ເຈົ້າໜ້າທີ່ກົມມໍລະດົກ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວໄດ້ເປີດເຜີຍໃຫ້ຮູ້ໃນວັນທີ 2 ມີນານີ້ວ່າ: ທີມສໍາຫລວກ ແລະ ຄົ້ນຫາຫລັກຖານຄວາມເປັນມາຂອງທົ່ງໄຫຫີນຢູ່ແຂວງຊຽງຂວາງ, ໄດ້ຂຸດຄົ້ນເຫັນຊາກກະດູກຄົນບູຮານຈໍານວນຫລາຍທີ່ກະແຈກກະຈາຍເປັນສີ້ນສ່ວນນ້ອຍໆຢູ່ພື້ນດິນບໍລິເວນເຂດທົ່ງໄຫຫີນ, ຊຶ່ງສັນນິຖານສີ້ນສ່ວນກະດູກດັ່ງກ່າວອາດມີອາຍຸຫລາຍກວ່າສອງພັນປີ.
ທ່ານ ດຣ. ທອງລິດ ຫລວງໂຄດ ຫົວໜ້າກອງບູຮານວິທະຍາກົມມໍລະດົກ ໃຫ້ຮູ້ວ່າ:ພາຍ ຫລັງໄດ້ຮັບອະນຸຍາດຈາກລັດຖະບານໃຫ້ດໍາເນີນການສໍາຫລວດ, ຂຸດຄົ້ນຫາຫລັກຖານຄວາມເປັນມາຂອງທົ່ງໄຫຫີນ, ຄະນະວິຊາການຂອງລາວ ແລະ ຄະນະຊ່ຽວຊານດ້ານວັດຖຸບູຮານຈາກປະເທດອົດສະຕາລີ ຈຶ່ງໄດ້ເລີ່ມລົງມືສໍາຫລວດ ແລະ ຂຸດຄົ້ນພື້ນທີ່ເປົ້າໝາຍມາແຕ່ຕົ້ນປີ 2016, ເຊິ່ງໄດ້ພົບເຫັນສີ້ນສ່ວນວັດຖຸເກົ່າແກ່ຫລາຍປະເພດ, ລວມທັງສີ້ນສ່ວນກະດູກຄົນບູຮານດັ່ງກ່າວ.
ຫົວໜ້າກອງບູຮານວິທະຍາ ກ່າວວ່າ:
ໂຄງການສໍາຫລວດ ແລະ ຊອກຄົ້ນຄວາມເປັນມາຂອງທົ່ງໄຫຫີນໄດ້ດໍາເນີນມາແຕ່ປີ 1995 ໂດຍຊ່ຽວຊານປະເທດຝຣັ່ງ ໃນໄລຍະນັ້ນກໍໄດ້ຢັ້ງຢືນວ່າ: ທົ່ງໄຫຫີນແມ່ນເປັນບ່ອນຝັງສົບ, ຕໍ່ມາປີ
1996 ໄດ້ສືບຕໍ່ຊອກຂຸດຄົ້ນຕື່ມອີກໂດຍຊ່ຽວຊານຍີ່ປຸ່ນກໍໄດ້ມີການຢືນຢັນວ່າເປັນສະຖານທີ່ຝັງສົບເຊັ່ນກັນ ແລະ ຄັ້ງຫລ້າສຸດພວກເຮົາມີການຮ່ວມມືກັບຊ່ຽວ ຊານອົດສະຕາລີ ໂດຍໄດ້ຮັບການສະໜັບສະໜູນທຶນຈາກລັດຖະບານອົດສະຕາລີເພື່ອຈັດຕັ້ງປະ ຕິບັດໂຄງການດັ່ງກ່າວເປັນເວລາ 5 ປີແຕ່2016-2021 ແລະ ກໍພົບກະດູກດັ່ງກ່າວ ແລະ ປັດຈຸບັນຊ່ຽວ ຊານອົດສະຕາລີໄດ້ສົ່ງຕົວຢ່າງກະດູກດັ່ງກ່າວໄປປະເທດອົດສະຕາລີ ເພື່ອພິສູດ ແລະ ວິໄຈ ວ່າແມ່ນກະດູກມະນຸດໃນຍຸກສະໄໝໃດ ແລະ ມີຄວາມກ່ຽວຂ້ອງກັບໄຫຫີນແນວໃດ, ເຊິ່ງຄາດວ່າຈະຮູ້ຜົນຄໍາຕອບປະມານໜຶ່ງເດືອນຂ້າງໜ້າ.
No comments:
Post a Comment