ທຳລາຍຊີ້ນສັດນຳເຂົ້າຜິດກົດໝາຍຫລາຍຮ້ອຍກິໂລ

     ເຈົ້າໜ້າທີ່ພະແນກອຸດສະຫະກຳ ແລະ ການຄ້ານະຄອນຫລວງວຽງຈັນໃຫ້ຮູ້ວ່າ: ເມື່ອບໍ່ດົນມານີ້ໄດ້ນຳເອົາຊີ້ນງົວ, ໝູ, ເປັດ ແລະ ໄກ່ຫລາຍກວ່າ 300 ກິໂລ, ມີມູນຄ່າປະມານ 11 ລ້ານ ກວ່າກີບ, ໄປທຳລາຍຖີ້ມ, ພາຍຫລັງກວດພົບວ່າຊີ້ນສັດ ຈຳນວນດັ່ງກ່າວແມ່ນໄດ້ລັກລອບນຳເຂົ້າມາຈາກປະເທດໃກ້ຄຽງ, ເຊິ່ງຜ່ານການກວດກາວິເຄາະພົບວ່າ: ຊີ້ນດັ່ງກ່າວມີສານຕົກ ຄ້າງປົນເປື້ອນ ແລະ ມີສານຕ້ານເຊື້ອ ກຸ່ມ B ເຈືອປົນ, ເຊິ່ງເປັນອັນຕະລາຍຕໍ່ສຸຂະພາບຂອງຜູ້ບໍລິໂພກ. ໂດຍແມ່ນຂອງນາງ ລີ ຊຽວ ຫລິງ ສັນຊາດຈີນ  ອາໄສຢູ່ບ້ານທົ່ງຂັນຄຳ ເມືອງຈັນທະບູລີ ນະຄອນຫລວງວຽງຈັນ ພ້ອມທັງໄດ້ສຶກສາອົບຮົມຜູ້ ກ່ຽວຕາມລະບຽບການໂດຍສະເພາະການນຳເອົາສີນຄ້າ ຫລື ສີ້ນສ່ວນສັດມາຈຳໜ່າຍຕ້ອງຖືກຕາມລະບຽບກົດໝາຍ ແລະ ມີຄວາມສະອາດປອດໄພຕໍ່ຜູ້ບໍລິໂພກ.

    ເຈົ້າໜ້າທີ່ພະແນກອຸດສະຫະກຳ ແລະ ການຄ້າ ໃຫ້ຮູ້ວ່າ: ປັດຈຸ ບັນ, ກຳລັງເຈົ້າໜ້າທີ່ຂອງຕົນພວມເລັ່ງລົງກວດກາຊີ້ນ ສັດຢູ່ໃນບັນດາຟາມ, ໂຮງຂ້າສັດ, ສາງເຢັນ ແລະ ທ້ອງຕະຫລາດໃນນະຄອນຫລວງວຽງຈັນເພື່ອຮັບປະກັນໃຫ້ຜູ້ປະກອບ ການດຳເນີນກິດຈະການຖືກຕ້ອງຕາມລະບຽບກົດໝາຍ ແລະ ທັງຮັບປະກັນຄວາມປອດໄພທາງໂພສະນາການນຳອີກ.