ກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີວ່າການຄັ້ງທີ 2 ລະຫວ່າງກະຊວງການຕ່າງປະເທດ ລາວ-ຫວຽດນາມ

ໃນວັນທີ 2-4 ພະຈິກ 2015, ສະຫາຍ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດລາວ ໄດ້ນຳພາຄະນະຜູ້ແທນກະຊວງການຕ່າງປະເທດລາວ ເດີນທາງໄປເຂົ້າຮ່ວມກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີວ່າການຄັ້ງທີ 2 ລະຫວ່າງສອງກະຊວງການຕ່າງປະເທດລາວ-ຫວຽດນາມ, ທີ່ນະຄອນຫຼວງຮ່າໂນ້ຍ, ຫວຽດນາມ.

ກອງປະຊຸມໄດ້ຈັດຂຶ້ນໃນວັນທີ 3 ພະຈິກ 2015 ທີ່ເຮືອນຮັບແຂກລັດຖະບານ, ໂດຍການເປັນປະທານຮ່ວມຂອງສະຫາຍ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດລາວ ແລະ ສະຫາຍຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດຫວຽດນາມ ແລະ ມີຄະນະກົມ ແລະ ວິຊາການຈາກບັນດາກົມກ່ຽວຂ້ອງຂອງສອງກະຊວງການຕ່າງປະເທດເຂົ້າຮ່ວມ.

            ໃນກອງປະຊຸມ, ສອງຝ່າຍໄດ້ແຈ້ງໃຫ້ກັນຊາບສະພາບການພາຍໃນຂອງແຕ່ລະປະເທດ ແລະ ຕີລາຄາຄືນການຈັດຕັ້ງປະຕິບັດຂໍ້ຕົກລົງຮ່ວມມືລະຫວ່າງສອງລັດຖະບານ ກໍຄືລະຫວ່າງສອງກະຊວງການຕ່າງປະເທດ ໄລຍະ 2014-2020. ສອງຝ່າຍເປັນເອກະພາບກັນວ່າກະຊວງການຕ່າງປະເທດສອງປະເທດໄດ້ມີບົດບາດສຳຄັນຮ່ວມກັບບັນດາກະຊວງຂະແໜງການກ່ຽວຂ້ອງຂອງສອງປະເທດຈັດຕັ້ງປະຕິບັດຢ່າງມີປະສິດທິຜົນບັນດາຂໍ້ຕົກລົງຮ່ວມມືທີສອງພັກ, ສອງລັດ ໄດ້ຕົກລົງກັນອັນປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງປະເທດໃຫ້ມີປະສິດທິຜົນນັບມື້ນັບຫຼາຍຂຶ້ນໃນທຸກໆຂົງເຂດ.

ປີ 2015 ເປັນປີທີ່ມີຄວາມໝາຍຄວາມສຳຄັນພິເສດສຳລັບສອງປະເທດຊຶ່ງນັບຕັ້ງແຕ່ຕົ້ນປີມາສອງຝ່າຍໄດ້ມີການແລກປ່ຽນການຢ້ຽມຢາມລະຫວ່າງການນຳຂັ້ນສູງສອງປະເທດຢ່າງຟົດຟື້ນ. ນອກນີ້, ສອງຝ່າຍຍັງໄດ້ຮ່ວມກັນ ແລະຈະຮ່ວມກັນສະເຫຼີມສະຫຼອງຫຼາຍວັນສຳຄັນທາງປະຫວັດສາດເຊັ່ນ: ວັນສະຖາປະນາສສຫວຽດນາມຄົບຮອບ 70 ປີ, ວັນສະຖາປານາສປປລາວຄົບຮອບ 40 ປີ, ວັນຄ້າຍວັນເກີດປະທານ ໂຮ່ຈີມິນຄົບຮອບ 125 ປີ ແລະວັນຄ້າຍວັນເກີດປະທານ ໄກສອນພົມວິຫານຄົບຮອບ 95 ປີ.

