laophatthananewspaper: ເຜີຍແຜ່ບົດລາຍງານການສຶກສາລະດັບຊາດກ່ຽວກັບການໃຊ້ຄວາມຮຸນແຮງຕໍ່ແມ່ຍິງໃນ ສປປ ລາວ

ວັນທີ 10 ມີນານີ້, ອົງການສະຫະປະຊາຊາດກອງທຶນສຳລັບປະຊາກອນ ( UNFPA ) ປະຈຳລາວໄດ້ຈັດກອງປະຊຸມເຜີຍແຜ່ບົດລາຍງານການສຶກສາລະດັບຊາດກ່ຽວກັບການໃຊ້ຄວາມຮຸນແຮງຕໍ່ແມ່ຍິງໃນຫົວຂໍ້ ”ສຸຂະພາບ ແລະ ປະສົບການຊີວິດຂອງແມ່ຍິງ” ໃນ ສປປ ລາວ ຂຶ້ນທີ່ຫໍປະຊຸມແຫ່ງຊາດ, ໂດຍການເຂົ້າຮ່ວມຂອງທ່ານ ບຸນສະຫວາດ ບຸບຜາ ລັດຖະມົນຕີຊ່ວຍວ່າການກະຊວງຍຸດຕິທຳ, ທັງເປັນຄະນະກຳມະການລະດັບຊາດເພື່ອຄວາມກ້າວໜ້າຂອງແມ່ຍິງແຫ່ງຊາດ (ຄກມຊ) , ທ່ານ ນາງ ຄາຣິນາ ອິມໂມເນັນ (Ms karina Inmonen) ຜູ້ປະສານງານ ເຄື່ອຂາຍ ອົງການສະຫະປະຊາຊາດປະຈຳລາວ, ມີບັນດາທູດຕ່າງປະເທດ, ຄູ່ຮ່ວມພັດທະນາ ແລະ ອົງການຈັດຕັ້ງສາກົນຕ່າງໆປະຈຳລາວເຂົ້າຮ່ວມນຳດ້ວຍ.

ຄກມຊ ກ່າວໃນທີ່ປະຊຸມວ່າ: ຄກມຊ ຮ່ວມກັບສູນສະຖິຕິດແຫ່ງຊາດ ແລະ ຂະແໜງການທີ່ກ່ຽວຂ້ອງໄດ້ດຳເນີນການສຳຫຼວດສຶກສາການໃຊ້ຄວາມຮຸນແຮງຕໍ່ແມ່ຍິງໃນປະເທດເຮົາເລີ່ມແຕ່ປີ 2013 ເປັນຕົ້ນມາ, ຊຶ່ງຜົນຂອງການສຶກສາໃນຄັ້ງນີ້, ໄດ້ສະທ້ອນໃຫ້ເຫັນຫຼາຍບັນຫາທີ່ຕ້ອງໄດ້ຮີບຮ້ອນແກ້ໄຂການໃຊ້ຄວາມຮຸນແຮງຕໍ່ແມ່ຍິງ, ຊຶ່ງຍັງເກີດຂຶ້ນຫຼາຍໃນປະເທດເຮົາ, ໂດຍສະເພາະໃນຄອບຄົວແມ່ນບັນຫາທີ່ເກີດຂຶ້ນໃນທຸກບ່ອນ, ບໍ່ວ່າຈະເປັນຊົນນະບົດຫຼືໃນຕົວເມືອງ, ໃນກຸ່ມຄົນທີ່ຮູ້ໜັງສື ແລະ ບໍ່ຮູ້ໜັງສື, ການໃຊ້ຄວາມຮຸນແຮງໄດ້ສົ່ງຜົນກະທົບທີ່ຮ້າຍແຮງຕໍ່ສຸຂະພາບທາງຮ້າຍກາຍ ແລະ ຈິດໃຈຂອງແມ່ຍິງ, ບໍ່ພຽງແຕ່ເທົ່ານັ້ນຄວາມຮຸນແຮງຕໍ່ແມ່ຍິງຍັງມີຜົນກະທົບຕໍ່ການພັດທະນາເສດຖະກິດ-ສັງຄົມຂອງຊາດ, ຍ້ອນວ່າມັນມີຜົນກະທົບຕໍ່ການມີສ່ວນຮ່ວມຂອງແມ່ຍິງໃນຕະຫຼາດແຮງງານ, ປະສິດທິພາບຂອງແຮງານ, ການສຶກສາ ແລະ ການຝຶກອົບຮົມ, ຖ້າສາມາດປ້ອງກັນຄວາມຮຸນແຮງບໍ່ໃຫ້ເກີດຂຶ້ນ, ລອງຄິດເບິ່ງວ່າຈະສາມາດປະຢັດງົບປະມານຂອງລັດ ແລະ ເອກະຊົນໄດ້ເປັນຈຳນວນຫຼາຍ ຈາກການປິ່ນປົວ ແລະ ຈາກການເສຍແຮງງານອັນສຳຄັນຂອງຊາດ ແລະ ຫວັງຢ່າງຍິ່ງວ່າຜົນຂອງການສຶກສາຄັ້ງນີ້ຈະເປັນຂໍ້ມູນ ແລະ ບ່ອນອີງໃຫ້ແກ່ການຈັດຕັ້ງປະຕິບັດ ແນວທາງນະໂຍບາຍຂອງພັກ ແລະ ລັດຖະບານຕໍ່ວຽກງານຕ້ານການໃຊ້ຄວາມຮຸນແຮງຕໍ່ ແມ່ຍິງໃນປະເທດເຮົາ, ໂດຍສະເພາະແມ່ນການຈັດຕັ້ງປະຕິບັດແຜນການດຳເນີນງານແຫ່ງຊາດກ່ຽວກັບການປ້ອງກັນ ແລະ ລືບລ້າງຄວາມຮຸນແຮງຕໍ່ແມ່ຍິງ ແລະ ເດັກ, ການຈັດຕັ້ງ ປະຕິບັດກົດໝາຍ ວ່າດ້ວຍການລືບລ້າງຄວາມຮຸນແຮງຕໍ່ແມ່ຍິງ ແລະ ເດັກນ້ອຍໃຫ້ ໄດ້ຮັບຜົນ.ໂອກາດນີ້, ທ່ານຍັງສະແດງຄວາມຂອບໃຈຕໍ່ຄູ່ຮ່ວມພັດທະນາ ແລະ ອົງການຈັດຕັ້ງສາກົນຕ່າງໆ, ໂດຍສະເພາະແມ່ນອົງການ UNFPA ທີ່ໃຫ້ການຊ່ວຍເຫຼືອ ແລະ ສະໜັບສະໜູນເຮັດໃຫ້ບົດລາຍງານຜົນການສຳຫຼວດຄັ້ງນີ້ສຳເລັດຢ່າງຈົບງາມ, ພ້ອມນັ້ນ ທ່ານຍັງໄດ້ສະແດງຄວາມຊົມເຊີຍຕໍ່ນັກເດີນສຳຫຼວດກໍຄືນັກສຳພາດທີ່ພ້ອມກັນສຸມທຸກສະຕິປັນຍາເຮັດໃຫ້ມີຜົນສຳເລັດໃນຄັ້ງນີ້ ບັນລຸຕາມລະດັບຄາດໝາຍທີ່ວາງໄວ້.