laophatthananewspaper: ລັດຖະມົນຕີສາທາຕອບຂໍ້ຂ້ອງໃຈສະມາຊິກສະພາແຫ່ງຊາດກ່ຽວກັບການສຸມໃສ່ຕ້ານໄຂ້ຍຸງລາຍ

ການຕ້ານພະຍາດໄຂ້ຍຸງລາຍ ແລະ ບັນຫາການປະກັນສັງຄົມ ແມ່ນໜຶ່ງໃນບັນດາຂໍ້ຂ້ອງໃຈຂອງສະມາຊິກສະພາແຫ່ງຊາດ ແລະ ໄດ້ສະເໜີໃຫ້ລັດຖະມົນຕີວ່າການກະຊວງສາທາລະນະສຸກ ທ່ານ ສຈ. ດຣ ເອກສະ ຫວ່າງ ວົງວິຈິດ ໄດ້ເຂົ້າຊີ້ແຈງອະທິບາຍການແກ້ໄຂບັນຫາດັ່ງກ່າວຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດໃນອາທິດທີ່ຜ່ານມາ, ໂດຍທ່ານ ລັດຖະມົນຕີ ໄດ້ໃຫ້ຄຳອະ ທິບາຍແບບກົງໄປກົງມາຕໍ່ວຽກງານນີ້, ຊຶ່ງຜ່ານມາໄດ້ເກີດມີຫາງສຽງຈົ່ມວ່າຈາກສັງຄົມເປັນບໍ່ໜ້ອຍ.

ທ່ານ ລັດຖະມົນຕີ ສຈ. ດຣ ເອກສະຫວ່າງ ວົງວິຈິດ ໄດ້ຊີ້ແຈງວ່າ: ການລະບາດຂອງພະຍາດໄຂ້ຍຸງລາຍ ແມ່ນພົວພັນເຖິງຫລາຍປັດໄຈເຊັ່ນ: ຄວາມໜາແໜ້ນຂອງຍຸງ, ຄວາມແອອັດ ຫລື ໜາແໜ້ນຂອງປະຊາຊົນ, ການພັດທະນາພື້ນຖານໂຄງລ່າງທີ່ອຳນວຍໃຫ້ການຂະຫຍາຍຕົວຂອງຍຸງ, ການເຄື່ອນຍ້າຍຂອງປະຊາຊົນ, ບ່ອນວາງໄຂຂອງຍຸງມີຫລາຍ ໂດຍສະເພາະລະດູຝົນ. ດ້ວຍເຫດຜົນທີ່ວ່າໄຂ້ຍຸງລາຍ ເປັນພະຍາດທີ່ເກີດຈາກຍຸງເປັນພາຫະນະນຳເຊື້ອ ແລະ ການທີ່ຈະກຳຈັດຍຸງ ຫລື

ໜອນນ້ຳຂອງຍຸງ, ຈຶ່ງເປັນບັນຫາທີ່ຫຍຸ້ງຍາກ ເພາະຕ້ອງອາໄສການຮ່ວມມືທຸກພາກສ່ວນ ໃນສັງຄົມເພື່ອຊ່ວຍໃນການຫລຸດ ຜ່ອນ ຫລື ທຳລາຍປັດໃຈຕ່າງໆໃນການແຜ່ຜາຍຂອງຍຸງ ລາຍ. ເຖິງຢ່າງໃດກໍດີການຈັດຕັ້ງປະຕິບັດຕົວຈິງໃນການຕ້ານພະ ຍາດດັ່ງກ່າວ ນັບວ່າມີຄວາມຫຍຸ້ງຍາກສົມຄວນ, ຜ່ານມາກະ ຊວງສາທາລະນະສຸກ ໄດ້ມີນະໂຍບາຍໃນການຄວບຄຸມ ແລະ ຕ້ານພະຍາດໄຂ້ຍຸງລາຍດ້ວຍວິທີການຕ່າງໆຄື: ຫັນເອົາວຽກງານຕິດຕາມໜອນນ້ຳຍຸງລາຍ ໃນແຕ່ລະຄຸ້ມບ້ານ ໃຫ້ກາຍເປັນວຽກຂອງຄະນະພັກ, ອຳນາດການປົກຄອງບ້ານ, ໂດຍໃຫ້ປະ ຊາຊົນແຕ່ລະຄອບຄົວມີສ່ວນຮ່ວມ; ລັດຖະບານກໍຄືຄະນະກຳ ມະການແຫ່ງຊາດ ໄດ້ແຈ້ງການຕ້ານ ແລະ ຄວບຄຸມພະຍາດຕິດຕໍ່ ໃຫ້ອຳນາດການປົກຄອງທຸກຂັ້ນເອົາໃຈໃສ່ຊີ້ນຳປະຊາຊົນ ກຳຈັດໜອນນ້ຳ ແລະ ທຳລາຍແຫລ່ງເພາະພັນຂອງຍຸງລາຍເປັນວຽກງານປົກກະຕິໃນການສ້າງແຜນພັດທະນາບ້ານ ພ້ອມນີ້ກໍໄດ້ພະຍາຍາມຫລຸດຜ່ອນການເສຍຊີວິດດ້ວຍການປັບປຸງການປິ່ນ ປົວໃຫ້ດີຂຶ້ນ, ເພີ່ມທະວີວຽກງານໂຄສະນາ ສຸຂະສຶກສາໃຫ້ປະຊາ ຊົນຮັບຮູ້ເຖິງວິທີກັນພະຍາດຫລາຍຂຶ້ນ ແລະ ເຝົ້າລະວັງຢ່າງໃກ້ຊິດຕໍ່ການເກີດຂອງພະຍາດນີ້.