ສອງຝ່າຍຍັງໄດ້ເປັນເອກະພາບກັນຈະສືບຕໍ່ຮ່ວມມືກັນຢ່າງໃກ້ຊິດ ເພື່ອເສີມຂະຫຍາຍສາຍພົວພັນລະຫວ່າງສອງກະຊວງການຕ່າງປະເທດກໍຄືລະຫວ່າງສອງປະເທດລາວ-ຫວຽດນາມ ໃນການກະກຽມໃຫ້ແກ່ການຢ້ຽມຢາມຂອງການນຳຂັ້ນສູງສອງປະເທດທີ່ຈະມີຂຶ້ນໃນທ້າຍປີນີ້ ແລະ ຕົ້ນປີໜ້າ; ຮ່ວມກັນກະກຽມໃຫ້ແກ່ກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍລາວ-ຫວຽດນາມ ຄັ້ງທີ 38 ທີ່ ສປປ ລາວ ຈະເປັນເຈົ້າພາບໃນທ້າຍປີ 2015 ນີ້, ຮ່ວມກັນຈັດຕັ້ງຜັນຂະຫຍາຍຂໍ້ຕົກລົງຮ່ວມມືລະຫວ່າງສອງກະຊວງການຕ່າງປະເທດ ໄລຍະ 2014-2020; ໃຫ້ໄດ້ລົງນາມອະນຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍແດນປະເທດລາວ-ຫວຽດນາມ ແລະສັນຍາວ່າດ້ວຍລະບຽບການຄຸ້ມຄອງຊາຍແດນແລະດ່ານຊາຍແດນລາວ-ຫວຽດນາມເພື່ອໃຫ້ສາມາດລົງນາມໄດ້ໃນທ້າຍປີ 2015 ນີ້, ແລະ ທັງສາມາດຈັດຕັ້ງພິທີສະຫຼຸບໂຄງການປັກຫຼັກໝາຍຖີ່ໃຫ້ໄດ້ໃນທ້າຍປີນີ້. ພ້ອມນີ້, ຝ່າຍລາວຍັງໄດ້ສະແດງຄວາມຂອບໃຈຕໍ່ກະຊວງການຕ່າງປະເທດຫວຽດນາມທີ່ໄດ້ຊ່ວຍສ້າງຊັບພະຍາກອນມະນຸດໃຫ້ແກ່ກະຊວງການຕ່າງປະເທດຂອງລາວເຮົາ.

ນອກນີ້, ສອງຝ່າຍຍັງໄດ້ປຶກສາຫາລືກັນກ່ຽວກັບການຮ່ວມມືໃນຂອບຫຼາຍຝ່າຍ, ໂດຍສະເພາະໃນຂອງອາຊຽນ, ພ້ອມກັນແລກປ່ຽນກ່ຽວກັບສະພາບການສາກົນ ແລະ ພາກພື້ນທີ່ສອງຝ່າຍມີຄວາມສົນໃຈ. ພ້ອມນີ້ຍັງໄດ້ເນັ້ນໜັກວ່າ, ທ່າມກາງສະພາບການສາກົນ ແລະພາກພື້ນທີ່ຜັນແປໄປຢ່າງໄວວາຄືໃນປະຈຸບັນສອງກະຊວງການຕ່າງປະເທດທີ່ເປັນໜຶ່ງໃນເສນາທິການສຳຄັນໃຫ້ແກ່ຂັ້ນເທິງ ແມ່ນມີຄວາມຈຳເປັນທີ່ຈະຕ້ອງໄດ້ຮ່ວມກັນແລກປ່ຽນສະພາບການ ແລະ ຄຳຄິດຄຳເຫັນກັນ ເປັນປະຈຳທັງການແລກປ່ຽນການຢ້ຽມຢາມຫຼື ເວລາພົບປະໃນເວທີສາກົນ ແລະ ພາກພື້ນຕ່າງໆ. ທັງນີ້, ກໍເພື່ອຮັບປະກັນໃຫ້ທັນການ ແລະ ມີປະສິດທິຜົນ. ສປປ ລາວ ໄດ້ສະແດງຄວາມຂອບໃຈພັກ, ລັດຖະບານກໍ່ຄືການຕ່າງປະເທດຫວຽດນາມທີ່ຍາມໃດກໍ່ໄດ້ໃຫ້ການຊ່ວຍເຫຼືອທີ່ທັນການ ແລະ ມີປະສິດທິຜົນ ແຕ່ ສປປ ລາວ ພວກຂ້າພະເຈົ້າຕະຫຼອດມາ, ຫວຽດນາມສະແດງຄວາມພ້ອມທີ່ຈະໃຫ້ການສະໜັບສະໜູນ ສປປ ລາວ ທັງທາງດ້ານບົດຮຽນ ແລະ ວັດຖຸ ເພື່ອຊ່ວຍໃຫ້ ສປປ ລາວ ສຳເລັດການເປັນປະທານອາຊຽນ ໃນປີ 2016 ນີ້.

ມື້ຕໍ່ມາ, ສະຫາຍ ທອງລຸນ ສີສຸລິດ ໄດ້ເຂົ້າຢ້ຽມຂ່ຳນັບສະຫາຍເລຂາທິການໃຫຍ່ຫງວຽນຝູຈ໋ອງ, ສະຫາຍປະທານປະເທດ ເຈື່ອງ ເຕີນຊາງ ແລະ ສະຫາຍນາຍົກລັດຖະມົນຕີຫງວຽນ ເຕິນຢຸງ, ຊຶ່ງສອງຝ່າຍໄດ້ຕີລາຄາສູງຕໍ່ຜົນສຳເລັດຂອງກອງປະຊຸມປຶກສາຫາລືດ້ານການເມືອງນີ້, ພ້ອມທັງຊີ້ນຳສອງກະຊວງການຕ່າງປະເທດຮ່ວມກັນຈັດຕັ້ງປະຕິບັດຢ່າງມີປະສິດທິຜົນບັນດາຂໍ້ຕົກລົງຮ່ວມມືຂັ້ນສູງລະຫວ່າງການນຳສອງປະເທດກໍຄືຂໍ້ຕົກລົງຮ່ວມມືລະຫວ່າງສອງກະຊວງການຕ່າງປະເທດໄລຍະ 2014-2020.

