ເມື່ອບໍ່ດົນມານີ້ ທີ່ກະຊວງການຕ່າງປະເທດ ແລະ ການຄ້າ ຮົງກາລີ
ໄດ້ມີພິທີລົງນາມສັນຍາວ່າດ້ວຍການສ້າງຂອບການຮ່ວມມືດ້ານການເງິນລະຫວ່າງ ລັດຖະບານລາວ
ແລະ ລັດຖະບານ ຮົງກາລີ,
ໂດຍ ທ່ານ ພູເຂົາ ພົມມະວົງສາ, ເອກອັກຄະລັດຖະທູດ/ຜູ້ຕາງໜ້າຖາວອນແຫ່ງ ສປປ ລາວ, ທີ່ມີສໍານັກງານຕັ້ງຢູ່ ນະຄອນຫຼວງວຽນ, ປະເທດ ໂອຕຣິດ ແລະ ຝ່າຍຮົງກາລີ ແມ່ນ ທ່ານ ດຣ. ອີສວານ ມິໂກລາ ( Dr. István
Mikola ), ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ການຄ້າ ຮົງກາລີ
ເປັນຄູ່ຮ່ວມລົງນາມ. ໃນພິທີດັ່ງກ່າວຝ່າຍລາວຍັງມີ ທ່ານ ດຣ. ພວງປາຣິສັກ ປຣະວົງວຽງຄໍາ, ລັດຖະມົນຕີຊ່ວຍວ່າການກະຊວງກະສິກໍາ ແລະ ປ່າໄມ້ຂອງລາວ ແລະ
ພາກສ່ວນກ່ຽວຂ້ອງຈາກທັງສອງຝ່າຍເຂົ້າຮ່ວມເປັນສັກຂີພິຍານ.
ສັນຍາດັ່ງກ່າວຈະເປັນພື້ນຖານທີ່ສໍາຄັນໃນການສົ່ງເສີມບາດກ້າວຂະຫຍາຍການຮ່ວມມືດ້ານເສດຖະກິດຂອງທັງສອງປະເທດໂດຍຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມດຽວກັນນັ້ນ ກໍຈະເປັນແມ່ບົດເພື່ອກ່າວໄປສູ່ການລົງນາມໃນສັນຍາການຊ່ວຍເຫຼືອດ້ານອື່ນໆເປັນຕົ້ນແມ່ນດ້ານເງິນກູ້, ດ້ານກະສິກໍາໃນຂົງເຂດວຽກງານລ້ຽງສັດ, ລ້ຽງປາ ແລະ ປຸງແຕ່ງເປັນຜະລິດຕະພັນສະອາດທີ່ມີຄຸນນະພາບ ແລະ
ມາດຕະຖານ ຈາກປະເທດ ຮົງກາລີ ທີ່ຈະຊ່ວຍເຫຼືອ ແກ່ ສປປ ລາວ ໃນອານາຄົດອັນໃກ້ນີ້
ໃນຈໍານວນ 30 ລ້ານໂດລາສະຫະລັດ.
ຜົນສໍາເລັດໃນການລົງນາມດັ່ງກ່າວນີ້ຈະເປັນການປະກອບສ່ວນອັນສໍາຄັນເຂົ້າໃນການເພີ້ມທະວີສາຍພົວພັນມິດຕະພາບອັນເປັນມູນເຊື້ອທີ່ດີງາມລະຫວ່າງ
ສປປ ລາວ ແລະ ຮົງກາລີ ນັບແຕ່ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 12 ກັນຍາ 1962
ເປັນຕົ້ນມາ ແລະ ກໍເປັນການສ້າງໂອກາດໃຫມ່ໃຫ້ແກ່ ສປປ ລາວ ເຮົາໃນການເຂົ້າເຖີງແຫຼ່ງທຶນ
ແລະ ເຕັກໂນໂລຊີ ເພື່ອການພັດທະ ນາຜະລິດຕະພັນກະສິກໍາດ້ານສະບຽງອາຫານແບບຄົບວົງຈອນທີ່ທັນສະໄໝເພື່ອເພີ່ມປະລິມານ
ແລະ ຄຸນນະພາບຂອງຜະລິດຕະພັນລາວໃຫ້ສູງຂຶ້ນ, ສາມາດຕອບສະຫນອງໃຫ້ແກ່ຕະຫລາດພາຍໃນປະເທດໃຫ້ພຽງພໍເພື່ອຫລຸດຜ່ອນການນໍາເຂົ້າ ແລະ
ສາມາດສົ່ງອອກພ້ອມທັງສ້າງຄວາມເຂັ້ມແຂງເພື່ອແຂ່ງຂັນດ້ານການຄ້າຢູ່ພາຍໃນກຸ່ມປະເທດປະຊາຄົມອາຊຽນ
ຫຼື AEC
ແລະ ຄູ່ຮ່ວມມືອາຊຽນ ອື່ນໆ. ພ້ອມດຽວກັນນັ້ນ
ກໍຍັງເປັນການປະກອບສ່ວນເຂົ້າໃນການປະຕິບັດເປົ້າໝາຍການພັດທະນາແບບຍືນຍົງ, ການລົບລ້າງຄວາມທຸກຍາກ ແລະ ການບັນລຸເປົ້າໝາຍສະຫະສະວັດຂອງ
ສປປ ລາວ ໃນການຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020.
No comments:
Post a Comment