laophatthananewspaper: ການແຂ່ງຂັນຮ້ອງເພງຊີງຂັນລັດຖະມົນຕີກະຊວງສຶກສາທິການ ແລະ ກິລາຈະເລີ່ມຂຶ້ນໃນທ້າຍເດືອນກຸມພານີ້

ບ່າຍວັນທີ 11 ກຸມພາ ນີ້, ຢູ່ທີ່ສູນການຄ້າວຽງຈັນເຊັນເຕີ, ນະຄອນຫຼວງວຽງຈັນ, ໄດ້ມີການຖະແຫຼງຂ່າວກ່ຽວກັບການແຂ່ງຂັນຮ້ອງເພງ ຊິງຂັນທ່ານລັດຖະມົນຕີວ່າການກະຊວງສຶກສາທິການ ແລະ ກິລາ, ໂດຍການຖະແຫຼງຂອງທ່ານ ບຸນສຸກ ທິລະສັກ ຫົວໜ້າກົມພະລະສຶກສາ ແລະ ສິລະປະສຶກສາວ່າ: ໂຄງການດັ່ງກ່າວ ແມ່ນໄດ້ຮັບການອຸປະຖຳຈາກ ບໍລິສັດເບຍລາວ, ຊຶ່ງໃນປີຜ່ານມາໂຄງການດັ່ງກ່າວ ໄດ້ຮັບການຕອບຮັບເປັນຢ່າງດີ ແລະ ມີນ້ອງນັກຮຽນສະໝັກເຂົ້າຮ່ວມແຂ່ງຂັນເກືອບ 700 ຄົນ ແລະ ໃນປີນີ້ຈະມີຄວາມແຕກຕ່າງຈາກປີຜ່ານມາ, ຊຶ່ງຈະເນັ້ນເພງທີ່ມີລັກສະນະສາກົນ, ຮ້ອງດ່ຽວປະກອບດົນຕຣີ, ມີຈັງຫວະຊ້າ ແລະ ໄວ ເພື່ອຊີງທຶນການສຶກສາ ແລະ ມີໂອກາດເຂົ້າເປັນນັກຮ້ອງໃນຄ້າຍເພງທີ່ມີຊື່ສຽງໃນ

ປະເທດນຳອີກ, ເຊິ່ງເປົ້າໝາຍຂອງຜູ້ສະໝັກເຂົ້າຮ່ວມການແຂ່ງຂັນ ແມ່ນນັກຮຽນ-ນັກສຶກສາ ມີອາຍຸລະຫວ່າງ 15-20 ປີ ເທົ່ານັ້ນ ແລະ ບໍ່ເຄີຍສັງກັດຢູ່ຄ້າຍເພງໃດມາກ່ອນ ແລະ ຈະຈັດເປັນ 3 ຮອບຄື: ຮອບຄັດເລືອກທີໜຶ່ງຈະຈັດຂຶ້ນໃນວັນທີ 27 ກຸມພາ 2016 ທີ່ສູນການຄ້າວຽງຈັນເຊັນເຕີ, ໂດຍຄັດເລືອກເອົາຜູ້ສຽງດີ ຈຳນວນ 30 ຄົນ, ຂອງຈຳນວນຜູ້ສະໝັກທັງໝົດ, ຮອບທີສອງ ແມ່ນຮອບຮອງຊະນະເລີດ ຈະຈັດຂຶ້ນໃນຫວ່າງວັນທີ 11 ມີນາ 2016 ທີ່ຫໍວັດທະນະທຳແຫ່ງຊາດ, ຊຶ່ງໃນຮອບນີ້ ຈະຄັດເລືອກເອົາຜູ້ສຽງດີ, ມີລີລາທ່າທາງດີ ແລະ ມີພອນສະຫວັນໃນການເປັນນັກຮ້ອງ ຈຳນວນ 12 ຄົນ ແລະ ຮອບທີສາມ ແມ່ນຮອບຊີງຊະນະເລີດ ຈະຈັດຂຶ້ນໃນລະຫວ່າງວັນທີ 5 ເມສາ 2016 ທີ່ຫໍວັດທະນະທຳແຫ່ງຊາດ, ເຊິ່ງມີມູມຄ່າລາງວັນຫຼາຍກວ່າ 80 ລ້ານກີບ, ໃນນັ້ນລາງວັນທີ 1 ຈະໄດ້ຮັບທຶນການສຶກສາຈຳນວນ 15 ລ້ານກີບ ພ້ອມດ້ວຍຂັນລັດຖະມົນຕີວ່າການກະຊວງສຶກສາ ແລະ ກິລາ, ໃບກຽດຕິຄຸນ ແລະ ຂອງຂວັນຈາກຜະລິດຕະພັນແປັບຊີ ຈຳກັດ, ລາງວັນທີ 2 ໄດ້ຮັບທຶນການສຶກສາຈຳນວນ 10 ລ້ານກີບ ພ້ອມໃບກຽດຕິຄຸນ ແລະ ຂອງຂວັນຈາກຜະລິດຕະພັນແປັບຊີ ແລະ ລາງວັນທີ 3 ໄດ້ຮັບທຶນການສຶກສາ ຈຳ ນວນ 8 ລ້ານກີບ ພ້ອມໃບກຽດຕິຄຸນ, ນອກຈາກນີ້ຍັງມີລາງວັນການສະແດງດີເດັ່ນ ແລະ ລາງວັນມິດຕະພາບນຳອີກ. ຮອງຫົວໜ້າກົມພະລະ ແລະ ສິລະປະສຶກສາໄດ້ກ່າວວ່າ: ການແຂ່ງຂັນດັ່ງກ່າວຈັດຂຶ້ນເພື່ອເປັນການສົ່ງເສີມນັກຮຽນຜູ້ທີ່ມັກໃນການຮ້ອງເພງ, ໄດ້ມີໂອກາດສະແດງຄວາມສາມາດ ແລະ ພອນສະຫັວນຂອງເຂົາເຈົ້າ, ສົ່ງເສີມນັກຮຽນໄດ້ໃຊ້ເວລາຫວ່າງເປັນປະໂຫຍດໃນການຮຽນຮູ້ສິລະປະ-ວັດທະນະທຳທັງພາຍໃນ ແລະ ຕ່າງປະເທດ ທີ່ມຄວາມເປັນເອກະລັກຂອງຊາດ ແລະ ຫ່າງໄກຈາກອະບາຍຍະມຸກ, ສິງເສບຕິດ ແລະ ຫຼີກເວັ້ນຈາກປາກົດການຫຍໍ້ທໍ້ຕ່າງໆ ແລະ ສົ່ງເສີມການຈັດກິດຈະກຳການຮຽນ-ການສອນສິລະປະສຶກສາໃນໂຮງຮຽນສາມັນສຶກສາໃຫ້ເກີດຜົນແກ່ນັກຮຽນ ໄປຕາມ 3 ລັກສະນະ ແລະ 5 ຫຼັກມູນ ທີ່ກະຊວງສຶກສາທິການ ແລະ ກິລາໃຫ້ໄດ້ຕາມກຳນົດໄວ້.