ບໍລິສັດ ໄຟຟ້າ ຫົງສາ ຈຳກັດ, ໄດ້ດຳເນີນການເປີດເຄື່ອງຜະລິດໄຟຟ້າໜ່ວຍທີ 3 ໃນວັນທີ 1 ມີນານີ້, ພາຍຫລັງເຄື່ອງຈັກຜະລິດໜ່ວຍທີ 1 ແລະ 2
ໄດ້ດໍາເນີນການຈ່າຍກະແສໄຟຟ້າມາແຕ່ຕົ້ນເດືອນມິຖຸນາ ແລະ ຕົ້ນເດືອນພະຈິກ 2015 ຜ່ານມາ, ຕາມກໍານົດເວລາທີ່ລະບຸໄວ້ໃນສັນຍາສໍາປະ ທານ ແລະ
ສັນຍາຊື້-ຂາຍໄຟຟ້າກັບການໄຟຟ້າຝ່າຍຜະລິດແຫ່ງປະເທດໄທ ແລະ ລັດວິສາຫະກິດໄຟຟ້າລາວ,
ເຊິ່ງເຄື່ອງຈັກຜະລິດໄຟຟ້າທັງ 3 ໜ່ວຍມີກໍາລັງການຜະລິດລວມ 1.878
ເມກາວັດ ເພື່ອສະໜອງພະລັງງານໄຟຟ້າໃຫ້ແກ່ລັດວິສາຫະກິດໄຟຟ້າລາວ 100 ເມກາວັດ ແລະ
ການໄຟຟ້າຝ່າຍຜະລິດແຫ່ງປະເທດໄທ 1.473 ເມກາວັດໃນໄລຍະເວລາສໍາປະທານ 25 ປີ.
ທ່ານ ສົມສັກ
ສິດທິນາມສຸວັນ ອໍານວຍການໃຫຍ່ບໍລິສັດໄຟຟ້າຫົງສາຈຳກັດໃຫ້ຮູ້ວ່າ:ໂຄງ ການກໍ່ສ້າງໂຮງໄຟຟ້າພະລັງຄວາມຮ້ອນຈາກຖ່ານຫີນເລີ່ມລົງມືກໍ່ສ້າງມາແຕ່ປີ 2010 ລວມມູນຄ່າການກໍ່ສ້າງທັງໝົດ
3.710 ລ້ານໂດລາສະຫະລັດ ຫລື
ປະມານ 30 ພັນຕື້ກີບ, ມີໄລຍະການສຳປະທານ 25 ປີແຕ່ 2016-2041. ໂຄງການດັ່ງກ່າວຈະປະກອບສ່ວນສ້າງຄວາມເຂັ້ມແຂງດ້ານເສດຖະກິດ ແລະ ຄວາມຈະເລີນຮຸ່ງເຮືອງຂອງສອງປະເທດລາວ-ໄທ, ຊຶ່ງໂຄງການໄດ້ໃຫ້ຄວາມສຳຄັນເປັນຢ່າງຍິ່ງໃນຄວາມຮັບຜິດຊອບຕໍ່ດ້ານສັງຄົມ ແລະ ສິ່ງແວດລ້ອມ,ໃນທຸກໆວຽກງານການຈັດຕັ້ງປະຕິບັດຢຶດໝັ້ນຕໍ່ການຄຸ້ມຄອງບໍລິຫານທີ່ດີທີ່ສຸດ ເພື່ອໃຫ້ເປັນທີ່ຍອມຮັບໃນລະດັບສາກົນ ແລະ ມາດຕະຖານສິ່ງແວດລ້ອມຂອງທະນາຄານໂລກ.ບໍລິສັດຍັງມີຄວາມພະຍາຍາມຈະເຮັດໃຫ້ໂຮງໄຟຟ້າແຫ່ງນີ້ເປັນຕົວແບບໃນການຜະລິດກະແສໄຟຟ້າຈາກຖ່ານຫີນທີ່ເປັນມິດກັບສະພາບແວດລ້ອມອັນແທ້ຈິງ ແລະ ນຳໄປສູ່ການພັດທະນາແບບຍືນຍົງ.
ໂຮງໄຟຟ້າຫົງສາມີຄວາມສໍາຄັນຕໍ່ຄວາມໝັ້ນຄົງທາງພະລັງງານຂອງ ສປປ
ລາວ ແລະ ປະເທດໄທ ເພາະໃຊ້ຖ່ານຫີນທີ່ຂຸດຄົ້ນໄດ້ຈາກພື້ນທີ່ຂອງໂຄງການເປັນເຊື້ອໄຟ
ລາຄາຈຶ່ງບໍ່ປ່ຽນແປງຕາມລາຄາເຊື້ອໄຟໃນຕະຫລາດໂລກ, ເຊິ່ງບໍລິສັດໄດ້ເລືອກໃຊ້ເຕັກໂນໂລຊີທີ່ເໝາະສົມໃນການກໍ່ສ້າງໂຮງໄຟຟ້າ,
ຕິດຕັ້ງອຸປະກອນຄວບຄຸມມົນລະຜິດຈາກແຫລ່ງກໍາເນີດຕາມມາດຕະຖານຂອງທະນາ ຄານໂລກ ແລະ
ດໍາເນີນການຕິດຕາມວັດແທກຄຸນນະພາບສິ່ງແວດລ້ອມຢ່າງຈິງຈັງພາຍໃຕ້ການຕິດຕາມກວດກາຢ່າງເຂັ້ມງວດຈາກລັດຖະບານລາວ.
No comments:
Post a Comment