ເຊົ້າມືດຂອງວັນທີ 11 ກຸມພາຜ່ານມານີ້,
ຢູ່ເສັ້ນທາງ 13 ເໜືອ, ເຂດບ້ານບົວຫລວງ, ເມືອງນາຊາຍທອງ ນະຄອນຫລວງວຽງຈັນ,
ໄດ້ເກີດອຸປະຕິເຫດລົດເກັງ ຕຳທ້າຍລົດບັນທຸກທີ່ແລ່ນມາໃນທິດທາງດຽວກັນຢ່າງແຮງ
ເຮັດໃຫ້ມີຜູ້ເສຍຊີວິດຄາທີ່ໜຶ່ງຄົນ.
ເຈົ້າໜ້າທີ່ ຈະລາຈອນ ນະຄອນຫລວງວຽງຈັນ
ໃຫ້ຮູ້ວ່າ: ເຫດການດັ່ງກ່າວເກີດຂຶ້ນໃນເວລາປະມານ 4 ໂມງເຊົ້າ, ໂດຍລົດບັນທຸກສິບລໍ້
ໝາຍເລກທະບຽນ ບກ 7617 ກຳແພງນະຄອນ ຂັບຂີ່ໂດຍທ້າວ ຄຳມະນີ ອາຍຸ 34ປີ, ຢູ່ບ້ານນາສ້ຽວ
ເມືອງນາຊາຍທອງ, ຂັບຂີ່ມາແຕ່ທິດທາງບ້ານສີເກີດ ມຸ້ງໜ້າໄປທາງບ້ານນາຊາຍ
ແຕ່ພໍມາ
ຮອດຈຸດເກີດເຫດ ລົດບັນທຸກ ໄດ້ສະລໍຄວາມໄວລົງ ຍ້ອນເຂດດັ່ງກ່າວມີເສັ້ນທາງມີສະພາບເປ່ເພ
ເປັນຂຸມ ຈຶ່ງເຮັດລົດເກັງ ໝາຍເລກທະບຽນ ກສ 6328 ກຳແພງນະຄອນ ຂັບຂີ່ໂດຍທ້າວ
ສົມຫວັງ ອາຍຸ 26ປີ, ຢູ່ບ້ານນາຊາຍເໜືອ, ເມືອງນາຊາຍທອງ ທີ່ແລ່ນຕາມຫລັງມາດ້ວຍຄວາມໄວສູງ
ເບລກບໍ່ທັນຕຳເອົາທ້າຍລົດບັນທຸກຢ່າງແຮງ ຈົນລົດເຂົ້າໄປຢູ່ກ້ອງລົດບັນທຸກ
ແລະ ເສຍຊີວິດຄາທີ່, ໂດຍໜ່ວຍກູ້ໄພໄດ້ນຳເຄື່ອງຈັກເຫລັກຕັດປະຕູລົດເກືອບຊົ່ວໂມງ
ຈຶ່ງສາມາດນຳຮ່າງຂອງຜູ້ຕາຍອອກຈາກລົດໄດ້.
No comments:
Post a Comment