ທ່ານ ໄຊສີ ສັນຕິວົງ ລັດຖະມົນຕີວ່າການກະຊວງພາຍໃນ,
ໄດ້ໃຫ້ສຳພາດຕໍ່ສື່ໃນວັນທີ 8 ສິງຫາຜ່ານມານີ້ ວ່າ: ການສອບເສັງເຂົ້າເປັນລັດຖະກອນພາກຄວາມຮູ້ທົ່ວໄປຄັ້ງນີ້ເປັນຄັ້ງທີ
2 ທີ່ໄດ້ຈັດຂຶ້ນພ້ອມກັນຢູ່ນະຄອນຫລວງວຽງຈັນ ແລະ 17 ແຂວງທົ່ວປະເທດເມື່ອເດືອນກໍລະກົດຜ່ານມາ
ເຊິ່ງມີຜູ້ລົງທະບຽນສະໝັກສອບເສັງທັງໝົດ 32.241 ຄົນ, ແຕ່ເຂົ້າສອບເສັງຕົວຈິງ
31.821 ຄົນ, ບໍ່ມາສອບເສັງ 420 ຄົນຈຳນວນທີ່ເສັງຜ່ານຄະແນນ 50% ຂຶ້ນໄປມີ
28.734 ຄົນ ເທົ່າກັບ 90,30% ຂອງຈຳນວນນັກສອບເສັງທັງໝົດ, ໃນນີ້ຊັ້ນສູງຂຶ້ນໄປເສັງຜ່ານຈຳນວນ
26.302 ຄົນເທົ່າກັບ 90,18%, ຊັ້ນກາງລົງມາເສັງຜ່ານ 2.432 ຄົນ ເທົ່າກັບ
91,57%.
ລັດຖະມົນຕີວ່າການກະຊວງພາຍໃນໃຫ້ຮູ້ວ່າ:
ສຳລັບໂກຕາລັດຖະກອນສົກປີ 2014- 2015 ນີ້, ລັດຖະບານ ໄດ້ຕົກ ລົງອະນຸມັດ 5 ພັນຄົນ, ຖ້າທຽບໃສ່ປີຜ່ານມາແມ່ນຫລຸດລົງ
1/4 ເຊິ່ງສົກປີ 2013 ໄດ້ຮັບບັນຈຸເປັນລັດຖະກອນ ປະມານ
16 ພັນຄົນ. ປີຜ່ານມາການສອບເສັງເຂົ້າລັດຖະກອນໄດ້ມີຄວາມຫຍຸ້ງຍາກຫລາຍດ້ານ
ແລະ ເປັນສິ່ງທ້າທາຍ, ສະນັ້ນປີນີ້ ພວກເຮົາຈຶ່ງໄດ້ຖອດຖອນບົດຮຽນ ແລະ ປັບປຸງໃຫ້ດີຂຶ້ນ.
ຄຽງຄູ່ກັນນີ້ ກໍໄດ້ຮັບການເອົາໃຈໃສ່ເປັນຢ່າງດີຈາກ ອຳນາດການປົກຄອງທ້ອງຖິ່ນທຸກຂັ້ນທັງຢູ່ສູນກາງ
ແລະ ທ້ອງຖິ່ນຕະຫລອດຮອດນັກທຸລະກິດ, ຊາວຄ້າຂາຍ ແລະ ພໍ່ແມ່-ຜູ້ປົກຄອງນັກສອບເສັງທີ່ໃຫ້ການຮ່ວມມື
ຈຶ່ງເຮັດໃຫ້ການສອບເສັງຄັ້ງນີ້ໄດ້ຮັບຜົນສຳເລັດດີພໍສົມຄວນ. ພ້ອມນັ້ນ,
ກໍຍ້ອນບັນດານັກສອບເສັງທັງໝົດໄດ້ມີຄວາມເອົາໃຈໃສ່ຄົ້ນຄວ້າຮ່ຳຮຽນ, ອ່ານຄຳຖາມ-ຄຳຕອບຢ່າງລະອຽດເຮັດໃຫ້ການສອບເສັງມີຄວາມເປັນລະບຽບຮຽບຮ້ອຍ
ແລະ ມີຜູ້ສອບເສັງຜ່ານຫລາຍກວ່າ90%.
No comments:
Post a Comment