ຄະນະກຳມະການເລືອກຕັ້ງລະດັບຊາດໃຫ້ຮັກສາລາຍຊື່ຜູ້ສະໝັກຮັບເລືອກຕັ້ງ ສສຊ ປະຈຳເຂດເລືອກຕັ້ງທີ 17 ໄວ້ຄືເກົ່າ

          ຄະນະປະຈຳຄະນະກຳມະການເລືອກຕັ້ງລະດັບຊາດໄດ້ມີແຈ້ງການຫາຄະນະກຳມະການເລືອກຕັ້ງແຂວງອັດຕະປືໃຫ້ຮັກສາຈຳນວນ ແລະ ບັນຊີລາຍຊື່ຜູ້ອອກສະໝັກຮັບເລືອກຕັ້ງເປັນສະ ມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 17 ແຂວງອັດຕະປືໄວ້ຄືເກົ່າ, ພາຍຫລັງຜູ້ສະໝັກຮັບເລືອກຕັ້ງປະຈຳເຂດເລືອກຕັ້ງດັ່ງກ່າວຄື: ສະຫາຍ ພົນຕີ ວິໃສ ຈັນທະມາດ ເລຂາຄະນະພັກຮາກຖານ, ຫົວໜ້າກົມວິທະຍາສາດ-ປະຫວັດສາດ, ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ VIII ໝາຍເລກ 2 ໄດ້ເຈັບກະທັນຫັນ ແລະ ເສຍຊີວິດ ໃນຕອນບ່າຍຂອງວັນທີ 29 ກຸມພາ 2016 ສະນັ້ນ ເພື່ອຮັບປະກັນໃຫ້ການເລືອກຕັ້ງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ແຂວງອັດຕະປືປະຕິບັດໄດ້ຕາມຈຳນວນທີ່ໄດ້ກຳນົດໄວ້ນັ້ນ, ຄະນະປະຈຳຄະນະກຳມະການເລືອກຕັ້ງລະດັບຊາດຕົກລົງໃຫ້ຮັກສາ

ຈຳນວນ ແລະ ບັນຊີລາຍຊື່ຜູ້ອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 17 ໄວ້ 6 ທ່ານ, ເຊິ່ງໃນຈຳນວນ 6 ທ່ານໃຫ້ເລືອກເອົາ 5 ທ່ານ, ຂີດອອກ 1 ທ່ານ.

           ສຳລັບການຈັດພີມລຽງລຳດັບລາຍຊື່ລົງໃສ່ບັດລົງຄະແນນສຽງເລືອກຕັ້ງສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 17 ແຂວງອັດຕະປືແມ່ນໃຫ້ລຽງຕາມລຳດັບດັ່ງນີ້: 1 ທ່ານ ເລັດ ໄຊຍະພອນ. 2 ທ່ານ ເພັດແກ້ວ ເຮືອງປັນຍາ. 3 ທ່ານ ມະນີໂສ ຊາມົນຕີ. 4 ທ່ານນາງ ພອນມະນີ ຂຽນໄຊຍະວົງ.5 ທ່ານ ບົວລະພັນ ວົງຊາລະຊິດ. 6 ທ່ານນາງ ອ່ອນໃສ ມຽງລາວັນ. ດັ່ງນັ້ນ ຈຶ່ງແຈ້ງໃຫ້ຄະນະກຳມະການເລືອກຕັ້ງແຂວງອັດຕະປືນຳໄປຈັດຕັ້ງປະຕິບັດຕາມການຊີ້ນຳດັ່ງກ່າວ.