ກອງປະຊຸມລັດຖະບານສະໄໝສາມັນ
ປະຈຳເດືອນກຸມ ພາ 2016 ໄດ້ໄຂຂຶ້ນໃນວັນທີ 23 ກຸມພາໂດຍການເປັນປະທານຂອງ
ທ່ານນາຍົກລັດຖະມົນຕີ, ທອງສິງ ທຳມະວົງ ເພື່ອປຶກສາຫາລື, ແລະ ຮັບຮອງບັນຫາສໍາຄັນຂອງຊາດ ຄື:
1. ພິຈາລະນາ ຮັບຮອງເອົາການປັບປຸງດຳລັດ
ວ່າດ້ວຍທຸລະກິດໂຮງຊວດຈໍາ ເພື່ອກຳນົດຫຼັກການ, ລະບຽບການກ່ຽວກັບການສ້າງຕັ້ງ,
ການເຄື່ອນໄຫວ, ການຄຸ້ມຄອງ ແລະ ຕິດຕາມກວດກາ ທຸລະກິດຊວດຈໍາ
ເພື່ອເຮັດໃຫ້ການດຳເນີນທຸລະກິດດັ່ງກ່າວ
ເປັນລະບົບ, ຖືກຕ້ອງຕາມກົດໝາຍແລະ ລະບຽບການ.
2. ຮັບຮອງເອົາ ແຜນພັດທະນາວຽກງານຖະແຫຼງຂ່າວ,
ວັດທະນະທໍາ ແລະ ທ່ອງທ່ຽວ 5 ປີ (2016-2020), ຍຸດທະສາດ 10 ປີ (2016-2025) ແລະ
ວິໄສທັດຮອດປີ 2030 ເຊິ່ງ ວຽກງານຖະແຫຼງຂ່າວສື່ມວນຊົນ
ເປັນຂະແໜງການໜຶ່ງ ທີ່ມີການຂະຫຍາຍຕົວຢ່າງວ່ອງໄວ ແລະ ກວ້າງຂວາງຢູ່ໃນ
ບັນດາປະເທດຕ່າງໆໃນໂລກ,
ປະຈຸບັນຫຼາຍປະເທດໄດ້ເອົາໃຈໃສ່ ແລະ
ໃຫ້ຄວາມສໍາຄັນຕໍ່ວຽກງານຖະແຫຼງຂ່າວສື່ມວນຊົນ
ເພາະປຽບເໝືອນອາວຸດທີ່ແຫຼມຄົມຂອງປະເທດຊາດ.ຕໍ່ບັນຫາດັ່ງກ່າວ,
ກອງປະຊຸມໄດ້ມີທິດຊີ້ນໍາໃຫ້ພາກສ່ວນກ່ຽວຂ້ອງນໍາໄປປັບປຸງຕື່ມຕາມການປະກອບຄໍາເຫັນຂອງສະມາຊິກລັດຖະບານ
ເປັນຕົ້ນຕ້ອງສຶກສາຄົ້ນຄວ້າໃຫ້ມີຄວາມລະອຽດຈະແຈ້ງໃນແຕ່ລະບັນຫາ
ໂດຍສະເພາະວຽກງານຖະແຫຼງຂ່າວສື່ມວນຊົນ
ຊຶ່ງເປັນວຽກທີ່ມີຄວາມສໍາຄັນຫຼາຍໃນການໂຄສະນາເຜີຍແຜ່ແນວທາງນະໂຍບາຍຂອງ ພັກ ແລະ
ລັດຖະບານ ແນໃສ່ສຶກສາອົບຮົມໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈ ກ່ຽວກັບສະພາບການ,
ຂໍ້ມູນຂ່າວສານຕ່າງໆ ທີ່ເປັນປະໂຫຍດ, ອັນໃດທີ່ເຫັນວ່າບໍ່ເໝາະສົມ
ກໍ່ຕ້ອງມີການແຈ້ງກ່າວເຕືອນ ແລະ ສຶກສາອົບຮົມ, ຮັບປະກັນໃຫ້ມີຄວາມວ່ອງໄວ, ຊັດເຈນ ແລະ
ມີເນື້ອໃນທີ່ເລິກເຊິ່ງ ມີຫຼາຍຮູບແບບຫຼາຍສີ ຮັກສາໄດ້ລັກສະນະຊາດ
ໄປຕາມທິດຫັນເປັນທັນສະໄໝ ໃນນັ້ນກ່ອນອື່ນໝົດຕ້ອງເອົາໃຈໃສ່ໃນການສ້າງບຸກຄະລາກອນໃຫ້ໄດ້ທັງປະລິມານ
ແລະ ຄຸນນະພາບ. ສໍາລັບຂະແໜງການທ່ອງທ່ຽວ: ຕ້ອງເອົາໃຈໃສ່ຍາດແຍ່ງ ແລະ
ດຶງດູດນັກທ່ອງທ່ຽວໃຫ້ມີຈໍານວນເພີ່ມຂຶ້ນ ພ້ອມທັງເອົາໃຈໃສ່ປັບປຸງ ແລະ
ພັດທະນາພື້ນຖານໂຄງລ່າງ ເພື່ອຮັບໃຊ້ໃຫ້ແກ່ຂະແໜງການທ່ອງທ່ຽວ, ສ້າງສະຕິໃຫ້ທຸກພາກສ່ວນໃນສັງຄົມ ແລະ ປະຊາຊົນ
ມີຄວາມສີວິໄລທາງດ້ານຈິດໃຈ, ມີຄວາມເອື້ອເຟື້ອເພື່ອແຜ່ ພ້ອມນັ້ນ,
ກໍ່ຕ້ອງເອົາໃຈໃສ່ປັບປຸງໃນຂອດການບໍລິການ
ເພື່ອສ້າງເງື່ອນໄຂໃນການບໍລິການຮັບໃຊ້ໃຫ້ແກ່ນັກທ່ອງທ່ຽວ.
