ພິທີມອບ-ຮັບໃບຢັ້ງຢືນມາດຕະຖານສາກົນດ້ານຄວາມປອດໄພຂອງສາຍການບິນລາວລະຫວ່າງທ່ານ
ດຣ ສົມພອນ ດວງດາຣາ ອໍານວຍການໃຫຍ່ລັດວິສາຫະກິດການບິນລາວ ແລະ ທ່ານ ແບຣ ຄາວ ຮອງປະທານສະມາຄົມການບິນສາກົນ
(IATA), ໄດ້ຈັດຂຶ້ນໃນວັນທີ 4 ກຸມພານີ້, ທີ່ສໍານັກງານໃຫຍ່ລັດວິສາຫະກິດດັ່ງກ່າວ,
ນະຄອນຫລວງວຽງຈັນ,
ມີທ່ານລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ດຣ ບຸນຈັນ ສີນທະວົງ ແລະ ພະນັກງານກ່ຽວຂ້ອງເຂົ້າຮ່ວມເປັນຈໍານວນຫລາຍ.
ການບິນລາວໄດ້ຮັບໃບຢັ້ງຢືນມາດຕະຖານຄວາມປອດໄພຈາກສະມາຄົມການຂົນສົ່ງທາງ
ອາກາດສາກົນ ໂດຍຜ່ານການກວດກາລະບົບການຄຸ້ມຄອງ ແລະ ໃຫ້ບໍລິການຂອງສາຍການບິນ,ລັດວິສາຫະກິດການບິນລາວເປັນສາຍການບິນທຳອິດຂອງປະເທດທີ່ໄດ້ຮັບຜົນສຳເລັດອັນຍິ່ງໃຫຍ່ໃນການຈົດທະບຽນເຂົ້າເປັນສະມາຊິກ IOSA.ຜົນສຳເລັດດັ່ງກ່າວແມ່ນໄດ້ມາໂດຍຜ່ານການປະເມີນມາດຕະຖານຄວາມປອດໄພຫລາຍກວ່າ 900 ຄຳຖາມ ແລະ ນອນຢູ່ໃນ 8 ພື້ນຖານຂອງການປະຕິ ບັດການບິນ,
ຊຶ່ງລວມມີວຽກງານກ່ຽວກັບການບໍລິຫານຈັດການ, ວຽກງານການຈັດຕັ້ງ, ການປະຕິບັດງານຂອງພະນັກງານເຕັກນິກ ແລະ ນາຍຊ່າງ,ວຽກງານບໍລິການພາກພື້ນດິນ
ແລະ ການຮັກສາຄວາມປອດໄພສາຍການບິນ.
ຜົນສຳເລັດດັ່ງກ່າວໄດ້ຊ່ວຍໃຫ້ການບິນລາວສາມາດບໍລິຫານຈັດການລະບົບມາດຕະຖານຄວາມປອດໄພໃນການໃຫ້ບໍລິການ,ການກວດກາທີ່ດີ ແລະ ມີປະສິດທິພາບ, ຄຽງຄູ່ກັບການເຕີບໃຫຍ່ທາງດ້ານທຸລະກິດ ແລະ ໃບຢັ້ງຢືນມາດຕະຖານຄວາມປອດໄພຈາກສະມາຄົມການຂົນສົ່ງທາງອາກາດສາກົນແມ່ນເປັນທີ່ຮັບຮູ້ໃນລະດັບສາກົນ ແລະ ລັດວິສາຫະກິດການບິນລາວໄດ້ໃຫ້ສັດຕະ ຍາບັນວ່າຈະສືບຕໍ່ດຳເນີນທຸລະກິດການບິນຮັບໃຊ້ຜູ້ໂດຍສານດ້ວຍຄວາມຖືກຕ້ອງ, ປອດໄພ ແລະ ສາ ມາດໃຫ້ຄວາມໄວ້ວາງໃຈໄດ້ພາຍໃຕ້ລະບຽບຂອງ IOSA ຢ່າງເຄັ່ງຄັດ.
ໃນເດືອນເມສາ 2015 ໜ່ວຍງານປະເມີນຜົນຄວາມປອດໄພຂອງອົງການການບິນພົນລະເຮືອນສາກົນ (ICAO) ໄດ້ລົງກວດກາກົມການບິນພົນລະເຮືອນຂອງລາວ ແລະ ໄດ້ຮັບຄະແນນສະເລ່ຍ 73% ໃນຄວາມສາມາດປະຕິບັດໄດ້ຕາມຂໍ້ກຳນົດ ແລະ ກົດລະບຽບຂອງອົງການການບິນພົນລະເຮືອນສາກົນ.
ທ່ານອຳນວຍການໃຫຍ່ລັດວິສາຫະກິດການບິນລາວ ມີຄໍາເຫັນວ່າ: ຜົນສຳເລັດຂອງການໄດ້ຮັບໃບຢັ້ງຢືນມາດຕະຖານຄວາມປອດໄພຈາກອົງການຂົນສົ່ງທາງອາກາດສາກົນໄດ້ສະແດງເຖິງຜົນສຳເລັດພົ້ນເດັ່ນທາງດ້ານຄວາມປອດໄພຂອງລັດວິສາຫະກິດການບິນລາວ, ເຊິ່ງຈະສ້າງຄວາມເຊື່ອໝັ້ນ ແລະ ຄວາມໄວ້ວາງໃຈໃຫ້ກັບລູກຄ້າກໍຄືຜູ້ໂດຍສານທີ່ມາໃຊ້ບໍລິການໄດ້ເປັນຢ່າງດີ.
ປັດຈຸບັນລັດວິສາຫະກິດການບິນລາວນຳໃຊ້ເຮືອບິນຊະນິດແອບັສ A320-214 ຈຳນວນ
4 ລຳ ແລະ ເຮືອບິນຊະນິດອາເຕແອ້
ATR72-500 ແລະ 600 ຈຳນວນ 7 ລຳ,ມີເສັ້ນທາງບິນພາຍໃນ 6 ເສັ້ນທາງ ແລະ ເສັ້ນທາງບິນຕ່າງປະເທດ 15 ເສັ້ນທາງບິນໃນຂົງເຂດອາຊີ. ຄຽງຄູ່ກັບຜົນສຳເລັດທີ່ໄດ້ຮັບໃນຄັ້ງນີ້ລັດວິສາຫະກິດການບິນລາວຍັງມີແຜນການທີ່ຈະເພີ່ມເສັ້ນທາງບິນທັງພາຍໃນ ແລະ ຕ່າງປະເທດຕື່ມອີກໃນຕໍ່ໜ້າ.
No comments:
Post a Comment