ພິທີວາງສີລາເລີກໂຄງການກໍ່ສ້າງຂົວຂ້າມນໍ້າງື່ມແຫ່ງທີ 5 ໃນຈຸດລະຫວ່າງບ້ານນາບົງຫາບ້ານທ່າກົກໄຮ,ເມືອງປາກງື່ມ, ນະຄອນຫລວງວຽງຈັນ, ໂດຍທຶນຊ່ວຍເຫລືອຫລາຍກວ່າຮ້ອຍຕື້ກີບຂອງທ່ານ ສັກໄຊ ວົງມາລາສິດ ປະທານກຸ່ມບໍລິສັດລາວເວີນອະສັງຫາລິມາຊັບ, ໄດ້ຈັດຂຶ້ນໃນເຊົ້າວັນທີ 5 ກຸມພານີ້, ໂດຍມີທ່ານເຈົ້າຄອງນະຄອນຫລວງວຽງຈັນ ດຣ
ສີນລະວົງ ຄຸດໄພທູນ, ທ່ານລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ດຣ ບຸນຈັນ ສີນທະວົງ ພ້ອມດ້ວຍອໍານາດການປົກຄອງ ແລະ ປະຊາຊົນຊາວເມືອງປາກງື່ມເຂົ້າຮ່ວມເປັນຈໍານວນຫລາຍ.
ທ່ານປະທານກຸ່ມບໍລິສັດລາວເວີນ ອະສັງຫາລິມະຊັບ ກ່າວວ່າ: ຂ້າພະເຈົ້າມີຄວາມ ພາກພູມໃຈ ທີ່ໄດ້ປະກອບສ່ວນເຮັດໃນສິ່ງທີ່ມີຄຸນຄ່າ ແລະ ສ້າງປະໂຫຍດຄືນໃຫ້ແກ່ສັງຄົມກໍຄືການກໍ່ສ້າງຂົວຂ້າມນໍ້າງື່ມແຫ່ງນີ້. ຄືດັ່ງພວກເຮົາຮັບຮູ້ນໍາກັນວ່າຈຸດທີ່ຈະສ້າງຂົວນີ້ເຄີຍເກີດໂຊກນາດຕະກໍາເຮືອບັກລົ່ມຈົນມີເດັກນ້ອຍນັກຮຽນ
10 ຄົນເສຍຊີວິດຢ່າງໜ້າສົງສານ, ຈຶ່ງຕັດສີນໃຈສ້າງຂົວຂ້າມແຫ່ງນີ້ຂຶ້ນ.
ຂົວດັ່ງກ່າວມີຄວາມຍາວປະມານ 236 ແມັດ, ກວ້າງ 11 ແມັດ, ມີທາງຍ່າງສອງຝາກທາງ ແລະ ມີລະບົບໄຟຟ້າແສງສະຫວ່າງຄົບຊຸຸດ, ລວມມີມູນຄ່າກໍ່ສ້າງປະມານ 14 ລ້ານໂດລາສະຫະລັດ ຫລື
ຫລາຍກວ່າ 100 ຕື້ກີບ ແລະ ຄາດວ່າຈະໃຫ້ສໍາເລັດການກໍ່ສ້າງພາຍໃນ 24 ເດືອນ.
ໃນໂອກາດນີ້, ທ່ານເຈົ້າຄອງນະຄອນຫລວງວຽງຈັນ ກໍໄດ້ຂຶ້ນກ່າວຄໍາເຫັນ, ຊຶ່ງໄດ້ຕາງໜ້າໃຫ້ພັກ ແລະ ລັດຖະບານ ສະແດງຄວາມຂອບໃຈຢ່າງສູງຕໍ່ທ່ານປະທານກຸ່ມບໍລິສັດລາວເວີນທີ່ໄດ້ປະກອບສ່ວນທຶນຢ່າງຫລວງຫລາຍເພື່ອກໍ່ສ້າງຂົວແຫ່ງນີ້ ແລະ ເມື່ອກໍ່ສ້າງສໍາເລັດຈະຊ່ວຍໃຫ້ການຄົມມະນາຄົມ, ສັນຈອນໄປມາ, ການຂົນສົ່ງສີນຄ້າຂອງປະຊາຊົນໃນເຂດລ່ອງງື່ມມີຄວາມສະດວກ,ເປັນການປະກອບສ່ວນຍົກລະດັບພື້ນຖານໂຄງລ່າງ ແລະ ຊຸກຍູ້ການພັດທະນາເສດຖະກິດ-ສັງຄົມຂອງປະເທດໃຫ້ດີຂຶ້ນເທື່ອລະກ້າວ.
No comments:
Post a Comment