3. ໄດ້ພິຈາລະນາ ຮັບຮອງການປັບປຸງດຳລັດວ່າດ້ວຍລະບອບນະໂຍບາຍຕໍ່ນັກກິລາ
ແລະ ຄູຝຶກທີມຊາດ ເພື່ອກຳນົດຫຼັກການ,
ລະບຽບການໃນການປະຕິບັດລະບອບນະໂຍບາຍບຳລຸງ, ອຸດໜູນ, ໃຫ້ລາງວັນ, ນາມມະຍົດ,
ການປະກັນສັງຄົມແກ່ນັກກິລາ ແລະ ຄູຝຶກທີມຊາດ ເພື່ອຊຸກຍູ້,
ສົ່ງເສີມການສ້າງ ແລະ ພັດທະນານັກກິລາ ແລະ ຄູຝຶກທີມຊາດ
ໃຫ້ທຸ້ມເທເຮື່ອແຮງເຂົ້າໃນການຝຶກແອບ ແລະ ເຂົ້າແຂ່ງຂັນກິລາ,
ຍາດແຍ່ງເອົາຜົນງານດີເດັ່ນໃນເວທີສາກົນ, ສ້າງຄຸນງາມຄວາມດີ,
ນຳເອົາກຽດຊື່ສຽງມາສູ່ປະເທດຊາດ ແນໃສ່ສົ່ງເສີມນັກກິລາລາວ
ໃຫ້ກາຍເປັນນັກກິລາອາຊີບ ປະກອບສ່ວນເຂົ້າໃນການພັດທະນາກິລາລະດັບສູງຂອງປະເທດເຮົາ
ໃຫ້ມີຄວາມກ້າວໜ້າ ແລະ ທັນສະໄໝ.
4. ເຫັນດີຮັບຮອງດຳລັດວ່າດ້ວຍ
ນໍ້າມັນເຊື້ອໄຟຊີວະພາບ ເພື່ອກຳນົດຫຼັກການ, ລະບຽບການ ແລະ ມາດຕະການ
ກ່ຽວກັບການຄຸ້ມຄອງ, ການເຄື່ອນໄຫວ, ການກວດກາການຜະລິດ, ການປຸງແຕ່ງ ແລະ
ການຈໍາໜ່າຍນໍ້າມັນເຊື້ອໄຟຊີວະພາບ ລວມທັງການບໍລິການ
ເພື່ອເຮັດໃຫ້ການນໍາໃຊ້, ການດຳເນີນທຸລະກິດນໍ້າມັນເຊື້ອໄຟຊີວະພາບເປັນລະບົບ
ຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງ ແນໃສ່ສຶກສາຄວາມເປັນໄປໄດ້ ແລະ
ພັດທະນາທ່າແຮງດ້ານວັດຖຸດິບທີ່ມີພາຍໃນປະເທດ ແລະ ນຳໃຊ້ຊັບພະຍາກອນທຳມະຊາດຢ່າງປະຢັດ,
ຍົກສູງມູນຄ່າຜະລິດຕະພັນກະສິກໍາ, ຫຼຸດຜ່ອນຜົນກະທົບຕໍ່ສິ່ງແວດລ້ອມ ແລະ
ພັດທະນາຕາມທິດທີ່ຍືນຍົງ,
ປະກອບສ່ວນຊຸກຍູ້ການປະຕິບັດແຜນພັດທະນາເສດຖະກິດ-ສັງຄົມຂອງຊາດ ພ້ອມທັງ
ເປັນການຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ດີຂຶ້ນເທື່ອລະກ້າວ.
