laophatthananewspaper: ລາວ-ຈີນລົງນາມສັນຍາຮ່ວມທຶນສ້າງຕັ້ງບໍລິສັດດາວທຽມລາວ

ພິທີເຊັນສັນຍາຮ່ວມທຶນສ້າງຕັ້ງບໍລິສັດດາວທຽມລາວ ໃນຕຳແໜ່ງ 128,5 ອົງສາຕາເວັນອອກລະຫວ່າງ ສປປ ລາວ ແລະ ສປ ຈີນ ໄດ້ມີຂຶ້ນໃນວັນທີ 30 ຕຸລາແລ້ວນີ້ທີ່ນະຄອນຫຼວງວຽງຈັນໂດຍການໃຫ້ກຽດເຂົ້າຮ່ວມຂອງ ທ່ານດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳເສດຖະກິດມະຫາພາກ, ບໍລິການແລະວຽກງານໄປສະນີ, ໂທລະຄົມມະນາຄົມ ແລະການສື່ສານ ເຊິ່ງສັນຍາດັ່ງກ່າວໄດ້ຮັບການລົງນາມຈາກທ່ານຫຽມ ພົມມະຈັນລັດຖະ ມົນຕີວ່າການກະຊວງໄປສະນີ, ໂທລະຄົມມະນາຄົມ ແລະການສື່ສານ, ທ່ານ ດຣ.ລຽນ ທິແກ້ວລັດຖະມົນຕີວ່ານການກະຊວງການເງິນ,ທ່ານກວານຮົວປິງເອກອັກຄະລັດຖະທູດວິສາມັນຜູ້ມີອຳນາດເຕັມ ສປ ຈີນ ປະຈຳ ສປປລາວ.

ດາວທຽມດວງທຳອິດຂອງລາວທີ່ມີຊື່ວ່າ LaoSat-1 ຈະໄດ້ສົ່ງສູ່ວົງໂຄຈອນຂອງໂລກໃນວັນທີ 21 ພະຈິກທີ່ຈະມາເຖິງນີ້ເຊິ່ງເປັນໄລຍະທີ່ປະຊາຊົນລາວທັງຊາດພວມຟົດຟື້ນສ້າງຂະບວນການຕ້ອນຮັບວັນສ້າງຕັ້ງ ສປປ ລາວ ຄົບຮອບ 40 ປີ.ດາວທຽມລາວນີ້ຈະເປັນຂອງຂວັນອັນລ້ຳຄ່າສຳລັບວັນປະຫວັດສາດສຳຄັນດັ່ງກ່າວ. ພາຍຫລັງໄດ້ເລີ່ມກໍ່ສ້າງມາແຕ່ເດືອນພຶດສະພາ 2008 ດ້ວຍການຂໍຈ່ອງ ແລະນຳໃຊ້ວົງໂຄຈອນ 128,5 ອົງສາດ້ວຍການນຳໃຊ້ທຶນຮອນເປັນຈຳນວນຫຼາຍ, ຈົມານຮອດວັນທີ 11 ກໍລະກົດ 2012 ຈຶ່ງໄດ້ມີການເຊັນສັນຍາເງິນກູ້ກັບທະນາຄານຂາເຂົ້າ-ຂາອອກຂອງຈີນໃນວົງເງິນຫລາຍກວ່າ258 ລ້ານໂດລາສະຫະລັດ.

ພາຍຫຼັງສຳເລັດການສົ່ງດາວທຽມ LaoSat-1 ຂຶ້ນສູ່ວົງໂຄຈອນແລ້ວ, ຈະມີການສ້າງຕັ້ງບໍລິສັດຮ່ວມທຶນ ເຊິ່ງປະກອບມີລັດຖະບານລາວແລະບໍລິສັດຜູ້ມີປະສົບການດ້ານການບໍລິການດາວທຽມລະດັບສາກົນ ຄືລັດຖະບານລາວ 45%, ບໍລິສັດ China-Pacific Mobile Telecommunications Satellite (APMT) ຂອງຈີນ 35%, ບໍລິສັດ Space Star Technology (SSTC) ຂອງຈີນ 15% ແລະບໍລິສັດ AsiaPacific Satellite Technology (APST) (ຮົງກົງ) 5%. ການລົງນາມໃນສັນຍາຮ່ວມທຶນດັ່ງກ່າວແມ່ນເພື່ອຄວາມສະດວກໃຫ້ບໍລິສັດຮ່ວມທຶນມີຄວາມສະດວກໃນວຽກບໍລິການການສື່ສານຜ່ານດາວທຽມປະເພດຕ່າງໆຢູ່ພາຍໃນແລະຕ່າງປະເທດເຊັ່ນ: ການສື່ສານສຳລັບວຽກງານຂອງລັດ, ການໃຫ້ເຊົ່າຊ່ອງດາວທຽມ, ການບໍລິການໂທລະພາບຜ່ານດາວທຽມ, ການສື່ສານສຳລັບເຂດຊົນນະບົດ ແລະຫ່າງໄກສອກຫຼີກ, ການສຶກສາແລະການແພດທາງໄກ, ລະບົບໂທລະຄົມມະນາ ຄົມ ແລະອິນເຕີເນັດ, ການສື່ສານໃນວຽກງານບັນເທົາທຸກ ແລະຟື້ນຟູຈາກໄພພິບັດເປັນຕົ້ນ.

ສປປລາວ ມີຄວາມພາກພູມໃຈທີ່ຈະມີດາວທຽມເປັນຂອງຕົນເອງເພື່ອນຳໃຊ້ເຂົ້າໃນການພັດທະນາເສດຖະ ກິດ-ສັງຄົມ, ທັງຈະເປັນແຫຼ່ງລາຍຮັບອັນສຳຄັນອັນໜຶ່ງຂອງຕົນແລະຈະເປັນຂະແໜງການໜຶ່ງໃໝ່ເພື່ອປະກອບສ່ວນປະຕິບັດແນວທາງນະໂຍບາຍຂອງລັດຖະບານໃນການຫັນປະເທດເປັນອຸດສາຫະກຳແລະທັນສະໄໝໃຫ້ນັບມື້ຂະ ຫຍາຍຕົວຢ່າງວ່ອງໄວ.