ການຈັດຕັ້ງປະຕິບັດຄໍາຕັດສີນຂອງສານແມ່ນຂັ້ນຕອນສຸດທ້າຍຂອງຂະບວນການຍຸຕິທໍາ ແລະ
ເປັນຂັ້ນຕອນທີ່ມີຄວາມຫຍຸ້ງຍາກ, ເນື່ອງຈາກເປັນການນໍາເອົາຄໍາສັ່ງ, ຄໍາຊີ້ຂາດ, ຄໍາຕັດສີນຫລືຄໍາພິພາກສາຂອງສານທີ່ໃຊ້ໄດ້ຢ່າງເດັດຂາດແລ້ວມາຈັດຕັ້ງປະຕິບັດໃຫ້ຖືກຕ້ອງ
ແລະ ເປັນທໍາ.
ພະແນກຍຸຕິທໍານະຄອນຫລວງວຽງຈັນໃຫ້ຮູ້ວ່າ: ການປະຕິບັດຄໍາຕັດສີນຂອງສານແມ່ນຂະບວນການປະຕິບັດກົດໝາຍທີ່ສໍາຄັນ
ແລະ ເປັນໜຶ່ງໃນຫົກປາກົດການຫຍໍ້ທໍ້ໃນສັງຄົມຄື: ໃນໄລຍະຜ່ານມາພາກສ່ວນກ່ຽວຂ້ອງຈຶ່ງໄດ້ພະຍາຍາມຂະຫຍາຍຕາໜ່າງວຽກງານດັ່ງກ່າວນັບແຕ່ສູນກາງລົງຮອດທ້ອງຖິ່ນ, ໂດຍສະເພາະສ້າງຖັນແຖວພະນັກງານໃຫ້ມີຄວາມຮູ້ດ້ານກົດໝາຍເລິກເຊິ່ງ ແລະ ມີປະສົບການໃນການແກ້ົໄຂຄະດີ, ເພື່ອສ້າງຄວາມເຊື່ອໝັ້ນໃຫ້ແກ່ພົນລະເມືອງ,
ນັກລົງທຶນທັງພາຍໃນ ແລະຕ່າງປະເທດຫລາຍຂຶ້ນ, ທັງເປັນການສະກັດກັ້ນການລະເມີດລະບຽບກົດໝາຍ,
ຮັບປະກັນໃຫ້ສັງຄົມມີຄວາມສະຫງົບເປັນລະບຽບຮຽບຮ້ອຍ ແລະ ມີຄວາມຍຸຕິທໍາໂດຍພື້ນຖານ,
ຊຶ່ງສະແດງໃຫ້ເຫັນໃນ
ໄລຍະ 5 ປີຜ່ານມາຢູ່ນະຄອນຫລວງວຽງຈັນມີຄະດີເກີດຂຶ້ນຫລາຍກວ່າ
9 ພັນເລື່ອງ, ໃນນີ້ຄະດີແພ່ງຫລາຍກວ່າ
3.700 ເລື່ອງ, ຄະດີອາຍາຫລາຍກວ່າ
5.800 ເລື່ອງ, ສາມາດປະຕິບັດສໍາເລັດ
2.442 ເລື່ອງ, ໃນນັ້ນຄະດີແພ່ງ 1.890 ເລື່ອງ, ຄະດີອາຍາ 618 ເລື່ອງ,ໂດຍໄດ້ດໍາເນີນການປັບໄໝແລະຮິບເປັນຂອງລັດຫລາຍກວ່າ 1,8 ຕື້ກີບ, ຍຶດພາຫະນະ 28 ຄັນ,
ຮິບທີ່ດິນມອບໃຫ້ລັດຄຸ້ມຄອງ 35 ຕອນໃນເນື້ອທີ່ 1,5 ລ້ານເຮັກຕາ, ນອກຈາກນີ້ຍັງສາມາດເກັບກູ້ໜີສີນມອບໃຫ້ບຸກຄົນໄດ້ຫລາຍກວ່າ 13 ຕື້ກວ່າກີບ,49 ລ້ານບາດ(ສະກຸນເງິນໄທ)
ແລະ 6,5ລ້ານໂດລາສະຫະລັດ, ມີທີ່ດິນ 18 ຕອນ, ເຮືອນ
18 ຫລັງ ແລະ ຊັບສີນອື່ນໆຈໍານວນໜຶ່ງ.
