ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ແຕ່ 2016-2020 ຂອງລັດຖະບານໄດ້ກໍານົດໄວ້ຢ່າງຊັດເຈນຄື: ຕ້ອງສ້າງໂຄງປະກອບເສດຖະກິດກະສິກໍາ-ປ່າໄມ້ຕິດພັນກັບອຸດສະຫະກໍາ ແລະ ການບໍລິການ, ໂດຍຖືເອົາຂະແໜງກະສິກໍາເປັນພື້ນຖານໃນການຄໍ້າປະກັນສະ ບຽງອາຫານໃຫ້ໜັກແໜ້ນ, ຂະນະດຽວກັນລວມຍອດຜະລິດຕະພັນພາຍໃນ
(GDP) ຂະຫຍາຍຕົວສະເລ່ຍບໍ່ໃຫ້ຫລຸດ 7,5% ຕໍ່ປີ,
ໂດຍລັດຖະບານໄດ້ກໍານົດ 7 ແຜນງານສໍາຄັນເພື່ອຊຸກຍູ້ການຂັບເຄື່ອນລະບົບເສດຖະກິດແຫ່ງຊາດໃຫ້ເຕີບໃຫຍ່ຂະຫຍາຍຕົວຕໍ່ເນື່ອງ, ໝັ້ນທ່ຽງ ແລະ ສົມດຸນຄື:
(1)ຕ້ອງຫັນປ່ຽນໂຄງປະກອບເສດຖະກິດໃຫ້ໄປຕາມທິດຫັນເປັນອຸດສະຫະກໍາ ແລະ ທັນສະໄໝ
ໂດຍສຸມໃສ່ພັດທະນາຂະແໜງເສດຖະກິດທີ່ມີທ່າແຮງ, ໃຫ້ຜົນຕອບແທນໄວ,
ສ້າງມູນຄ່າເພີ່ມ, ຖານການຜະລິດໜັກແໜ້ນ, ຫລາກຫລາຍ ແລະ ປັບປຸງການບໍລິການໃຫ້ມີຄຸນະພາບ.(2) ພັດທະນານະໂຍບາຍການເງິນ ແລະ ເງິນຕາໃຫ້ມີຄວາມສອດຄ່ອງ ແລະ ກົມກຽວ,
ພັດທະນາຄັງສະສົມຂອງລັດເປັນເງິນ,ວັດຖຸ ແລະ ສີນຄ້າເພື່ອໃຫ້ສາມາດຕອບສະໜອງຄວາມຕ້ອງການອັນຮີບດ່ວນສຸກເສີນ ແລະ ເພື່ອດຸ່ນດ່ຽງດັດສົມກົນໄກເສດຖະກິດ.(3) ການສະໜອງທຶນຕ້ອງມີຄວາມສອດຄ່ອງກັບຄວາມຕ້ອງການພັດທະນາເສດຖະກິດ-ສັງຄົມຂອງແຕ່ລະຂະແໜງການ, ທ້ອງຖິ່ນ ແລະ ເຂດແຄວ້ນ ແລະ ຄວາມສາມາດ້ານທຶນຮອນ ແລະ ນໍາໃຊ້ແຫລ່ງທຶນຢ່າງມີປະສິດທິຜົນເພື່ອຫລີກເວັ້ນການສ້າງໜີ້ສີນຄຸມເຄືອ.(4) ອິງໃສ່ທ່າແຮງຂອງແຕ່ລະພາກ, ທ້ອງຖິ່ນເພື່ອສ້າງສໍາພັນເສດຖະກິດລະຫວ່າງບ້ານ,
ເມືອງ ແລະ ພາກຕ່າງໆ, ຈັດສັນເຂດພັດທະນາທີ່ເປັນຕົວແບບ, ເຂດເສດຖະກິດພິເສດ ແລະ ສະເພາະໃຫ້ຫລາຍ ແລະ ສາມາດເຊື່ອມໂຍງກັບພາກພື້ນ, ສົ່ງເສີມການນໍາໃຊ້ກົນຈັກ, ເຕັກໂນໂລຊີທີ່ເປັນວິທະຍາສາດໃໝ່ເຂົ້າໃສ່ການຜະລິດກະສິກໍາໃຫ້ແຜ່ຫລາຍ. ຄຽງຄູ່ກັນນັ້ນຫັນແຮງງານທີ່ເຮັດວຽກກະສິກໍາຢູ່ຊົນນະບົດໄປເຮັດວຽກໃນຂະແໜງອຸດສະຫະກໍາ ແລະ ການບໍລິການຫລາຍຂຶ້ນ.(5) ພັດທະນາຫລັກສູດສີມືແຮງງານໃຫ້ຫລາກຫລາຍ ແລະ ມີຄຸນນະພາບ,
ສ້າງນະໂຍບາຍເອື້ອອໍານວຍໃຫ້ແຮງງານສາມາດເຂົ້າຮ່ວມໃນຕະຫລາດແຮງງານໄດ້ຫລາຍ, ມີລະບຽບວິໄນ,
ດຸໝັ່ນ, ອົດທົນ, ມີຄວາມກະຕືລືລົ້ນຕໍ່ການພັດທະນາຕົນເອງ, ມີວຽກເຮັດງານທໍາທີ່ໝັ້ນຄົງ, ໄດ້ຮັບການຄຸ້ມຄອງ ແລະ ປົກປ້ອງສິດຜົນປະໂຫຍດຕາມກົດໝາຍ.(6) ການພັດທະນາຊັບພະຍາກອນມະນຸດກໍຄືການພັດທະ ນາຄົນແມ່ນປັດໃຈສໍາຄັນຕົ້ນຕໍໃນຍຸກວິທະຍາສາດ-ເຕັກໂນໂລຊີ
ແລະ ການເຊື່ອມໂຍງ, ສະນັ້ນ ຕ້ອງສຸມໃສ່ພັດທະນາລະບົບອາຊີວະສຶກສາເພື່ອສ້າງຄົນໃຫ້ມີຄວາມຫລາກຫລາຍທາງດ້ານລະດັບຄວາມຮູ້,ຄວາມສາມາດ ແລະ ຫລາຍສາຂາວິຊາຊີບ, ສ້າງໃຫ້ໄດ້ຜູ້ຊ່ຽວຊານສະເພາະດ້ານ, ຜູ້ຊໍານານງານ ແລະ ສາຄັນແມ່ນການສ້າງໃຫ້ມີຜູ້ປະກອບການທຸລະກິດທີ່ເກັ່ງສາມາດແຂ່ງຂັນກັບພາກພື້ນ ແລະ ສາກົນໄດ້ ແລະ (7) ແມ່ນສຸມໃສ່ການເປີດກວ້າງການຮ່ວມມືສອງຝ່າຍ ແລະ ຫລາຍຝ່າຍເພື່ອປນໃສ່ລະດົມທຶນ ແລະ ຍາດແຍ່ງທຶນຮອນ, ເຕັກນິກວິຊາການດ້ານຕ່າງໆມາປະກອບເຂົ້າໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງຊາດໃຫ້ສອດຄ່ອງເໝາະສົມຕາມແຕ່ລະໄລຍະ.
No comments:
Post a Comment