ກອງປະຊຸມສະໄໝສາມັນ ເທື່ອທີ 6 ສະພາແຫ່ງຊາດຊຸດທີ
VII ໄດ້ອັດລົງດ້ວຍຜົນສຳເລັດ ອັນຈົບງາມໃນຕອນ ບ່າຍ ຂອງ ວັນທີ 27 ທັນວານີ້, ພາຍຫລັງດຳ ເນີນມາເປັນ ເວລາ
15 ວັນ,ໂດຍ ມີທ່ານຈູມມາລີ ໄຊຍະສອນ ເລຂາທິ ການໃຫຍ່ຄະ ນະບໍລິຫານງານສູນກາງພັກປະທານປະເທດ,
ທ່ານ ທອງສິງ ທຳມະວົງ ນາຍົກ ລັດຖະມົນຕີ ແລະ ຄະນະ ລັດຖະບານ, ພ້ອມ ດ້ວຍສະມາຊິກສະພາແຫ່ງຊາດ
ແລະ ແຂກຖືກເຊີນເປັນກຽດເຂົ້າຮ່ວມຢ່າງ ພ້ອມພຽງ.
ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດ ໄດ້ກ່າວສູນທອນພົດປິດກອງປະຊຸມວ່າ:
ກອງປະຊຸມໄດ້ຊົມເຊີຍຕໍ່ລັດ ຖະບານທີ່ໄດ້ຍົກສູງຄວາມຮັບຜິດຊອບສູ້ຊົນເຮັດໃຫ້ເສດຖະກິດ- ສັງຄົມໃນປີ
2013 ມີການຂະຫຍາຍຕົວຢ່າງຕໍ່ເນື່ອງ ແລະ ຖືກທິດສາມາດປະຕິບັດດ້ວຍຜົນສຳເລັດທີ່ຄາດໝາຍໄວ້;
ການກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບ
ດ້ານຕິດພັນກັບວຽກງານສາມສ້າງຢູ່ໃນ
109 ບ້ານ 51 ເມືອງເປົ້າໝາຍ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ສາມາດແກ້ໄຂຄວາມທຸກຍາກຂອງປະຊາຊົນໄດ້ເທື່ອລະກ້າວ.
ແຕ່ຄຽງຄູ່ກັນນັ້ນ, ກໍຍັງເຫັນວ່າມີຂໍ້ຄົງຄ້າງທີ່ມີລັກສະ ນະແກ່ຍາວບໍ່ສາມາດແກ້ໄຂໄດ້ຢ່າງຂາດຕົວເປັນຕົ້ນແມ່ນ:
ການປັບປຸງໂຄງສ້າງເສດຖະກິດ, ໂຄງສ້າງການລົງທຶນ, ລວມທັງ ໂຄງປະກອບສິນເຊື່ອຂອງທະນາຄານທີ່ຍັງມີບາງດ້ານບໍ່ທັນໄປຕາມທິດ
ແລະ ສອດຄ່ອງກັບແຜນພັດທະນາເສດຖະກິດ-ສັງ ຄົມໄລຍະ 5 ປີ ຄັ້ງທີ 7 ຕາມທີ່ໄດ້ກຳນົດໄວ້ໃນ ມະຕິ
9 ຂອງພັກ.ແນວໃດກໍຕາມ, ທີ່ປະຊຸມໄດ້ຮຽກຮ້ອງໃຫ້ລັດຖະບານ ເພີ່ມທະວີການຊີ້ນຳເຮັດໃຫ້ເສດຖະກິດມະຫາພາກມີຄວາມສະຫງົບ
ແລະ ໜັກແໜ້ນ, ສຸມໃສ່ແກ້ໄຂບັນຫາຂໍ້ຄົງຄ້າງ, ມີມາດ ຕະການຢ່າງຈິງຈັງ ແລະ ມີຄວາມຕັດສິນໃຈໂຈະບັນດາໂຄງການລົງທຶນທີ່ບໍ່ມີຄວາມຈຳເປັນ,
ຖືເປັນບູລິມະສິດຈັດແບ່ງທຶນ ໃສ່ການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນ ໃຫ້ຫລາຍຂຶ້ນຕິດພັນກັບວຽກສາມສ້າງຢ່າງມີຄຸນນະ
ພາບ. ຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດຢ່າງເໝາສົມໂດຍມີການເລືອກເຟັ້ນຕິດພັນກັບການຮັກສາສິ່ງແວດລ້ອມ
ແລະ ການພັດທະນາແບບຍືນຍົງ; ສືບຕໍ່ປັບປຸງການບໍລິຫານລັດ, ສະກັດກັ້ນ ແລະ ຕ້ານການຟູມເຟືອຍ,
ຕ້ານການສໍ້ລາດບັງ ຫລວງ, ສ້າງສະພາບແວດລ້ອມທີ່ເອື້ອອຳນວຍແກ່ການດຳເນີນທຸລະກິດ, ຕາມນະໂຍບາຍ,
ລະບຽບກົດໝາຍ, ເປີດກວ້າງ ການຮ່ວມມື ແລະ ການເຊື່ອມໂຍງກັບບັນດາປະເທດເພື່ອນມິດ ແລະ ອົງການຈັດຕັ້ງພາກພື້ນສາກົນໂດຍສະເພາະກຽມ
ຄວາມພ້ອມເຂົ້າເປັນປະຊາຄົມເສດຖະກິດອາຊຽນ.
