laophatthananewspaper: ເຜີຍແຜ່ບົດລາຍງານສາກົນຊຶ່ງມີຄວາມສຳຄັນຕໍ່ສະຖານະພາບການພັດທະນາຂອງ ສປປ ລາວ

ວັນທີ 12 ກຸມພານີ້, ອົງການສະຫະປະຊາຊາດປະຈຳລາວໄດ້ຈັດພິທີເຜີຍແຜ່ບົດລາຍງານສາກົນຊຶ່ງມີຄວາມສຳຄັນຕໍ່ສະຖານະພາບການພັດທະນາຂອງ ສປປ ລາວ ຂຶ້ນຢູ່ສຳນັກງານອົງ ການຕົນໃນນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ບຸນທະວີ ສີສຸພັນທອງ ລັດຖະມົນ ຕີຊ່ວຍວ່າການກະຊວງແຜນການ ແລະ ການລົງທຶນ. ທ່ານ ນາງ ຄາຣິນາ ອິມໂມເນັນ ຜູ້ຕາງໜ້າອົງການສະຫະປະຊາຊາດເພື່ອການພັດທະນາປະຈຳລາວ, ພ້ອມດ້ວຍຜູ້ຕ່າງໜ້າຈາກກະຊວງ ແລະ ອົງການຈັດຕັ້ງສາກົນເຂົ້າຮ່ວມເປັນຈຳນວນຫຼາຍ.

ຜູ້ຕາງໜ້າອົງການສະຫະປະຊາຊາດເພືື່ອການພັດທະນາປະຈຳລາວກ່າວວ່າ: ອົງການສະຫະ

ປະຊາຊາດປະຈຳລາວຈະໄດ້ເຜີຍແຜ່ບົດລາຍງານສາກົນ 2 ສະບັບກ່ຽວກັບວຽກງານພັດທະນາຊັບພະຍາກອນມະນຸດ ແລະ ການປ່ຽນແປງເສດຖະກິດໃນຊົນນະບົດໃຫ້ແກ່ ສປປ ລາວ, ຊຶ່ງບົດລາຍງານດັ່ງກ່າວແມ່ນມີຄວາມສຳຄັນຕໍ່ສະຖານະພາບການພັດທະນາເສດຖະກິດຂອງລາວ, ເປັນຕົ້ນແມ່ນຄວາມກ້າວໜ້າທາງດ້ານເທັກໂນໂລຢີຢ່າງໄວວາ, ການຂະຫຍາຍຕົວໃນຍຸກໂລກາພິວັດ, ສິ່ງທ້າທາຍດ້ານສິ່ງແວດລ້ອມທີ່ກຳລັງປ່ຽນສັງຄົມໃນປັດຈຸບັນ, ລວມທັງໂອກາດ ແລະ ສິ່ງທ້າທາຍຕ່າງໆໃນຂົງເຂດອາຊີ-ປາຊີຟິກ, ບົດລາຍງານດັ່ງກ່າວຍັງຮຽກຮ້ອງໃຫ້ລັດຖະບານປະເທດຕ່າງໆດຳເນີນການສຳລັບຮັບປະກັນຄວາມບໍ່ສະເໜີພາບທີ່ກວ້າງອອກ, ໂດຍສະເພາະແມ່ນບຸກຄົນທີ່ຖືກປ່ອຍປະລະເລີຍໃນຍຸກທີ່ມີປ່ຽນແປງການເຮັດວຽກຢ່າງໄວວາ, ໃນຂະນະດຽວກັນກໍໃຫ້ຄວາມສົນໃຈຕໍ່ກັບຄວາມຍືນຍົງ.

ຜູ້ຕາງໜ້າອົງການດັ່ງກ່າວໃຫ້ຮູ້ວ່າ: ບົດລາຍງານດັ່ງກ່າວຍັງລະບຸວ່າຂົງເຂດອາຊີປາຊິຟິກອາດຈະເປັນຂົງເຂດໜຶ່ງທີ່ມີການຂະຫຍາຍຕົວຂອງມະນຸດຢ່າງວ່ອງໄວ, ແຕ່ວ່າການສ້າງວຽກເຮັດງານທຳພັດຊັກຊ້າ, ຮູບແບບບົດລາຍງານການພັດທະນາຊັບພະຍາກອນມະນຸດຊຶ່ງຖືກຮັບຮອງໂດຍອົງການສະຫະປະຊາຊາດເພື່ອການພັດທະນາໃນຊຸມປີ 1990 ແລະ ເຄື່ອງມືວັດແທກໂດຍໃຊ້ດັດສະນີການພັດທະນາມະນຸດ, ຊຶ່ງໄດ້ເນັ້ນໃສ່ການປັບປຸງຊີວິດການເປັນຢູ່ຫຼາຍກວ່າການຂະຫຍາຍຕົວທາງດ້ານເສດຖະກິດເປັນຫຼັກ, ສຳລັບ ສປປ ລາວ ແມ່ນຢູ່ອັນດັບ 141 ໃນຈຳນວນ 188 ປະເທດ ໂດຍອີງໃສ່ດັດສະນີການພັດທະນາມະນຸດປີ 2014, ຊຶ່ງຕ່ຳກ່ວາຄ່າສະເລ່ຍໃນຂົງເຂດອາຊີ - ປາຊີຟິກ.