ຜູ້ວ່າ ທຫລ ເນັ້ນໃຫ້ສຶບຕໍ່ຮັກສາສະຖຽນລະພາບເງິນຕາໃຫ້ໝັ້ນທ່ຽງ

     ທ່ານ ສົມຟາວ ໄຟສິດ ຜູ້ວ່າການທະນາຄານແຫ່ງ ສປປ ລາວ (ທຫລ), ໄດ້ກ່າວຕໍ່ກອງປະຊຸມເປີດກວ້າງຄະນະພັກທະ ນາຄານແຫ່ງ ສປປ ລາວ ຄັ້ງທີ 9 ສະໄໝທີ II ໃນວັນທີ 11 ສິງຫາ ນີ້ວ່າ: ເພື່ອຊຸກຍູ້ໃຫ້ການປະຕິບັດແຜນພັດທະນາເສດຖະ ກິດຂະຫຍາຍຕົວຕາມລະດັບທີ່ລັດຖະບານກຳນົດໄວ້ນັ້ນ, ພວກເຮົາຕ້ອງໄດ້ສືບຕໍ່ຮັກສາສະຖຽນລະພາບເງິນຕາແຫ່ງຊາດ ໃຫ້ໝັ້ນທ່ຽງ ແລະ ໜັກແໜ້ນດ້ວຍ ການນຳໃຊ້ນະໂຍບາຍເງິນຕາ ຢ່າງມີໄຫວພິບ ແລະ ນຳໃຊ້ ເຄື່ອງມືທີ່ມີການຄຸ້ມຄອງເງິນ ຕາໃຫ້ມີປະສິດທິຜົນກວ່າເກົ່າເພື່ອ ຄວບຄຸມອັດຕາແລກປ່ຽນໃຫ້ມີຄວາມສະຫງົບ ແລະ ອັດ ຕາເງິນ ເຟີໃຫ້ຢູ່ລະດັບຕ່ຳ, ພ້ອມກັນນີ້, ຕ້ອງເອົາໃຈໃສ່ສ້າງ ແລະ ປັບ ປຸງນິຕິກຳຕ່າງໆເພື່ອເຮັດໃຫ້ການຄຸ້ມຄອງທະນາຄານທຸລະກິດ ແລະ ສະຖາບັນ ການເງິນຫັນເຂົ້າສູ່ລະບຽບກົດໝາຍສອດຄ່ອງກັບມາດຕະຖານສາກົນຍິ່ງຂຶ້ນເພື່ອໃຫ້ລູກຄ້າສາມາດເຂົ້າເຖິງແຫລ່ງທຶນ ແລະ ການບໍລິການຂອງທະນາຄານທຸລະກິດ ແລະ ສະຖາບັນການເງິນໄດ້ສະ ດວກເປັນຕົ້ນແມ່ນການແກ້ໄຂແຫລ່ງທຶນໃຫ້ທຸລະ ກິດຂະໜາດ ນ້ອຍ ແລະ ການຜະລິດເປັນສີນຄ້າໃຫ້ຫລາຍຂຶ້ນເພື່ອສົ່ງອອກ ແລະ ຫລຸດຜ່ອນການນຳເຂົ້າສີນຄ້າຈາກຕ່າງປະ ເທດລົງເທື່ອລະກ້າວ, ນອກຈາກນີ້, ໃຫ້ຖືສຳຄັນການແກ້ໄຂຄວາມທຸກຍາກຂອງປະຊາຊົນໂດຍສະເພາະແມ່ນການຜ່ອນຜັນ

ອັດຕາດອກເບ້ຍແລະ ໄລຍະຊຳລະໜີ້ຂອງລູກຄ້າທີ່ໄດ້ຮັບຜົນກະທົບຈາກໄພທຳມະຊາດຕາມເຂື່ອນໄຂເໝາະສົມ, ຄຽງຄູ່ກັນ ນັ້ນແມ່ນໃຫ້ສືບຕໍ່ພັດທະນາລະບົບຄຸ້ມຄອງບໍລິຫານ ແລະ ການບໍລິການຂອງທະນາຄານໃຫ້ຫັນໄປສູ່ຄວາມທັນສະໄໝເພື່ອ ອຳນວຍຄວາມສະດວກໃຫ້ການດຳເນີນທຸລະກິດ ແລະ ການເຮັດທຸລະກຳທາງການເງິນດ້ວຍຮູບແບບຕ່າງໆມີຄວາມສະດວກ ຍິ່ງຂຶ້ນ.

     ໃນມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ IX ຂອງພັກ ໄດ້ຕີລາຄາວ່າ: ໃນໄລຍະ 6 ເດືອນ ຜ່ານມາທະນາຄານແຫ່ງ ສປປ ລາວ,ໄດ້ມີຜົນງານຫລາຍດ້ານ ເປັນຕົ້ນແມ່ນການຮັກສາສະຖຽນລະພາບເງິນຕາແຫ່ງ ຊາດໄວ້ໄດ້ຢ່າງໝັ້ນທ່ຽງ, ອັດຕາເງິນ ເຟີ້ສະເລ່ຍຢູ່ໃນລະດັບ 5,2%, ອັດ ຕາແລກປ່ຽນມີຄວາມສະຫງົບ ເມື່ອທຽບໃສ່ທ້າຍປີ ຜ່ານມາ, ເງິນກີບແຂງຄ່າ-ອ່ອນຄ່າຢູ່ໃນເກນທີ່ກຳນົດໄວ້, ຄັງສຳຮອງເງິນຕາຕ່າງປະເທດສາມາດກຸ້ມການນຳເຂົ້າໄດ້ 4,6ເດືອນ, ການລະດົມທຶນໄດ້ເຮັດຢ່າງຕັ້ງໜ້າ, ການສະໜອງສີນເຊື່ອຂອງລະບົບທະນາຄານໄດ້ເພີ່ມຂຶ້ນ 8,15%, ອັດຕາສ່ວນ ໜີ້ເສຍຢູ່ ໃນລະດັບກຳນົດໄວ້ ແລະ ການຄຸ້ມຄອງທະນາຄານທຸລະກິດ ແລະ ສະຖາບັນການເງິນໄດ້ຫັນໄປສູ່ລະບຽບກົດໝາຍຢ່າງ ເຄັ່ງຄັດ.