ສະພາແຫ່ງຊາດໄດ້ມອບ ໃຫ້ອົງການກວດສອບແຫ່ງລັດສືບຕໍ່ກວດສອບບັນດາຫົວໜ່ວຍທີ່ຍັງເຫລືອຢູ່ສູນກາງ
ແລະ ທ້ອງຖິ່ນໃຫ້ທົ່ວເຖິງ, ພາຍຫລັງທີ່ ໄດ້ສຳເລັດການກວດສອບແລ້ວ ກວ່າ 70 ຫົວໜ່ວຍ, ພ້ອມທັງຊຸກຍູ້ອົງການ
ກວດກາລັດ ຖະບານ ແລະ ກະຊວງການເງິນ ຕິດຕາມ ກວດກາການແກ້ໄຂຜົນຂອງ ການກວດສອບຢູ່ໃນບັນດາງົບ
ປະມານຕາມ 8 ມາດ ຕະການເຮັດໃຫ້ຫົວໜ່ວຍເຂົ້າສູ່ລະບຽບວິໄນການເງິນນັບມື້ດີຂຶ້ນ. ກອງປະຊຸມຍັງເຫັນດີການສ້າງຕັ້ງແຂວງໄຊສົມບູນໃໝ່
ຕາມການສະເໜີຂອງລັດຖະບານ, ແຕ່ໃຫ້ ເອົາໃຈໃສ່ປຸກລະດົມປະຊາຊົນບັນດາເຜົ່າທຸກຂັ້ນໃຫ້ເຂົ້າຮ່ວມຂະບວນການພັດ
ທະນາເສດຖະກິດ-ສັງຄົມດ້ວຍຄວາມຕັ້ງໜ້າ, ຮັບປະກັນເຮັດໃຫ້ແຂວງໃໝ່ມີການພັດທະນາຢ່າງວ່ອງໄວ
ແລະ ມີຄວາມສະ ຫງົບທຽບທັນກັບການພັດທະນາລວມຂອງປະເທດໃນຕໍ່ໜ້າ.
ກອງປະຊຸມໄດ້ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງ
ຄົມ ແລະ ງົບປະມານແຫ່ງລັດ ສົກປີ2012-2013, ຄາດໝາຍແຜນການ ແລະ ມາດຕະການຈັດຕັ້ງປະຕິບັດສົກປີ
2013-2014; ຮັບຮອງຜົນການກວດສອບບົດສະຫລຸບຂາດຕົວການປະຕິບັດແຜນງົບປະມານແຫ່ງລັດສົກປີ
2011-2012; ຮັບ ຮອງການສ້າງ ຕັ້ງແຂວງໄຊສົມບູນ; ຮັບຮອງກົດໝາຍທັງໝົດ 14 ສະບັບ, ໃນນີ້ມີກົດໝາຍສ້າງໃໝ່
6 ສະບັບຄື: ກົດໝາຍວ່າ ດ້ວຍອົງການໄອຍະການທະຫານ, ກົດໝາຍວ່າດ້ວຍສານທະຫານ, ກົດໝາຍວ່າດ້ວຍວຽກງານປ້ອງກັນຄວາມສະຫງົບ,
ກົດ ໝາຍວ່າດ້ວຍການດຳເນີນຄະດີເດັກ, ກົດໝາຍວ່າດ້ວຍຄວາມປອດໄພທາງດ້ານເຕັກໂນໂລຊີຊີວະພາບ
ແລະ ກົດໝາຍວ່າ ດ້ວຍອະຊີວະສຶກສາ. ພ້ອມນີ້ ຍັງຮັບຮອງກົດໝາຍປັບປຸງ 8 ສະບັບຄື: ກົດໝາຍວ່າດ້ວຍແຮງງານ,
ກົດໝາຍວ່າດ້ວຍວິສາ ຫະກິດ, ກົດໝາຍວ່າດ້ວຍການບັນຊີ, ກົດໝາຍວ່າດ້ວຍການໄປສະນີ, ກົດໝາຍວ່າດ້ວຍການວັດແທກ,
ກົດໝາຍວ່າດ້ວຍ ມໍຣະດົກແຫ່ງຊາດ, ກົດໝາຍວ່າດ້ວຍອຸດສາຫະກຳປຸງແຕ່ງ ແລະ ກົດໝາຍວ່າດ້ວຍອາກອນມູນຄ່າເພີ່ມ.
No comments:
Post a Comment