ສຳລັບຕໍ່ຂໍ້ຂ້ອງໃຈຂອງສະມາຊິກສະພາແຫ່ງຊາດກ່ຽວກັບບັນຫາການປະກັນສຸຂະພາບ ທ່ານລັດຖະມົນຕີ ໄດ້ໃຫ້ຄຳຊີ້ແຈງວ່າ: ການປະກັນສຸຂະພາບ ແມ່ນເຮັດໃຫ້ປະຊາຊົນເຂົ້າເຖິງການບໍລິການສຸຂະພາບ ຢ່າງທົ່ວເຖິງ ແລະ ເປັນທຳ, ແຕ່ປະ ຕິບັດຕົວຈິງ ຍັງມີຫລາຍອັນຫຍຸ້ງ ຍາກ ໂດຍສະເພາະການໃຫ້ບໍລິ ການປິ່ນປົວຈະໃຫ້ຖືກໃຈໝົດທຸກຄົນກໍຍັງເປັນບັນຫາເປັນຕົ້ນບັນຫາທີ່ຕິດພັນກັບການປະກັນສຸຂະ ພາບຄວາມເຂົ້າໃຈຂອງຜູ້ໃຫ້ບໍລິ ການ ແລະ ປະຊາຊົນ ລວມທັງພະນັກງານລັດຖະ ກອນຍັງມີຂໍ້ຈຳກັດ ແລະ ໃນລະບົບປະກັນສຸ ຂະພາບເອງກໍມີລະບຽບການສະເພາະອີກ. ປັດຈຸບັນລະບົບປະກັນສຸຂະພາບພາກລັດ (ອປລ) ແລະ ລະບົບປະກັນສຸຂະພາບພາກວິສາຫະກິດ (ອປສ) ຍັງຂື້ນກັບກະ ຊວງແຮງງານ ແລະ ສະຫວັດດີການສັງຄົມ ເປັນຜູ້ຄຸ້ມຄອງ, ກຳນົດລະບຽບນະໂຍບາຍ ຕ່າງໆ ລວມທັງເງິນມອບເໝົາໃຫ້ໂຮງໝໍລັດສຳລັບ ອປລ ແມ່ນ 85 ພັນກີບ/ຄົນ/ປີ ແລະ ສຳລັບ ອປສແມ່ນ 90 ພັນກີບ/ ຄົນ/ປີ. ຕໍ່ບັນຫາທີ່ສະມາຊິກປະກັນສຸຂະພາບ ຫລື ຄົນເຈັບທົ່ວໄປ ບໍ່ໄດ້ຮັບການບໍລິການທີ່ເພິ່ງພໍໃຈນັ້ນ, ທ່ານລັດຖະມົນຕີ ໄດ້ ໃຫ້ການອະທິບາຍວ່າ: ທາງກະຊວງສາທາລະນະສຸກ ໄດ້ເອົາໃຈໃສ່ປັບປຸງສຶກສາອົບຮົມຈັນຍາທຳ ແລະ ການບໍລິການໃຫ້ພະ ນັກງານໂຮງໝໍ ແລະ ໃຫ້ໂຮງໝໍຕ່າງໆມີກ່ອງຮັບຄຳຄິດເຫັນວາງໄວ້ຊຶ່ງສະມາຊິກປະກັນສຸຂະພາບກໍຄືປະຊາຊົນມີບັນຫາຂໍ້ຂ້ອງໃຈສາມາດສົ່ງຂ່າວຜ່ານເຂົ້າຫາຫ້ອງການປະກັນສຸຂະພາບໄດ້ ຫລື ຕິດຕໍ່ໜ່ວຍງານໂດຍກົງ, ໂດຍພາກສ່ວນດັ່ງກ່າວພ້ອມທີ່ຈະຮັບເອົາການຕຳນິສົ່ງຂ່າວຕໍ່ການໃຫ້ບໍລິການໄດ້ທຸກເວລາ.