ່ຕຳຫລວດໄດ້ກັກລົດ ປຣາໂດໝາຍເລກທະບຽນ 5559 ກຳແພງນະ ຄອນ ຂອງທ້າວ ບຸນມີ ພ້ອມຂອງກາງຢາບ້າ 270 ມັດ ແລະ ເຮໂຣອິນ 40 ແທ່ງ ໄດ້ຢູ່ ແຍກບ້ານໄຊມົງ ຄຸນ ເມືອງ ສີໂຄດຕະບອງ ນະຄອນຫລວງວຽງຈັນ.       

       ຜ່ານການຄົ້ນຄ້ວາເອກະສານຫລັກຖານຕ່າງໆ ໃນສຳນວນຄະດີ ແລະ ອິງຕາມການໄຕ ສວນໃນ ທີ່ປະຊຸມ ສານເຫັນວ່າ: ການກະທຳຜິດຂອງພວກກ່ຽວ ເປັນການກະທຳຜິດທາງອາຍາ ໃນສະຖານຂົນ ສົ່ງຢາເສບຕິດ ປະເພດ ຢາບ້າຕາມ ທີ່ໄດ້ກຳນົດ ໄວ້ໃນມາດຕາ 146 ຂໍ້ 2 ວັກ 4 ຂອງກົດໝາຍອາຍາ,ສວນການ ກະທຳຂອງທ້າວ ບຸນມີ ເປັນການກະທຳຜິດທາງອາຍາ ສະຖານຂົນສົ່ງຢາເສບຕິດປະເພດຢາບ້າ ແລະ ເຮໂຣອິນ ທີ່ໄດ້ກຳນົດໄວ້ໃນມາດ ຕາ 146 ຂໍ້1 ແລະ ຂໍ້ 2 ວັກ 4 ຂອງ ກົດໝາຍອາຍາສະບັບປັບປຸງ 2005 ດ້ວຍວ່າ: ພວກຈຳເລີຍ ມີເຈດຕະນາ ເຄື່ອນໄຫວຂົນສົ່ງຢາເສບຕິດປະເພດ ຢາບ້າ ແລະ ເຮໂຣອິນ ເພື່ອຫວັງຜົນປະໂຫຍດ ຈາກການຂົນ ສົ່ງຢາເສບຕິດ ແທ້, ສະນັ້ນ ສານຈິ່ງລົງໂທດຕັດສີນປະຫານ ຊີວິດຈຳເລີຍ ແລະ ຮີບ ຢາເສບຕິດທັງໝົດມອບໃຫ້ເຈົ້າ ໜ້າທີ່ນຳໄປ ທຳລາຍຖີ້ມ ແລະ ຮີບພາຫະນະທັງໝົດທພວກກ່ຽວໃຊ້ຂົນສົ່ງຢາເສບຕິດຄັ້ງນີ້ໃຫ້ເປັນຂອງລັດ.