ໃນຕອນທ້າຍກອງປະຊຸມ
ທ່ານນາຍົກລັດຖະມົນຕີ ເອົາໃຈໃສ່ປະຕິບັດວຽກງານທີ່ເປັນຈຸດສຸມໃນເດືອນ
ມີນາ2016 ດ້ວຍຄວາມຮັບຜິດຊອບສູງຄື: ໃຫ້ບັນດາກະຊວງ-ອົງການ ແລະ ທ້ອງຖິ່ນ ເອົາໃຈໃສ່ຜັນຂະຫຍາຍຜົນກອງປະຊຸມໃຫຍ່ຄັງທີ X ຂອງພັກປະຊາຊົນປະຕິວັດລາວໃນຂອບເຂດທົ່ວປະເທດຢ່າງທົ່ວເຖິງ.
ໃນເດືອນມີນານີ້ ຈະມີການປ່ອນບັດຄັດເລືອກເອົາສະມາຊິກສະພາແຫ່ງຊາດ
ຊຸດທີ 8 ແລະ ສະພາປະຊາຊົນແຂວງ
ແລະ ນະຄອນຫລວງ ຈຶ່ງໃຫ້ທຸກພາກສ່ວນ ເປັນເຈົ້າການໃນການເຂົ້າຮ່ວມເພື່ອໃຊ້ສິດຂອງຕົນປ່ອນບັດຄັດເລືອກສະມາຊິກສະພາແຫ່ງຊາດ
ແລະ ສະພາປະຊາຊົນຂັ້ນແຂວງ, ນະຄອນຫລວງຄັ້ງນີ້ໃຫ້ໄດ້ຮັບຜົນດີ ແລະ
ມີຄວາມສຳເລັດຕາມຄາດຫມາຍ.
ໃຫ້ພາກສ່ວນທີ່ກ່ຽວຂ້ອງສືບຕໍ່ເປັນເຈົ້າພາບໃນການກະກຽມຄວາມພ້ອມດ້ານຕ່າງໆ ເພື່ອເປັນປະທານກອງປະຊຸມສຸດຍອດອາຊຽນ, ກອງປະຊຸມປິ່ນອ້ອມຕ່າງໆ ໂດຍປະສານງານສົມທົບກັບກະຊວງການຕ່າງປະເທດ. ສືບຕໍ່ເອົາໃຈໃສ່ໃນການຈັດເກັບລາຍຮັບເຂົ້າງົບປະມານໃຫ້ໄດ້ຕາມຄາດຫມາຍ ດ້ວຍວິທີການ ແລະ ມາດຕະການທີ່ຮັດກຸມ ເພື່ອກຳຈັດການຕົກເຮ່ຍເສຍຫາຍ ແລະ ແກ້ໄຂໃຫ້ທັນເວລາ, ໃຫ້ກະຊວງອຸດສາຫະກຳ ແລະ ການຄ້າເອົາໃຈໃສ່ຄຸ້ມຄອງ ແລະ ຄວບຄຸມລາຄາສິນຄ້າໃນທ້ອງຕະຫລາດເປັນຕົ້ນແມ່ນສິນຄ້າບໍລິໂພກບໍ່ໃຫ້ເພີ່ມຂຶ້ນຫລາຍເຊິ່ງຈະມີຜົນກະທົບຕໍ່ຊີວິດການເປັນຢູ່ຂອງພະນັກງານ, ທະຫານ, ຕຳຫລວດ ແລະ ປະຊາຊົນເຮົາ, ໃຫ້ກະຊວງແຮງງານ ແລະ ສະຫວັດດີການສັງຄົມກະຊວງປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ຄຸ້ມຄອງບັນຫາແຮງງານຄົນຕ່າງດ້າວ ແລະ ຄົນບໍ່ມີສັນຊາດທີ່ເຄື່ອນໄຫວເຮັດວຽກຢູ່ປະເທດເຮົາໃຫ້ຖືກຕ້ອງຕາມລະບຽບກົດໝາຍ ແລະ ໃຫ້ເອົາໃຈໃສ່ເຮັດວຽກງານປ້ອງກັນຊາດ-ປ້ອງກັນຄວາມສະຫງົບແຂງແຮງກວ່າເກ່ົາເປັນຕົ້ນການໃສ່ຮ້າຍປ້າຍສີຕໍ່ແນວທາງນະໂຍບາຍຂອງພັກ-ຂອງລັດເຮົາ, ປຸ້ນຈີ້, ຊິງຊັບ, ກຸ່ມແກ້ງນັກເລງອັນຕະພານ, ບັນຫາຢາເສບຕິດ, ອຸປະຕິເຫດໃນທ້ອງຖະຫນົນ ແລະ ອື່ນໆ.
No comments:
Post a Comment