ສະຫາຍເລຂາທິການໃຫຍ່ ບຸນຍັງ ວໍລະຈິດ ເນັ້ນໃຫ້ການນໍາແຂວງບໍລິຄໍາໄຊ ເອົາໃຈໃສ່ວຽກງານ ປກສ-ປກຊ ໜັກແໜ້ນກວ່າເກົ່າ

          ໃນວັນທີ 2 ມີນານີ້, ສະຫາຍເລຂາທິການໃຫຍ່ພັກປະຊາຊົນປະຕິວັດລາວ ບຸນຍັງ ວໍລະຈິດ ໄດ້ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມຕໍ່ຄະນະພັກ ແລະ ອຳນາດການປົກຄອງແຂວງບໍລິຄຳໄຊ, ໂດຍໄດ້ຮັບການຕ້ອນຮັບຈາກສະຫາຍ ດຣ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ພ້ອມດ້ວຍຄະນະຢ່າງອົບອຸ່ນ.

            ໃນໂອກາດນີ້, ສະຫາຍເຈົ້າແຂວງບໍລິຄໍາໄຊ, ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ເປັນຕົ້ນ: ວຽກງານປ້ອງກັນຊາດ-ປ້ອງກັນຄວາມສະຫງົບ, ໂດຍໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ເພື່ອເຮັດໃຫ້ວຽກງານດັ່ງກ່າວເປັນຂອງທົ່ວປວງຊົນ, ໄດ້ຈັດຕັ້ງກໍາລັງລົງກໍ່ສ້າງຮາກຖານການເມືອງ ເພື່ອກໍາແໜ້ນສະພາບຂອງປະຊາຊົນ, ຈັດຕັ້ງກໍາລັງກວດກາລາດຕະເວນໃນພື້ນທີ່ມີຄວາມຫຼໍ່ແຫຼມ, ເອົາໃຈໃສ່ໃນການສ້າງບ້ານປ້ອມໝັ້ນ ແລະ ບ້ານສູ້ຮົມຕິດລຽນໃນບັນດາເມືອງທີ່ມີຊາຍແດນຕິດກັບ

ປະເທດໃກ້ຄຽງຢ່າງຕໍ່ເນື່ອງປົກກະຕິ, ດ້ານວຽກງານຂົງເຂດເສດຖະກິດ ແລະ ພັດທະນາສັງຄົມສົກປີ 2014-2015 ຜ່ານມາມູນຄ່າລວມຍອດຜະລິດຕະພັນພາຍໃນ (GDP) ບັນລຸໄດ້ 4.052 ຕື້ກີບ, ສະເລ່ຍຫລາຍກວ່າ 14 ລ້ານກີບຕໍ່ຄົນຕໍ່ປີ ແລະ ອັດຕາການຂະຫຍາຍຕົວທາງດ້ານເສດຖະກິດຢູ່ໃນລະດັບສະເລ່ຍ 8,6%. ໂຄງປະກອບເສດ ຖະກິດກະສິກໍາຂະຫຍາຍຕົວ 57,5%, ອຸດສາຫະກໍາຂະຫຍາຍຕົວ 21,76% ແລະ ການບໍລິການຂະຫຍາຍຕົວ 2,94% ຂອງ(GDP) ແລະ ມີການປ່ຽນແປງໄປຕາມທິດການຜະລິດກະສິກໍາຕິດພັນກັບອຸດສະຫະກໍາ ແລະ ການບໍລິການເທື່ອລະກ້າວ. ສົກປີ 2015-2016 ໄດ້ອະນຸມັດໂຄງການລົງທຶນຂອງລັດຈໍານວນ 225 ໂຄງການ, ມີມູນຄ່າຫລາຍກວ່າ 130 ຕື້ກີບ, ໄດ້ຈັດຕັ້ງປະຕິບັດແລ້ວ 202 ໂຄງການເທົ່າກັບ 79 ສໍາລະແລ້ວ 66 ໂຄງການໃນມູນຄ່າ 49,50 ຕື້ກີບ.

           ໃອກາດດັ່ງກ່າວ, ສະຫາຍເລຂາທິການໃຫຍ່, ໄດ້ສະແດງຄວາມຊົມເຊີຍຕໍ່ບັນດາຜົນງານທີ່ຄະນະພັກ-ຄະນະນໍາຂອງແຂວງຍາດມາໄດ້, ພ້ອມທັງເນັ້ນໃຫ້ສືບຕໍ່ເພິ່ມທະວີເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ແກ້ໄຂບັນຫາສິ່ງຫຍໍ້ທໍ້ທີ່ເກີດຂື້ນໃນສັງຄົມ, ໂດຍສະເພາະບັນຫາຢາເສບຕິດ, ຂີ້ລັກງັດແງະ ແລະ ອຶ່ນໆໃຫ້ຫຼຸດໜ້ອຍລົງເທື່ອລະກ້າວ, ພ້ອມທັງສືບຕໍ່ຫັນລົງກໍ່ສ້າງຮາກຖານຢູ່ຂັ້ນທ້ອງຖິ່ນໃຫ້ເລິກເຊິ່ງ ແລະ ທົ່ວເຖິງເພື່ອນໍາເອົາແນວທາງນະໂຍບາຍຂອງພັກ-ລັດນຳໄປເຜີຍແຜໃຫ້ປະຊາຊົນບັນດາເຜົ່າຢູ່ເຂດຫ່າງໄກສອກລີກໄດ້ເຂົ້າໃຈ ແລະ ປະຕິບັດຢ່າງຖືກຕ້ອງຕິດພັນກັບການແກ້ໄຂຄວາມທຸກຍາກໃຫ້ຫຼຸດລົງເທື່ອລະກ້າວ.