ໄຂກອງປະຊຸມວິທະຍາສາດ ແລະ ເຕັກໂນໂລຊີ ອາຊຽນ ຄັ້ງທີ 70

     ກອງປະຊຸມຄະນະກຳມະການ ວິທະຍາສາດ ແລະ ເຕັກໂນໂລຊີ ອາຊຽນ ຄັ້ງທີ 70 ໄດ້ໄຂຂຶ້ນໃນວັນທີ 4 ຕຸລານີ້, ທີ່ນະຄອນຫລວງວຽງຈັນ, ເປັນຄັ້ງທຳອິດຢູ່ລາວ, ໂດຍການເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນ ຕີວ່າການກະຊວງວິທະຍາສາດ ແລະ ເຕັກໂນໂລຊີ, ປະທານສະພາວິທະຍາສາດແຫ່ງຊາດ ພ້ອມດ້ວຍບັນດາຄະນະກຳມະການດ້ານວິທະຍາສາດ ແລະ ເຕັກໂນໂລຊີ ອາຊຽນເຂົ້າຮ່ວມຫລາຍປະເທດ.

     ທ່ານປະທານສະພາວິທະຍາສາດແຫ່ງຊາດ ກ່າວວ່າ: ກອງປະຊຸມຄັ້ງນີ້ ໄດ້ດຳເນີນໃນໄລຍະເວລາທີ່ມີຄວາມໝາຍສຳຄັນຫລາຍ ເພາະເປັນໄລຍະເວລາທີ່ບັນດາປະເທດອາຊຽນ ພວມສ້າງຕົນເພື່ອກ້າວເຂົ້າສູ່ປະຊາຄົມເສດຖະກິດອາ ຊຽນ ໃນທ້າຍເດືອນທັນວາ 2015ນີ້ ແລະ ກໍເປັນໄລຍະເວລາທີ່ທົ່ວປວງຊົນລາວທັງຊາດ ພວມອອກແຮງແຂ່ງຂັນກັນສ້າງຜົນ

ງານຂ່ຳນັບຮັບຕ້ອນວັນສະຖາປະນາປະເທດຊາດຂອງຕົນ ຄົບຮອບ 40ປີ ຢ່າງມີຄວາມໝາຍ ໄປພ້ອມກັບປະຊາຊາດໃນທົ່ວໂລກຫັນເປົ້າໝາຍສະຫະສະຫວັດໄປສູ່ການພັດທະນາແບບຍືນຍົງ ແລະ ໃນປີ 25016 ຈະມາເຖິງນີ້ ສປປ ລາວ ຈະໄດ້ຮັບກຽດເປັນປະທານອາຊຽນ ຕາມຮອບວຽນ ແລະ ເປັນເຈົ້າພາບກອງປະຊຸມສຸດອາຊຽນອີກຄັ້ງໜຶ່ງ, ຊຶ່ງມາຮອດປັດຈຸບັນ ອາຊຽນໄດ້ມີການປ່ຽນແປງຢ່າງເລິກເຊິ່ງ ໃນການເຊື່ອມໂຍງກັບລະບົບເສດຖະກິດຂອງໂລກ ແລະ ການເຊື່ອມຈອດ ລະຫວ່າງບັນດາປະເທດໃນພາກພື້ນ, ສິ່ງນີ້ ກໍຍ້ອນໝາກຜົນການຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ, ໂດຍສະເພາະແມ່ນເຕັກໂນໂລຊີຂໍ້ມູນຂ່າວສານ, ການຄົມມະນາຄົມຂົນສົ່ງ, ດ້ານການແພດ, ການຜະລິດກະສິກຳ, ອຸດສາຫະກຳ ແລະ ອື່ນໆ ພ້ອມນັ້ນ ກອງປະຊຸມຄັ້ງນີ້ ຈະໄດ້ຮ່ວວມກັນປຶກສາຫາລືເພື່ອແກ້ໄຂບັນຫາຄົງຄ້າງ ແລະ ສິ່ງທ້າທ້າຍຕ່າງໆ ດ້ວຍການພິຈາລະນາຮັບຮອງເອົາແຜນປະຕິບັດງານອາຊຽນ ທາງດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ ໄລຍະປີ 2016-2025, ດັ່ງກອງປະຊຸມອະນຸກຳມະການຕ່າງໆ ທີ່ໄດ້ສຸມໃສ່ປຶກສາຫາລື ໃນຫລາຍໆຄັ້ງຜ່ານມາ ແລະ ໄດ້ຕົກລົງເຫັນດີນຳກັນແລ້ວ ເພື່ອສະເໜີໃຫ້ກອງປະຊຸມ ASEAN COST ແລະ AMMST ຮັບຮອງເອົາຢູ່ໃນກອງປະຊຸມຄັ້ງນີ້, ຊຶ່ງຈະເປັນໂອກາດເປີດທາງໃຫ້ແກ່ການສ້າງແຜນຈັດຕັ້ງປະຕິບັດ ແລະ ຂະຫຍາຍການຮ່ວມມື ແບບຕ່າງຝ່າຍຕ່າງມີຜົນປະໂຫຍດ ລະຫວ່າງປະເທດສະມາຊິກອາຊຽນດ້ວຍກັນ ແລະ ລະຫວ່າງອາຊຽນກັບບັນດາປະເທດຄູ່ເຈລະຈາ ແລະ ຄູ່ຮ່ວມພັດທະນາອື່ນໆ, ພ້ອມນີ້ ປະທານຄະນະກຳມະການດ້ານວິທະຍາສາດ ແລະ ເຕັກໂນໂລຊີ ອາຊຽນ ຍັງຈະໄດ້ປຶກສາຫາລື ແລະ ສະຫລຸບບັນຫາຕ່າງໆ ເພື່ອສະເໜີໃຫ້ກອງປະຊຸມລັດຖະມົນຕີວິທະຍາສາດ ແລະ ເຕັກໂນໂລຊີອາຊຽນຮັບຮອງເອົາ.