ປັດຈຸບັນ, ບັນດາຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ (ສສຊ)
ຊຸດທີ VIII
ຫລາຍເຂດພວມເຄື່ອນໄຫວລົງໂຄສະນາຫາສຽງຢ່າງເປັນຂະບວນຟົດຟື້ນ
ເປັນຕົ້ນ:ຜູ້ສະໝັກຮັບເລືອກຕັ້ງເຂດ 11 ແຂວງບໍລິຄຳໄຊ ກໍແມ່ນນຳໂດຍທ່ານນາງ ສີໄສ
ລຶເດດມູນສອນ ຮອງຫົວໜ້າຄະນະຈັດຕັ້ງສູນກາງພັກ,ຜູ້ສະໝັກໝາຍເລກ 1 ພ້ອມບັນດາຜູ້ລົງສະໝັກ ສສຊ ລວມທັງໝົດ 9 ທ່ານ
ໄດ້ລົງພົບປະປະຊາຊົນຢູ່ບ້ານໃຫ່ຍຈອມທອງ, ບ້ານໃຫຍ່ນໍ້າຢ້າງ, ບ້ານສົບນາ ແລະ ຫ້ອງວ່າການປົກຄອງເມືອງວຽງທອງ, ໂດຍມີພະນັກງານ, ທະຫານ, ຕຳຫລວດ, ປະຊາຊົນພາຍໃນເມືອງດັ່ງກ່າວເຂົ້າຮ່ວມຮັບຟັງ, ເຊິ່ງເມືອງວຽງທອງມີ 44 ໜ່ວຍປ່ອນບັດ, ມີຜູ້ມີສິດເລືອກຕັ້ງຕົວຈິງ 14.139 ຄົນ, ຍິງ 6,861 ຄົນ.
ຂະນະທີ່ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດເຂດເລືອກຕັ້ງທີ
14 ແຂວງສາລະວັນຈຳນວນ 11 ທ່ານ, ຍິງ 2 ທ່ານ, ກໍໄດ້ສືບຕໍ່ລົງຫາສຽງຢູ່ເມືອງສາລະວັນຄືຢູ່ຈຸດກຸ່ມບ້ານບຶງໄຊ, ເທດສະບານເມືອງສາລະວັນ, ວິທະຍາໄລຄູສາລະວັນ ແລະ ກຸ່ມບ້ານຜັກຂະກຸ່ມ II. ເມືອງສາລະວັນປະກອບມີ 10 ກຸ່ມ, ມີພົນລະເມືອງຫລາຍກວ່າແສນຄົນ ແລະ ມີຜູ້ມີສິດເລືອກຕັ້ງທັງໝົດ
49.955 ຄົນ, ຍິງ 26.947 ຄົນ ແລະ ທົ່ວເມືອງມີໜ່ວຍປ່ອນບັດ 63 ໜ່ວຍ.
ສ່ວນຢູ່ເຂດເລືອກຕັ້ງທີ
16 ແຂວງເຊກອງ, ຜູ້ຮັບສະໝັກເລືອກຕັ້ງຈຳນວນ 7 ທ່ານ, ເຊິ່ງນຳໂດຍທ່ານ ດຣ ວິໄລວົງ ບຸດດາຄຳ
ຮອງຫົວໜ້າຫ້ອງວ່າການສະພາແຫ່ງຊາດ, ຜູ້ສະໝັກໝາຍເລກ 1 ໄດ້ລົງເຄື່ອນໄຫວໂຄສະນາຫາສຽງຢູ່ເມືອງດາກຈຶງ, ເຊິ່ງເມືອງດັ່ງກ່າວປະກອບມີ 54 ບ້ານ, ມີຫລາຍກວ່າ 3 ພັນຄອບຄົວ, ມີພົນລະເມືອງຫລາຍກວ່າ 20 ພັນຄົນ, ຍິງ 10 ພັນກວ່າຄົນ, ໃນນັ້ນມີຜູ້ມີສິດປ່ອນບັດເລືອກຕັ້ງທັງໝົດ 10.727 ຄົນ, ຍິງ 5.598 ຄົນ ແລະ ມີໜ່ວຍປ່ອນບັດ 23 ໜ່ວຍ.
ສ່ວນຢູ່ເຂດເລືອກຕັ້ງອື່ນໆໃນທົ່ວປະເທດ, ກໍແມ່ນມີຜູ້ສະໝັກຮັບເລືອກຕັ້ງລົງເຄື່ອນໄຫວໂຄສະນາຫາສຽງເຊັ່ນກັນ
ເພື່ອສະເໜີປະຫວັດຄວາມເປັນມາຂອງຕົນ, ຜົນງານການເຄື່ອນໄຫວວຽກງານ,ຄວາມຫັວງຂອງຕົນໃນການປະຕິບັດໜ້າທີເປັນຕົວແທນແຫ່ງສິດຜົນປະໂຫຍດຂອງປະຊາຊົນໃນຕໍ່ໜ້າ
ແລະ ທັງເປັນການສຶກສາອົບຮົມໃຫ້ຜູ້ມີສິດເລືອກຕັ້ງຮັບຮູ້ ແລະ
ເຂົ້າໃຈແຈ້ງກ່ຽວກັບທາດແທ້ລະບອບການເມືອງຂອງປະເທດເຮົາ ເພື່ອໃຫ້ຜູ້ມີສິດປ່ອນບັດເລືອກຕັ້ງມີຄວາມຮັບຮູ້ເຂົ້າໃຈກ່ຽວກັບຄວາມຮຽກຮ້ອງຕ້ອງການທາງດ້ານໂຄງປະກອບຂອງສະພາແຫ່ງຊາດຊຸດທີ
VIII
ເພື່ອເຊີດຊູຄວາມຕື່ນຕົວທາງດ້ານການເມືອງຂອງປະຊາຊົນລາວບັນດາເຜົ່າໃຫ້ປະຕິບັດສິດເປັນເຈົ້າຂອງປະເທດຊາດ
ເປັນພົນລະເມືອງທີ່ດີໂດຍໄປໃຊ້ສິດປ່ອນບັດເລືອກຕັ້ງເອົາຜູ້ມີມາດຖານເງື່ອນໄຂຖືກຕ້ອງ
ແລະ ຄົບຖ້ວນເຂົ້າເປັນສະມາຊິກສະພາແຫ່ງຊາດຊຸດທີ VIII.
No comments:
Post a Comment