ກະຊວງສາທາລະນະສຸກ​​ຊີ້ແຈງລາວຍັງບໍ່ມີກໍລະນີຕິດເຊື້ອພະຍາດໄຂ້ຫວັດສັດປີກ

        ທ່ານ ສາສະດາຈານ ດ.ຣ ເອກສະຫວ່າງ ວົງວິຈິດ ລັດຖະມົນຕີວ່າການ ກະ ຊວງສາທາລະນະສຸກເປີດເຜີຍ ໃຫ້ຮູ້ເມື່ອ ບໍ່ດົນມານີ້ວ່າ: ເຖິງວ່າກົມລ້ຽງສັດ ແລະ ການປະມົງກະຊວງກະ ສິກຳ ແລະ ປ່າໄມ້ ກວດພົບເຊື້ອພະຍາດໄຂ້ຫວັດສັດປີກ ສາຍພັນ H5N1 ລະບາດໃນສັດປີກຢູ່ ບ້ານນາຕໍໃຫຍ່ເມືອງ ແລະ ແຂວງໄຊຍະ ບູລີເມື່ອກາງເດືອນມີຖຸນາຜ່ານມາ ແລະ ໄດ້ ເກັບຕົວຢ່າງຄົນທີ່ສຳພັດກັບສັດປີກໃນ ພື້ນທີ່ດັ່ງກ່າວມາວິເຄາະ ແລະ ຢັ້ງຢືນວ່າບໍ່ພົບການຕິດເຊື້ອ ຂອງພະຍາດດັ່ງກ່າວໃນ ຄົນ ແລະ ຢືນຢັນວ່າຢູ່ລາວຍັງບໍ່ມີລາຍງານກໍລະນີຕິດເຊື້ອພະຍາດໄຂ້ຫວັດສັດປີກສາຍພັນໃດໆ. ແຕ່ແນວໃດກໍຕາມກະຊວງ ສາທາລະນະສຸກບໍ່ໄດ້ຖືເບົາໃນການປ້ອງກັນ ແລະ ຄວບຄຸມໂດຍສະ ເພາະໄດ້ເພີ້ມທະວີເປັນພິເສດໃນ ການເຝົ້າລະວັງ ດ້ວຍ ຫລາຍມາດຕະການ. ພ້ອມທັງສຸມໃສ່ການ ໂຄສະນາສຸຂະສຶກສາໃນບັນດາ ແຂວງ ແລະ ເຂດທີ່ມີຄວາມ ສ່ຽງໂດຍສະເພາະ 5 ແຂວງ ພາກເໜືອ, ແຂວງພາກກາງ ແລະ ພາກໃຕ້ຈຳນວນໜຶ່ງ. ນອກຈາກນີ້ຍັງໄດ້ຈັດຝຶກອົບຮົມດ້ານຄວາມຮູ້ແກ່ເຈົ້າໜ້າ ທີ່ປະຈຳ ດ່ານກວດກາຄົນເຂົ້າ-ອອກ ເມືອງເພື່ອເພີ່ມທະວີການປ້ອງກັນ ແລະ ຄວບຄຸມການລະບາດຂອງພະຍາດດັ່ງກ່າວ ພ້ອມທັງເປີດໂທລະສັບສາຍດ່ວນ 166 ເພື່ອຮັບແຈ້ງເມື່ອພົບກໍລະນີສັດປີກເສຍຊີວິດເພື່ອໃຫ້ສາມາດຮັບມືບໍ່ໃຫ້ພະຍາດ ດັ່ງກ່າວແຜ່ຂະຫຍາຍວົງກ້ວາງ.