ກອງປະຊຸມສະຫລຸບຜົນງານການເຄື່ອນໄຫວວຽກງານປະຈຳປີ
2015 ຂອງບໍລິສັດ ລັດວິສາຫະກິດ ລາວໂທລະຄົມມະນາຄົມ, ໄດ້ຈັດຂຶ້ນໃນວັນທີ 5 ກຸມພາຜ່ານມານີ້, ຢູ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ຫຽມ ພົມມະຈັນ
ລັດຖະມົນຕີວ່າການກະຊວງໄປສະນີ ໂທລະຄົມ ມະນາຄົມ ແລະ ການສື່ສານ, ພ້ອມດ້ວຍຜູ້ອຳນວຍການ, ຮອງຜູ້ອຳນວຍການ ແລະ ພະນັກງານພາຍໃນບໍລິສັດດັ່ງກ່າວເຂົ້າຮ່ວມເປັນຈຳນວນຫລວງຫລາຍ.
ທ່ານ ທອງໃສ ຊານໄຊຍະ ອຳນວຍການບໍລິສັດ ລັດວິສາຫະກິດ ລາວໂທລະຄົມມະນາຄົມ ໄດ້ຂຶ້ນຜ່ານບົດສະຫລຸບຜົນງານການເຄື່ອນໄຫວວຽກງານປະຈຳປີ 2015 ແລະ ແຜນວຽກໃນປີ
2016, ຊຶ່ງ
ທ່ານໄດ້ຍົກໃຫ້ເຫັນຜົນງານພົ້ນເດັ່ນຫລາຍດ້ານ ທີ່ລາວໂທລະຄົມມະນາຄົມ ສາມາດຍາດມາໄດ້ໃນໜຶ່ງປີຜ່ານມາເປັນຕົ້ນ ໄດ້ລົງທຶນໃສ່ການຂະຫຍາຍຕາໜ່າງໂທລະຄົມມະນາຄົມ ໃນມູນຄ່າ 46 ລ້ານໂດລາສະຫະລັດ, ໃນນັ້ນມີລະບົບໂທລະສັບມືຖື
38,13 ລ້ານໂດລາສະຫະລັດ, ລະບົບສາຍສົ່ງ 3,6 ລ້ານໂດລາສະຫະລັດ, ໂທລະສັບຕັ້ງໂຕະ 0,3 ລ້ານໂດລາສະຫະລັດ, ລະບົບອິນເຕີເນັດ ແລະ ອື່ນໆ
4 ລ້ານໂດລາສະຫະລັດ, ພ້ອມນີ້ ຍັງໄດ້ເປີດໃຫ້ບໍລິການໂທລະສັບລະຫວ່າງປະເທດເພີ່ມຂຶ້ນເປັນ 9 ເຄືອຂ່າຍ, ໃນນັ້ນມີ ດາຕາ
ໂຣມມິງ (Data
Roaming) ເພີ້ມຂຶ້ນ 28 ເຄືອຂ່າຍ, ຊຶ່ງທັງໝົດເຫລົ່ານີ້ ມັນໄດ້ກາຍເປັນປັດໃຈຫລັກທີ່ຊ່ວຍໃຫ້ລາວໂທລະຄົມ ໄດ້ຮັບຄວາມໄວ້ວາງໃຈຂອງລູກຄ້ານັບມື້ຫລາຍຂຶ້ນ, ໂດຍສະເລ່ຍແລ້ວ. ມາຮອດປັດຈຸບັນ ມີລູກຄ້າໃຊ້ໂທລະສັບມືຖືໃນເຄືອຂ່າຍຂອງຕົນ 1,50 ລ້ານກວ່າໝາຍເລກ, ໂທລະສັບຕັ້ງໂຕະ 43 ພັນກວ່າເລກໝາຍ, ໂທລະສັບວິນໂຟນ 444 ແສນກວ່າເລກໝາຍ ແລະ ອິນເຕີເນັດ 569.000 ກວ່າລູກຄ້າ, ໃນນີ້ 2015 ຜ່ານມາ ລາວໂທລະຄົມ ສາມາດສ້າງລາຍຮັບໄດ້ທັງໝົດ 1.659 ຕື້ກີບ, ເທົ່າກັບ 119,2% ຂອງແຜນການ, ໃນນັ້ນ ມີກຳໄລສຸດທິ 358 ຕື້ກີບ, ເທົ່າກັບ 151,7% ຂອງແຜນການ, ສາມາດປະຕິບັດພັນທະໃຫ້ລັດຖະບານໄດ້ທັງໝົດ 450 ກວ່າຕື້ກີບ, ຊຶ່ງກວມເອົາອັດຕາສ່ວນ 32,2% ຂອງລາຍຮັບທີ່ປະຕິບັດໄດ້ໃນປີຜ່ານມາ, ທຽບໃສ່ປີ
2014 ເພີ່ມຂຶ້ນ 37,9%. ນອກຈາກນີ້ ລາວໂທລະຄົມມະນາຄົມ ຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ໃຫ້ພະນັກງານ, ກຳມະກອນໃຫ້ດີຂຶ້ນ ໄປພ້ອມໆກັບການດຳເນີນທຸລະກິດ ແລະ ໃນໄລຍະຜ່ານມາ ລາວໂທລະຄົມ ຍັງໄດ້ປະກອບສ່ວນຊ່ວຍເຫລືອ ແລະ ໃຫ້ການອຸປະຖຳຕໍ່ອົງການຈັດຕັ້ງພັກ-ລັດ ແລະ ສັງຄົມ ເປັນມູນຄ່າ 3,6 ຕື້ກວ່າກີບ.
ສຳລັບປີ
2016ນີ້, ລາວໂທລະຄົມຈະສູ້ຊົນສ້າງລາຍຮັບໃຫ້ໄດ້ທັງໝົດ 1.790 ຕື້ກວ່າກີບ, ຄາດຄະເນກຳໄລສຸດທິໃຫ້ໄດ້ 376 ຕື້ກວ່າກີບ, ເພີ່ມຂຶ້ນ 13,3% ຈາກປີ 2015 ແລະ ຄາດຄະເນວ່າຈະສາມາດມອບພັນທະໃຫ້ລັດຖະບານໄດ້ 380,1 ຕື້ກີບ. ແລະ ຈະໄດ້ສຸມໃສ່ສືບຕໍ່ປັບປຸງ ແລະຂະຫຍາຍຕາໜ່າງລະບົບໂທລະຄົມມະນາຄົມ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ
ແລະ ເປັນລະບົບທັນສະໄໝເພື່ອຮັບປະກັນໃຫ້ແກ່ການບໍລິການສັງຄົມມີປະສິດທິພາບສູງຂຶ້ນ.
No comments:
Post a Comment