ສອງຝ່າຍໄດ້ສະແດງຄວາມເພິ່ງພໍໃຈຕໍ່ການຂະຫຍາຍຕົວຢ່າງບໍ່ຢຸດຢັ້ງຂອງສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ພ້ອມທັງຢືນຢັນວ່າຫວຽດນາມຍາມໃດກໍຖືສຳ ຄັນ ແລະ ໃຫ້ບູລິມະສິດສູງສຸດ ໃນວຽກງານເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານລາວ-ຫວຽດນາມ.

ໃນໂອກາດເຂົ້າຮ່ວມກອງປະຊຸມໃນຄັ້ງທີກະຊວງການຕ່າງປະເທດລາວ ໄດ້ຈັດພິທີປະດັບຫຼຽນ ແລະ ມອບໃບຍ້ອງຍໍລັດຖະບານໃຫ້ແກ່ການນຳ, ອະດີດການນຳ, ກົມກອງລວມໝູ່ ແລະ ບຸກຄົນກະຊວງການຕ່າງປະເທດຫວຽດນາມປະກອບມີ: 3 ກົມກອງລວມໝູ່ ແລະ 15 ບຸກຄົນ, ທີ່ມີຜົນງານດີເດັ່ນໃນການປະກອບສ່ວນຊ່ວຍເຫຼືອທີ່ດີ ໃນການພັດທະນາ ສປປລາວຕະຫຼອດມາໂດຍສະເພາະແມ່ນເສີມຂະຫຍາຍການພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານທີ່ມີມາແຕ່ດົນນານລະຫວ່າງລາວ-ຫວຽດນາມ ໃຫ້ນັບມື້ນັບຂຽວສົດງົດງາມແລະແໜ້ນແຟ້ນຍິ່ງໆຂຶ້ນ. ນອກນີ້, ບັນດາສະຫາຍຍັງໄດ້ປະກອບສ່ວນຊ່ວຍເຫຼືອ ສປປ ລາວ ໃນເວທີສາກົນພາກພື້ນຕ່າງໆກໍຄືໃນເວລາທີ່ ສປປ ລາວ ເປັນປະທານກອງປະຊຸມສຳຄັນຕ່າງໆໃນນັ້ນກໍມີ ASEM 9 ໃນປີ 2012 ທີ່ຜ່ານມາແລະ ຍັງລວມເຖິງການເປັນປະທານອາຊຽນຂອງ ສປປ ລາວ ໃນປີ 2016 ອີກດ້ວຍ.

ສ່ວນກະຊວງການຕ່າງປະເທດຫວຽດນາມ, ກໍໄດ້ຕາງໜ້າລັດຖະບານ ແຫ່ງ ສສ ຫວຽດນາມ ຈັດພິທີມອບອຸປະກອນເຄື່ອງຊ່ວຍເຫຼືອ ສປປ ລາວ ເພື່ອຮັບໃຊ້ການເປັນປະທານອາຊຽນໃນປີ 2016 ໂດຍແມ່ນສະຫາຍຟ້າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດເປັນຜູ້ຕາງໜ້າມອບ ແລະ ຕາງໜ້າລັດຖະບານ ສປປ ລາວ ຮັບເຄື່ອງຊ່ວຍເຫຼືອດັ່ງກ່າວແມ່ນສະຫາຍ ທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ. ສຳລັບເຄື່ອງຊ່ວຍເຫຼືອດັ່ງກ່າວປະກອບມີທັງໝົດ 5 ລາຍການເຊິ່ງມີມູນຄ່າ 4,92 ຕື້ດົງ. ພ້ອມດຽວກັນນັ້ນ, ລັດຖະບານແຫ່ງສສຫວຽດນາມຍັງໄດ້ໃຫ້ການຊ່ວຍເຫຼືອແບບຢືມໄລຍະສັ້ນຈຳນວນ 1 ລາຍການ.

ຄະນະໄດ້ສຳເລັດການເຮັດວຽກທີ່ສສຫວຽດນາມ ແລະ ກັບຄືນປະເທດດ້ວຍຄວາມສະຫວັດດີພາບໃນວັນທີ 4 ພະຈິກ 2015.