ສະພາບລັກຊັບພົນລະເມືອງຍັງສືບຕໍ່ເກີດຂຶ້ນຫລາຍ ແລະ ແກ້ໄຂຍາກ

     ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນທ້າຍອາທິດຜ່ານ ມາ ໄດ້ມີກຸ່ມຄົນຮ້າຍ 3 ຄົນ ເຂົ້າໄປລັກເອົາຊັບສິນຈຳນວນ ໜຶ່ງຂອງໂຮງຮຽນແຫ່ງໜຶ່ງໃນນະຄອນຫຼວງວຽງຈັນຄື: ຄອມ ພິວເຕີ 3 ໜ່ວຍ, ໂທລະສັບມືຖື 2 ເຄື່ອງ ແລະ ເງິນອີກຈຳ ນວນໜຶ່ງ, ຊຶ່ງປັດຈຸບັນທາງເຈົ້າໜ້າ ທີ່ພວມດຳເນີນການສືບສວນ ແລະ ກວດເບິ່ງກ້ອງວົງຈອນ ປິດຂອງໂຮງຮຽນ, ຊຶ່ງຄາດ ວ່າ ຈະຈັບຕົວຜູ້ກະທຳຜິດມາດຳ ເນີນຄະດີໃນໄວໆນີ້.

      ເຈົ້າໜ້າທີ່ຕຳຫຼວດ ໃຫ້ຮູ້ວ່າ:ນອກຈາກນີ້ແລ້ວໃນອາທິດຜ່ານມານີ້ກໍມີປາກົດການລັກຊັບເກີດຂຶ້ນຫຼາຍແຫ່ງສ່ວນ ໃຫຍ່ ແມ່ນການລັກລົດຈັກທີ່ມີຈຳນວນເສຍຫາຍກ່ວາ 10 ຄັນ ຄື: ໃນວັນທີ 16 ພຶດສະພານີ້ ໄດ້ມີຄົນຮ້າຍລັກເອົາລົດຈັກ ຮອນ ດາເວບ ຂອງປະຊາຊົນຢູ່ເຂດບ້ານ ໂພນທັນ ເມືອງ ໄຊເສດຖາ ນະຄອນຫຼວງວຽງຈັນ ແລ້ວຫຼົບໜີ ແລະ ກໍລະນີອື່ນໆອີກ ຊຶ່ງເປັນປາກົດການຫຍໍ້ທໍ້ທີ່ແກ້ໄຂຍາກ.

      ທ່ານ ພັນໂທ ຄຳແພງ ໄຊຍະລາດ ຮອງຫົວໜ້າຫ້ອງຕຳຫຼວດ ນະຄອນຫຼວງວຽງຈັນ ກ່າວວ່າ: ບັນຫາປາກົດການຫຍໍ້ທໍ້ ທາງສັງຄົມທີ່ຕ້ອງເລັ່ງແກ້ໄຂຄື: ລັກຊັບພົນລະເມືອງ, ປຸ້ນຈີ້-ຊີງຊັບ ຊຶ່ງ ເກີດຂຶ້ນຢ່າງຕໍ່ເນື່ອງ ແລະ ມີຄວາມຮຸນແຮງຂຶ້ນກວ່າ ເກົ່າ ໂດຍຜູ້ຮ້າຍໄດ້ມີການໃຊ້ອາວຸດປືນ, ມີດ ແລະ ງ້າວ ເພື່ອເຄື່ອນໄຫວ, ສາເຫດຫລັກກໍແມ່ນຍ້ອນບັນຫາສິ່ງເສບຕິດ, ການ ມົ້ວສຸມ ໄພສັງຄົມ ແລະ ການພະນັນຄື: ໃນ 3 ເດືອນຕົ້ນປີນີ້ ຢູ່ນະຄອນ ຫຼວງວຽງຈັນ ມີປາກົດການຫຍໍ້ ທໍ້ເກີດຂຶ້ນ 200 ກວ່າເລື່ອງ, ໃນນີ້ ເຈົ້າໜ້າທີ່ສາມາດແກ້ໄຂໄດ້ກວ່າ 150 ເລື່ອງ, ສ່ວນໃຫຍ່ແມ່ນຄະ ດີລັກຊັບກວມ 80%, ສົ່ງຜົນເສຍ ຫາຍ ລົດຈັກ 60 ກວ່າຄົນ ແລະ ຊັບສິນອື່ນໆອີກ. ຕໍ່ສະພາບດັ່ງກ່າວຈິ່ງຮຽກຮ້ອງໃຫ້ທົ່ວສັງຄົມເປັນເຈົ້າການໃນການແກ້ໄຂ ແລະ ການເປັນເຈົ້າການສຶກສາ ອົບຮົມລູກຫຼານ ແລະ ລາຍງານສະພາບໃຫ້ເຈົ້າໜ້າທີ່ຮັບຮູ້ເພື່ອ ຫາຊ່ອງທາງແກ້ໄຂໃຫ້ທັນການ.