ADB ຄາດປີ 2016 ເສດຖະກິດຂອງລາວຈະຂະຫຍາຍຕົວຢູ່ໃນລະດັບ 6,8%

ວັນທີ 30 ມີນານີ້, ທະນາຄານພັດທະນາອາຊີ (ADB ) ປະຈຳລາວ, ໄດ້ເຜີຍແຜ່ບົດລາຍງານການຄາດຄະເນເສດຖະກິດຂອງອາຊີ ປີ 2016 ຕໍ່ສືມວນຊົນລາວຂຶ້ນ, ຢູ່ສຳນັກງານ ADB ໃນນະຄອນຫຼວງວຽງຈັນໂດຍທ່ານ ນາງ ແຊນດຣ້າ ນິໂຄຣ ຜູ້ຕາງໜ້າ ADB ປະຈຳລາວຖະແຫ່ງວ່າ: ບົດລາຍງານຂອງ ADB ຊີ້ໃຫ້ເຫັນວ່າ: ໃນປີ 2016 – 2017 ,ໂດຍລວມແລ້ວສະພາບເສດຖະກິດອາຊີຈະຂະຫຍາຍຕົວເພີ່ມຂຶ້ນເລັກຫນ້ອຍ, ຊຶ່ງມີຜົນກະທົບມາຈາການຂະຫຍາຍຕົວທີ່ຊ້າລົງຂອງເສດຖະກິດ ສປ ຈີນ ຕໍ່ກັບການຄ້າ ແລະ ການລົງທຶນຂອງ ລາວ ຄາດວ່າຈະບໍ່ຮ້າຍແຮງຍ້ອນຜົນຂອງເສດຖະກິດໄທທີ່ຄ່ອຍໆດີຂຶ້ນ  ແລະ ການຂະຫຍາຍຕົວທີ່ເຂັ້ມແຂງຂອງເສດຖະກິດຫວຽດນາມຈະເຮັດໃຫ້ການສົ່ງອອກ, ການທ່ອງທ່ຽວ ແລະ ການໂອນເງິນເຂົ້າລາວເພີ່ມຂຶ້ນ, ຊຶ່ງຄາດວ່າຍອດມູນຄ່າຜະລິດຕະພັນພາຍໃນ

(GDP) ຂອງລາວຈະສືບຕໍ່ຂະຫຍາຍຕົວຢູ່ໃນລະດັບ 6,8% ສຳລັບປີ 2016, ຊຶ່ງເພີ່ມຂຶ້ນເລັກນ້ອຍເມື່ອທຽບໃສ່ປີ 2015 ຢູ່ໃນລະດັບ 6,7% ແລະ ຄາດວ່າຈະສືບຕໍ່ຂະຫຍາຍຕົວເພີ່ມຂຶ້ນເຖິງ 7 % ໃນປີ 2017 ແລະ ທ່າແຮງຫຼັກໃນການຊຸກຍູ້ເສດຖະກິດຂອງລາວຂະຫຍາຍຕົວກໍຍັງແມ່ນຂະແໜງພະລັງງານໄຟຟ້າ ແລະ ການທ່ອງທ່ຽວ ທີ່ຍັງສາມາດຮັກສາລະດັບການຂະຫຍາຍຕົວໄດ້ຢ່າງເຂັ້ມແຂງ ແລະ ຕໍ່ເນື່ອງ ແລະ ການຂະຫຍາຍຂອງຂະແໜງບໍລິການ ແລະ ການກໍ່ສ້າງ ຈະຊ່ວຍຮັກສາອັດຕາການຂະຫຍາຍຕົວຂອງເສດຖະກິດລາວໄວ້ຢ່າງແຂງແຮງຕະຫຼອດໄລຍະ  2 ປີຕໍ່ໜ້າ, ຊຶ່ງຈະຮັບປະກັນໃຫ້ເສດຖະກິດຍັງຄົງຮັກສາທິດທາງການຂະຫຍາຍຕົວຕາມແຜນທີ່ວາງໄວ້ ແລະ ເພື່ອເຮັດໃຫ້ ສປປລາວ ຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020 ລາວວຈະຕ້ອງເພີ່ມທະວີຄວາມເຂັ້ມແຂງໃຫ້ແກ່ສະຖານະພາບຄັງສຳຮອງເງິນຕາຕ່າງປະເທດຂອງຕົນ, ໂດຍການປະຕິບັດນະໂຍບາຍຕ່າງໆທາງດ້ານງົບປະມານ ແລະ ການເງິນເພື່ອຫຼຸດຜ່ອນຜົນກະທົບຈາກຄວາມສ່ຽງຕ່າງໆຂອງພາຍນອກ, ພ້ອມທັງຂະຫຍາຍພື້ນຖານການສົ່ງອອກໃຫ້ມີຄວາມຫຼາກຫຼາຍ ແລະ ປັບປຸງສະພາບແວດລ້ອມພາຍໃນທີ່ອຳນວນໃຫ້ການການດຳເນີນທຸລະກິດເພື່ອເພີ່ມການຜະລິດຫຼາຍຂຶ້ນ.

ຜູ້ຕ່າງໜ້າ ADB ໃຫ້ຮູ້ອີກວ່າ: ເຖິງວ່າມາດຕະການການເກັບພາສີຂອງລາວ ຈະມີຄວາມ ເຂັ້ມແຂງຂຶ້ນ ແລະ ການຄຸ້ມຄອງລາຍຈ່າຍ ຂອງລັດມີຄວາມຮັດກຸມດີຂຶ້ນ, ແຕ່ການຂາດດຸນງົບປະມານຍັງຄາດວ່າຈະເພີ່ມຂື້ນເຖິງ 5% ຂອງ GDP ໃນປີ 2016 ຊຶ່ງເພີ່ມຂຶ້ນເມື່ອທຽບໃສ່ປີຜ່ານມາ 4,7 % ,ເນື່ອງຈາກວ່າປະລິມານຄວາມຕ້ອງການການບໍລິໂພກຂອງໂລກທີ່ຄາດວ່າຈະຫຼຸດລົງ, ພ້ອມທັງການອ່ອນຄ່າລົງຂອງລາຄາທອງ ແລະ ຄຳ, ຊຶ່ງສະພາບເງື່ອນໄຊດັ່ງກ່າວຈະກົດດັນໃຫ້ແກ່ການເກັບພາສີລາຍຮັບງົບປະມານຂອງລາວໄດ້ໜ້ອຍລົງ.