ຍ້ອນວຽກງານການຈັດຕັ້ງປະຕິບັດຄໍາຕັດສີນຂອງສານເປັນວຽກທີ່ຫຍຸ້ງຍາກ ແລະ ມີຜົນກະທົບໂດຍກົງຕໍ່ການປະຕິບັດໜ້າທີ່ຂອງພະນັກງານ, ຈຶ່ງເຮັດໃຫ້ຂະແໜງດັ່ງກ່າວຈະຕ້ອງໄດ້ສືບຕໍ່ເອົາໃຈໃສ່ແກ້ໄຂບັນດາຂໍ້ຄົງຄ້າງຕ່າງໆຄື:
ກົດໝາຍວ່າດ້ວຍການຈັດຕັ້ງປະຕິບັດຄໍາຕັດສີນຂອງສານບາງມາດຕາຍັງກໍານົດເນື້ອໃນບໍ່ທັນຄົບຖ້ວນ,ຈະແຈ້ງ ແລະ ບໍ່ແທດເໝາະກັບສະພາບຄວາມເປັນຈິງຂອງສັງຄົມໃນປະເທດເຮົາ, ພະນັກງານທີ່ເຮັດວຽກຕົວຈິງຍັງບໍ່ພຽງພໍເມື່ອທຽບກັບຈໍານວນຄໍາຕັດສີນຂອງສານ,
ສ່ວນຫລາຍແມ່ນພະນັກງານໜຸ່ມນ້ອຍ,
ປະສົບການເຮັດວຽກບໍ່ຫລາຍ ແລະ ຈໍານວນໜຶ່ງແມ່ນບໍ່ໄດ້ຜ່ານການຝຶກອົບຮົມກ່ຽວກັບວຽກງານດັ່ງກ່າວ,
ນອກຈາກນີ້ມີຈໍານວນໜຶ່ງແມ່ນຂາດຈັນຍາບັນໃນການປະຕິບັດໜ້າທີ່ວຽກງານຂອງຕົນ,
ຜູ້ຖືກປະຕິບັດຄໍາຕັດສີນຈໍານວນໜຶ່ງເປັນຄົນທຸກຍາກ, ບາງຈໍານວນພວມປະຕິບັດໂທດຢູ່ຄ້າຍຄຸມຂັງຫລືເວລາປະຕິບັດໂທດສໍາເລັດຖືກປ່ອຍຕົວແລ້ວເອົາຕົວຫລົບໜີ,
ບາງຄໍາຕັດສີນຂອງສານໄດ້ຮັບການພິຈາລະນາຫລາຍເທື່ອຫລືມີການຕັດສີນແລ້ວແຕ່ຮື້ຟື້ນຄືນໃໝ່ແລະໄດ້ຕັດສີນປີ້ນກັບສິ່ງທີ່ໄດ້ປະຕິບັດ,ຜູ້ຖືກປະຕິບັດຄໍາຕັດສີນຂອງສານຈໍານວນໜຶ່ງຂຽນໃບຄໍາຮ້ອງໄປຫາຫລາຍພາກສ່ວນເປັນຕົ້ນ:
ສະພາແຫ່ງຊາດ, ຫ້ອງວ່າການລັດຖະບານ, ຫ້ອງວ່າການປະທານປະເທດ, ອົງການກວດກາແຫ່ງລັດ ແລະ ອື່ນໆເພື່ອແກ່ຍາວເວລາຈຶ່ງເຮັດໃຫ້ມີຄໍາເຫັນມາຈາກພາກສ່ວນຕ່າງໆບໍ່ເອກະພາບກັນ
ແລະ ງົບປະມານ, ພາຫະນະ,ອຸປະ ກອນຮັບໃຊ້ວຽກງານຈັດຕັ້ງປະຕິບັດຄໍາຕັດສີນຂອງສານຍັງມີຈໍາກັດ
ແລະ ຂາດສະຖານທີ່ເກັບມ້ຽນຂອງກາງຄະດີຈຶ່ງເຮັດໃຫ້ມີຄວາມຫຍຸ້ງຍາກໃນການຈັດຕັ້ງປະຕິບັດວຽກງານດັ່ງກ່າວ.
No comments:
Post a Comment