ລາວສະເຫລີມສະຫລອງວັນສັດປ່າໂລກ 3 ມີນາ

          ໃນວັນທີ 3 ມີນານີ້, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຮ່ວມກັບພາກ ສ່ວນກ່ຽວຂ້ອງຈັດພິທີສະເຫລີມສະຫລອວງວັນສັດປ່າໂລກ ຂຶ້ນທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສົມມາດ ພົນເສນາ ລັດຖະມົນຕີວ່າການກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມີອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.

ການສະຫລອງວັນດັ່ງກ່າວ ປີນີ້ເປັນປີທີ 3 ເພື່ອປູກຈິດສຳນຶກໃຫ້ປະຊາຊົນລາວບັນດາເຜົ່າ ແລະ ບັນດາປະເທດໃນໂລກ ໃຫ້ຫັນມາຮ່ວມແຮງຮ່ວມໃຈກັນປົກປັກຮັກສາສັດປ່າໃຫ້ຫລາຍຂຶ້ນ ແລະ ເພີ່ມທະວີເອົາໃຈໃສ່ຕໍ່ການຄຸ້ມຄອງຊັບພະຍາກອນທຳມະຊາດໃຫ້ມີຄວາມຍືນຍົງຕະຫລອດໄປ ແນໃສ່ເພີ່ມຄວາມອຸດົມສົມບູນທາງດ້ານຊີວະນາໆພັນ ແລະ ຈຳນວນປະຊາກອນສັດນ້ຳ ແລະ ສັດປ່າ ທີ່ເປັນມໍລະດົມທາງ

ທຳມະຊາດອັນລ້ຳຄ່າຂອງຊາດກໍຄືຂອງໂລກໃຫ້ໄດ້ຮັບການປົກປັກຮັກສາ, ຊົມ ໃຊ້ແບບຍືນນານຮອດເຊັ່ນລູກຫລາຍຂອງພວກເຮົາຕະຫລອດໄປ.

          ທ່ານ ລັດຖະມົນຕີວ່າການກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກ່າວວ່າ: ຜ່ານການຈັດຕັ້ງປະຕິບັດວຽກງານການຄຸ້ມຄອງປົກປັກຮັກສາ ແລະ ສະກັດກັ້ນການຄ້າຂາຍສັດນ້ຳ, ສັດປ່າ ທີ່ຜິດກົດໝາຍໃນໄລຍະຜ່ານມາ ໄດ້ເຮັດໃຫ້ຄວາມອຸດົມສົມ ບູນທັງດ້ານປະຊາກອນຂອງຊະນິດພັນສັດນ້ຳ ແລະ ສັດປ່າຂອງຊາດ ສາມາດຮັກສາໄດ້ດີພໍສົມຄວນເຊັ່ນ: ການສຳຫລວດ, ຊະນິດພັນສັດນ້ຳ ແລະ ສັດປ່າ ໄດ້ເລີ່ມແຕ່ຊຸມປີ 1990 ເປັນຕົ້ນມາ, ສາມາດສັງລວມຊະນິດພັນສັດນ້ຳ ແລະ ສັດປ່າ ໄດ້ຄື: ສັດລ້ຽງລູກດ້ວຍນ້ຳນົມ ມີ 247 ຊະນິດພັນ, ສັດເລືອຄານ ແລະ ຄິ່ງບົກເຄິ່ງນ້ຳ ມີ 166 ຊະນິດພັນ ແລະ ສັດປິກ ປະເພດນົກ ມີ 700 ຊະນິດພັນ, ປັດຈຸບັນການຈັດຕັ້ງປະຕິບັດວຽກງານຄຸ້ມຄອງ ແລະ ການບັງຄັບໃຊ້ກົດໝາຍ ສັດນ້ຳ ແລະ ສັດປ່າ ຢູ່ລາວ ແມ່ນອີງໃສ່ກົດໝາຍວ່າດ້ວຍສັດນ້ຳ ແລະ ສັດປ່າ ແລະ ບັນດານິຕິກຳຕ່າງໆທີ່ກ່ຽວຂ້ອງ ເພື່ອໂຄສະນາເຜີຍແຜ່ໃຫ້ປະຊາຊົນບັດດາເຜົ່າ, ອົງການຈັດຕັ້ງຕ່າງໆຕະຫລອດເຖິງບັນດາຫົວໜ່ວຍທຸລະກິດໃຫ້ເຂົ້າໃຈກ່ຽວກັບຄວາມໝາຍຄວາມສຳຄັນໃນການອະນຸລັກ ແລະ ການຄ້າຂາຍຕາມກອບຂອງສົນທິສັນຍາສາກົນເພື່ອແນໃສ່ໃຫ້ມີຄວາມຖືກຕ້ອງ ແລະ ສາມາດກວດສອບໄດ້ ແຫລ່ງທີ່ມາຂອງສັດດັ່ງກ່າວ ຊຶ່ງໃນປີ 2015 ສາມາດຢຶດງາຊ້າງໄດ້ 9 ທ່ອນ ນ້ຳໜັກ 48 ກິໂລ ແລະ ໂຕລິ່ນ 87 ໂຕ ນ້ຳໜັກ 300 ກິໂລ ແລະ ສັດອື່ນໆ.

ໃນໂອກາດນີ້ ລັດຖະມົນຕີວ່າການກ່າວວ່າ: ໃນຕໍ່ໜ້ານີ້ ຈະສືບຕໍ່ເອົາໃຈໃສ່ວຽກງານການຕ້ານ ແລະ ສະກັດກັ້ນການຄ້າຂາຍສັດປ່າ ແລະ ພືດປ່າທີ່ຜິດກົດໝາຍທຸກຮູບການເປັນຕົ້ນ: ກຳນົດນະໂຍບາຍກ່ຽວກັບການປົກປັກຮັກສາສັດນ້ຳ ແລະ ສັດປ່າ ກໍຄືຊັບພະຍາກອນທຳມະຊາດ ທີ່ເຫັນວ່າຈະເປັນເງື່ອນໄຂອັນດີໃຫ້ແກ່ການຕ້ານ ແລະ ສະກັດກັ້ນການຄ້າຂາຍສັດປ່າ ແລະ ພືດປ່າທີ່ຜິດກົດໝາຍ, ສ້າງ ແລະ ປັບປຸງກົດໝາຍວ່າດ້ວຍສັດນ້ຳ ແລະ ສັດປ່າ ພ້ອມທັງບັນດານິຕິກຳຕ່າງໆ ທີ່ກ່ຽວ ຂ້ອງໃຫ້ມີການບັງຄັບໃຊ້ຢ່າງສັກສິດ ແລະ ເຂັ້ມງວດ, ບໍ່ອະນຸຍາດໃຫ້ມີການດຳເນີນທຸລະກິດ ຫລື ການຄ້າຂາຍສັດປ່າ ແລະ ພືດປ່າທີ່ໄກ້ຈະສູນພັນ, ພ້ອມທັງກວດກາຄືນຕໍ່ກັບການຈັດຕັ້ງປະຕິບັດຜ່ານມາ ຖ້າເຫັນວ່າກິດຈະກຳ ຫລື ການດຳເນີນທຸລະກິດໃດທີ່ລະເມີດກົດໝາຍ ແລະ ສົນທິສັນຍາ ແລະ ເປັນຄວາມສ່ຽງຕໍ່ການສູນພັນຂອງຊະນິດພັນສັດປ່າແມ່ນຕ້ອງຍົກເລີກ ແລະ ດຳເນີນການຢ່າງເດັດຂາດ.